ISAIAH 7 - KHYINGEI PU'TLOU Bible (BSI)

Jerusalemei Doura Raal Dakur

¹ Judah'yei Krung Uzziah'yei cha Jotham'yei chanapawa Ahaz'yei krungchaanrou asitoubi hungthukura, touri Syria'yei krung Rezin'le, Remaliah'yei chanapawa, Israellei krung Pekah'ne Jerusalem'ra kabine aidoura raal dakur; heiya raal heiwari manimakur.

² Heirou David'yei bommaira asitoubi paotambi, “Aramea'yei raallui rapne Ephraim'le rungbom sheembine raal marchubine leiyurame,” toubine shunpikur heirouri, aiyei touri krung Ahaz'yei solung, heirou aiyei thimi rapbei solungri chiwurbi heengyaorei martheene shakhngakchakur heengtrung naksine kanchunwurchiya.

³ Heirouri Umpune Isaiah'nung shun, “Asinunghak nangle, neicha napawa Shear-jashub'ne chawurbi, heitoubi lamtang ruirei klei phishu thimi rapbei yuiphumei tuyna lhangei palra Ahaz'ya wamurillaka;

⁴ heitoubi anungei asitoubi shunpilak: ‘Mukheini toulak, heirou neimalung dammalo, heitoubi chimakni leiyalo! Mitraamkur meiyu matum naksine, malungkha'tekbine klei Rezin'le Aramea raple, Remaliah'yei chanapawa Pekah'ya chiwurbi neilhawai lahwurmak.’

⁵ Ngamri Aramea rapne Ephraim'le, Remaliah'yei chanapawa Pekah'le yakantlangrilbi neidoura karhani lhangaimakya rangbine asitoubi yunlei:

⁶ ‘Kane Judah'yei doura karhani kabi raal dawase, heitoubi raal lukloubine, raalpal nangbaiwurbi, heiwaya kanungei yerkhairillase, heitoubi heiyei rilla Tabe-el'yei chanapawaya krung khoine bom lhaklakase.’ ”

⁷ “Heiya Pu Dupune asitoubi shunpilei: ‘Heiri kouniroukhi hoimakrou, thukkhi thukkhoumakrou.’

⁸ Ngamri Aramea'yei lu khoiyei kleiri Damascus, heirou Damascus'yei lu khoiyei kleiri Rezin(ari hut-mantrangmak), kum somrukle phangaei rilla Ephraimri deekhrombi mangrouwa, heineri heiyei thimi Israel rapkhi lim khat khoine leimarou;

⁹ heirou Ephraimei luri Samaria, heirou Samariaei luri Remaliah'yei chanapawa Pekah. “Kounakpi nangni shunthutkur tlou awaya uklummaka'nungri, nangkhi tanghakpani pulchimakrou.”

Naoshen Immanuel Pukpi

¹⁰ Heirouri Umpune hanuikhi Ahaz'nung shunbi asitoubi kyun:

¹¹ “Kyun tlou awaya chim-chimmak munanungei neiyei Pu Dupu, Umpurei hutlha khat bulak, heiwari Sheol'naksi khyukkhi kya, nimanung nungthounaksi choukhi kya.”

¹² Heiya Ahaz'ne loukyun, “Keiri kou hutlhakhi bumakrou, Umpuyakhi marshakbi chaangh thimakrou!”

¹³ Heirouri Isaiah'ne kyun, “Asinungri louningpilaklo, O David'yei cheemmai! Tlaipang thimile kanthramril heimak heinaksine, keiyei Dunpuyakhi kanthram heimakrouko?

¹⁴ Ngam heineri Pu Dupu Aimsha'hakni neinungei hutlha khat yukpirou. Louthilak, khying nangaka khatni nao urbi heirou ani chanapawa khat pukrou, heitoubi ani Aiyei min ‘Immanu-el’ toubi thulpirou.

¹⁵ Ane lhangaimakya yamakni, heirou lhangaiya tounanungei khalmuei kaallouri nushung-yui kankhanya chamairou, heirou khuiningya mongrou.

¹⁶ Naoshen heichani lhangaimakya yamaknei heirou lhangaiya tounungei relthut muheibongnang, neiyei ningchikhou krung khintamei ram Israelle, Syria rapri marthingthutbi hangwalni horkhourouwa.

Judah'yei Doura Klah-knang Da'kyer

¹⁷ “Ephraim'ne Judah'rei karkhaikur tlaini heirouweine tekkhi thukkhoumak klah-knangei tlainirap Umpune neiyei dourale, neiyei thimi rapbei dourakhi, heirou neiyei pawaei cheemkhur-bommai'yei dourakhi yenpieirouhui.

¹⁸ “Heitoubi tlaini heirouri asitoubi hungthukheirou, touri Umpune huttungka shakhungbine Egyptbei kungrui watongnarei klei thimi rapya tranrul naksine ungthutrou, heitoubi Assyria ramrei thimi rapkhi khuirui naksine heitraithutrou.

¹⁹ Heisitoubi yarap nammani wathukbi, heitoubi kungkhrong hangra, phaikarra, lhungso-heengyao hangra, thru hangra, heirou yuiput leina bi raprakhi karyouni rungbom sheembine leikhalrouwa.

²⁰ “Heiyei tlainirouri Umpune Euphrate kungtang sralla klei Assyria'yei krungle unglhakbi heitoubi naya katini lurei shamle, ho-khmul heirou murkhmulya ngoumthaikur heinaksine ngoumthaichirou.

²¹ “Heiyei tlainirouri asitoubine hungthukrou, touri thimi napung khatni halpui khatle yaopui khintamchale dunbine khourou.

²² Heitoubi heirapne nushungyui marthumni thukyerbi heitoubi ani heirapbei nushungyui kankhanya chamaibi leirou; heisitoubi ram heirouei leithungkur himalei thimirap nammanikhi nushung-yui kankhanya chamaibi, heirou khuiningya mongbine leirou.

²³ “Heitoubi heiyei tlainirouri asitoubine hungthukrouwa, touri ram heiyei darkha yam lishing kounakya shekel lishing-lishingei man-chaangh'ra leikhou heiwari louh-trung raple, thruyam rapne bil-thimni yamphoprouwa.

²⁴ Thimi rapne yekul bi heirou malaa-taakle, malaa-chei rapya shinbine wachangrouwa, ngamri bi heiwari thru-trung raple ruiyamni yamhuphopbine leiyura.

²⁵ Kheen khatrou thimi rapne louhin wadabi truncha-trunmaikhouna lhungdou rapra thru-trung raple louh-trung rapne pukphopburnei ngamrou thimi rapne wachangamakarou; heiya birap heiwaya halsilna bi heirou yaoshilna birap khoine yrengrouwa.”