ISAIAH 57 - KHYINGEI PU'TLOU Bible (BSI)

Israel Rapbei Thrailha Khrumkurya Yanimakni Samkur

¹ Tharmu chim thimini maanguryei kheenrouri hunikhi lhou hoipimaklei, heirou lhawaira lhuk thimini lheiyuranung hunikhi phab dapimaklei. Kouweiyo toulanungri khying thimiyari lhangaimak thuithina hangrouwei louthutloulei.

² Heitoubi ani kyingei bira wachangbine, tharmu chim thimi raple kalhonne kyingei rkhum doura mathrilbine leiwurlei.

³ Heiya thuitou thimi rapbei chanaorap, heirou sharungya yorbi chorit naimak thimiyei chanaorap nani bi arou knakni wachangalo.

⁴ Nari huya kallaochabi kleiyo? Heirou naiyei malei ronthutbine heirou taka aangbine huya laoknawo? Nari mandalbi, Umpuya raal'kyou thimi rapbei chanaorap nimako?

⁵ Naitamei ukningra thrailha heinung'tlim mei'kaang naksine kaangyerbi heengyao hangei bok'heeng trung holi kantangra khrumkhoulei, heitoubi naiyei chanao rapya phaikarei thlungkhan daakra hatbine malamput khoine makatkhou nimaka?

⁶ Heirou phaikarrei thlungbut rapya nani khulloubine, heitoubi heirapbei doura nani tulkhying bunsundabi, heitoubi heirapnungei nani trunwai lung rapkhi makatbine khrumkhou nimaka? Heinung'tlim Keine naya malung-khrahrou manthako?

⁷ Nane chouna lhunglim-mollim dou kantangrakhi rkhum sheemkhoulei, heitoubi nani heinaksi lhungdoura kakabine naiyei chanao rapya malamput khoine makatrillei.

⁸ Heirou nani cheemkhar kalleyei bomthora thrai khrumna bikhi sheemkhoubine, heitoubi Keiya malumwurkhoubi naiyei rkhum doura hakthil hangwalni neitulchabine leiyura. Heitoubi naiyei rkhumkhi toumaryabine, chungwani ipmalnayernungei man lhikrilbi leiyura; heitoubi ya raple yakantlangrilbi leiyura; yaiyei rkhum doura hakthilni klei heiwaya mulhakbine maduphabi ipmalnaniyura.

⁹ Heirou Krung Molech'ne louthiyeinung lhangainungei toubi nani shirek muiknam mrohya teiphaangbine wachangura. Naiyei paocha thimi rapya nangni tlatnara yilbine malhetdurla. Heitoubi yaya Sheol'ra yongchangyerwurla.

¹⁰ Nai rongchanyei lamtla shaangachaknei lahwuranungkhi, naneri, “Awari koukhi karshukmak,” toubine yunkhoumaklei; heirou naiyei rongchanni rannei mantrangya phawurla, heitounei ngamrou nari lahwurbi kanellhakur toukhi maklei.

¹¹ Nane huya ningchibi lhawai klahni Keinungei mandalya yunkurawo? Keiyakhi ningthutmakni, heirou nani Keiyei ngamrou koukhi khalsundapimakri koutounei? Keine kheen tlani koutloukhi yunpimakni kanthrampikur nimako? Heitounei ngammei nani Keiya chimakurako?

¹² Naiyei lhangaime toule heirou naiyei lhou rapya Keine paothutpirouwa, heiya heiwane nanungei karshukyermakarou.

¹³ Nane trungpina'nungei ungphayeinung, naiyei mallongkhou thrailha rapne naya kalpilaksu! Heiya thrailha rapya martheene namyerwa shatrailourou, heirou nilsoni yaya koukhi karshukmakni shalouheirou. Heiya Keiya malungambi Keinungei loukallekur thimi rapri ram heirou yuldabi paalrouwa, heitoubi Keiyei Khying Lhungdoura ram kalchangrou.

Trungpina'nungei Kantompi

¹⁴ Heirou asitoubine yunheirouhui, “Sabaanglaklo, sabaanglaklo! Lam loumarshiklaklo! Heitoubi Keiyei thimi rapbei lamtlunya taponkna rapya louthutdurbi marthinglaklo.”

¹⁵ Chounara mathumbangkur thang'allei Pu, klui naimakni ringbi klei, Aiyei minri Khying toubine ung Pu khatni asitoubi yunlei, “Keiri chouna ram, Khyingei bira leibine, heirou ukning hungbine ukning khnimni heirou lhawai klahyei klei thimi raple kalhonne, lhawai klah thimi rapya ukning thoubaangpinanungei, heirou ukning hungkur thimi rapya thoubaangpinanungei leiphobpilei.

¹⁶ Kouweiyo toulanungri Keine kalleng-kallengne mral theibaangpimarou; heirou kheenserou malungkhabidik leimakarou. Kouweiyo toulanungri tlaipang thimini Keiyei maibongra lhawai lahwurbi kanelhakurkhi kya; heitoubi Keiyei lhakpikur lhawairi hikurkhi kya.

¹⁷ Yane ukning hyingmakni tungchaya raphawurnei ngamrou Keine yaidoura malungkhakur, heitoubi yaya tanti piwurkhou. Keine malungkhawurbi Keiyei mairung yulkhoukur; heirouri yani mai khreiwurbi yai ukningrei kningya hilthungni lhangaimak lamra heisi chabine leikur.

¹⁸ Heirou Keine yai lamya mulhakwurla, heiya Keine yaya damyerpirou; Keine yaya lam ruipirou, heitoubi lhawaini kanrel thimi rapya Keine malung damyerpirou. Heitoubi yaiyei murpalni Keiya mathangyerou.

¹⁹ ‘Malungdam, malungdam hoiniyasu, knakei klei thimi rapnungeikhi heirou tlatnara klei thimi rapnungeikhi kying hoiniyasu,’ toubi Umpune yunlei, heirou Keine yaya malung damyerpirou.”

²⁰ Heiya khril lhangaimak thimi rapri mathumchakur samadrurei yuilhou naksine kyingni trimkur toukhi naimaklei. Heirou aiyei yuilhou rapri thleibul yuile shitnruile kalhonne mathumfletdurlei.

²¹ Khril lhangaimak thimi'nungeiri kyingtou naimakrou, toubi Umpune yunlei.