ISAIAH 61 - KHYINGEI PU'TLOU Bible (BSI)

Lhukthutpinei Paolhangai

¹ Pu Dupuei Lhawaini Keidoura leipilei, ngamri Umpune Keiya shirek teipiwurla; marhotpikur thimi rapnungei lhangai paolaa yenpinanungei, solung baikur thimi rapya malung damyerpinanungei Ane Keiya yenmalhetpiwurla. Raalmankur thimi rapnungya malhet'thutpinanungei, heirou kulrillei mehnara klei thimi rapya malhet'thutnanungei Ane Keiya yenmalhetpiwurla.

² Umpune kringpibi yapinei kumya paothutpinanungei, heirou Dunpuei khlang lhaknei tlainiya shunthutpinanungei, heirou lhawai klah thimi rapya malung damyerpinanungei Ane Keiya yenmalhetpiwurla.

³ Zion'ra lhawai klahni kanrel thimi rapya trungpinanungei, rahuiyei rungkhlangra hakraowei lukhupya khupbangpinungei; klahni kanrelnei rungkhlangra nungkngaiyei shirekya teipinanungei, heirou lhawai klahni chapkanrelnung'tlim mathangnei shambya baangpinanungei. Heineri yarap heiyari Umpuei thang'alya alyerna'nungei lingpukpikur Umpuei tharmu chimmei bok'heeng trungrap toubine ungrou.

⁴ Bongei waiyoubi maang-taakkur rapya yani sabaangthurou, heirou lamkriyei deekmaangbi louklei bi rapya yani khulkanthouthurou; heitoubi thimi-chaan kounakrouwei mang-taakkur khukarthil rapya yani hanui kallengne sheembaang-sabaangthurou.

⁵ Miram-mithrillei thimi rapne naiyei yaorul rapya silpirou; ramtangbi klei Keiyei thimi rapne naiyei lou khuipirou, heirou naiyei darkha yekul rapya trunmthai thimirap khoine leirouwa.

⁶ Heiya nayari Umpuei thimkhuirap toubine ungrouwa, heitoubi nayari kai Dunpuei shikrap toubine min thulpirouwa. Heirouri nani tlaipang lim rapbei lalthum rapya chamairouwa; heirou yaiyei lalthum rapya naiyei tangchana bom hoirouwa.

⁷ Heirou nani rikrai phawurkhounei rungkhlangra siruk-khni duini pharou, heirou naya lhawai klahni nangyerwurkhounei rungkhlangra nanungei hakrao-nungkngai hoiyerrou. Heinung'tlim nani naiyei ramra siruk'khintam thukni phaeirou, heirou klui naimakei hakrao-nungkngaiyo touri nanungei leirouwa.

⁸ Kouweiyo toulanungri, Umpu Keiri chimmei picharya pam, heitoubi Keiri muchanei lhouya heirou klalyei lhoutouya machinkna. Heirou yaiyei phabom thukya Keine ukning khyingni pirou. Heitoubi Keine yanungei klui naimakni tlou mardingrilbi khoupirou.

⁹ Heirouri yaiyei yu-cha rapri limdei rapbei hangra shak mupirouwa; heirou yaiyei chanao rapya thimi rapbei hangra yaiyei min charouwa. Heirou yaya mukur thimi rapne ya rapri Umpu Keine phor pikur yu-cha rapme toubine ningmuchirouwa.

¹⁰ Umpuei bomra Keine hakrao-nungkngai hoirou; heirou Keiyei solungni Dunpuya chouni mathumbaangrou. Kouweiyo toulanungri Ane Keiyari nu ruirou kyou kartlangani parrui hukbangbi kansamkur heinakni Ralthutpina Bomya phi'up naksi upbangpiwurla; heitoubi shal dunrou kyou nangakani sina-khrulni mansamkur heinaksine tharmu chim shambni lhomphopburla.

¹¹ Kouweiyo toulanungri thleini heengtrung-ramtrungya katpukthutyer heinaksine, heirou yekulni watuklhakur trunwai lungrap katpukthutkur heinaksine, Umpu Dunpune tharmu chimle; mathangnei lhouya kathukyerrou, heisitoubi limrap nammaei maibongra kathukyerrou.