ISAIAH 54 - KHYINGEI PU'TLOU Bible (BSI)

Klui Naimak Kyingya Mardingpi

¹ “Hakrao-nungkngaini laa shalaklo O khungurbi cha pommakpi! Naopuknei manshan kna doukhoumakpi nangri langthouni ungraobi laa shalaklo; kouweiyo toulanungri shal dunmakpini shal kleiwiya duinikhi nao pukroume,” toubi Umpune shunpilei.

² Naiyei khuiluphiyei cheemmun toumaryalak; heitoubi khuiluphi heiwaya lhebphopmakni thikmherbi toupaklak, churphopbine khoumak; heitoubi naiyei ruifret rapkhi thikyengbine toushaanglak, heitoubi heirapya msuiphopna chuk rapya chetni yemphoplak.

³ Ngamri neiyei ramri thyoi lhangrakhi heirou thya lhangrakhi tonmaryaeirou. Heitoubi neiyei yu-cha rapne lim rapbei doura kulchalbine yul daheirou. Heitoubi yani yul taakkurkhouna bi raprakhi yul dalhakbine palleirouhui.

⁴ “Chimaklo, kouweiyo toulanungri naya rikrai phayermakrou; heirou nai ukning kanthritdurmaklo, ngamri naya maitheekhi phayermakrou. Heiya naidouwei rikrai phawurkhou heiwaya nani malumrouwa, heirou neiyei shal hiwurbi trulmei hoiwurnei rikrai douwurkhou heiwakhi ningthutmakarou.

⁵ Kouweiyo toulanungri neiyei shalri neiya Sheempi Pu heiwari; Aiyei minri Thangwan-Shimleiyei Pu toubine ung; heirou neiya kalthutpi Puri Israellei Khying heiwari. A heiri tlaipangpal namyerwaei Dunpu toubine ung.

⁶ Kouweiyo toulanungri Umpune neiyari shalne khingurkhoubi lhawai klahni leinarei ungloupikur nu naksine, heirou kartlang douwa khatni nu loulhaktirnung karkhaiwurpi nuya ungmallengpithu heinaksine neiya unglhakpilei, toubi neiyei Dunpune shunpilei.

⁷ Kouweiyo toulanungri kheen lepchaeinung Keine neiya khingurkhoula, heiya beimak kringpi'kheile kalhonne Keine neiya ungmallengpithurou.

⁸ Malungkhawurbi kheen lepcha Keiyei mairung neirouwei yulkhouwurla, heiya klui naimakei kringpikhei heiwane neidoura Keine malungshi khoupirou,” toubi neiya Ralthutpi Pu Umpune shunpilei.

⁹ “Kouweiyo toulanungri awari Noah'yei chaanrou yuitang thukwurkhou naksilei. Heitoubi kheen heirou Keine tlaipangpalya yuitangni tekkhi dumyerkhoumarou toubi kantomkhou heinakni, Keine naidoura tekkhi malungkhamarou heirou samkhi sampimarou toubine kantomwurla.

¹⁰ Kouweiyo toulanungri lhungdou rapkhi touchutkur kya, heirou lhungpumcha rapkhi maangyerkur kya, heiya Keiyei malungshi-kringpikhei heiwari neidourei kouniroukhi louthutkhoumarou. Heirou Keiyei neidouei kantompikur kying heiwakhi kouniroukhi kanchekbi chutkhoumarou,” toubi neidoura kringpikhei Umpune yunpilei.

¹¹ “Thuithikur yuilhouni thumfletchabi nungkngaikhi phamakni klah-mrimni norwurbi klei O Khulil, thilak, Keine neiyei raalpal thlung rapri manklu turquoise thlungkwaar rapne sabaangpirou; heitoubi neiyei cheemmunkhi sapphire thlungkwaarni thulbaangpirou.

¹² Heiyakhi duinara neiyei raal'daang rapkhi Keine ruby thlungkwaar mrao rapne sabaangpirou; heirou neiyei palshung rapkhi lhim kmu thlungkwaar rapne Keine sabaangpirou; heitoubi neiyei raalpalrap namyerwa heikhi thlungkwaar rapne sabaangpirou.

¹³ Heitoubi neiyei chanaorap nammaya Umpune shunmtupirou; heirouri yarap heiri kyingni tangbaang-choubaangeirou.

¹⁴ Tharmu chimna bomra neiya phunbaangpirou; heitoubi neiyari marhotnarei tlatni khoupirou; kouweiyo toulanungri nangri koukhi chimakarou, heirou thuithiyei raal younarei neiya theithutpirouwa; heirouri neipongra koukhatkhi wachangmakarou.

¹⁵ Kounakpi thimi hukounak khatni toufyoubi neiya norlanungri, heiwari Keirouwei kyou nimak; heirou hukounak khatni neiya karhani raal dalanungri ayari maithee phayerrou.

¹⁶ Thilak, pungyapbi meihal toupopkur lhangsa heiwari Kei'mshane sheemthutkur. Heitoubi aiyei thir sheemnarei hutshuya sheemthutbi malloyerlei. Heinakrimni deekbai thukyernanung maangkyer thimiya Keine sheemthutpikur.

¹⁷ Heineri neiya karhani hutshu sheemthutkur rapri khadthakhi karshukmakrou; heirou picharyei bomra neiya sowal toubi kyun thimirap nammari nangni klal dayerheirou. Awari Umpuei shik rapne phabomthuk cheem-keiyei siruk hoirou; heitoubi yaiyei raal maniyo tou heiwari Keirouwei yongrou,” toubi Umpune paothutbi kallangyerlei.