ISAIAH 51 - KHYINGEI PU'TLOU Bible (BSI)

Dunpuei Phoryei Lalkei

¹ “Keiyei kyunya louningpilaklo, tharmu chimya hulcha thimirap, heirou Umpuya rapha thimirap na namma. Thilak, naya phonglouna bi thlungtumya thilak, naya touloueina thlungkhan purya thilak.

² Nai patar Abraham'ya thilak, heirou naya klah-mrimni pukpikhou Sarahya thilak. Kouweiyo toulanungri Keine aya ungei kheenrouri aitam'tomngei, heiya Keine aya phor piwurbi heitoubi aiyei yu-cha rapya chungyerpikur.

³ Kouweiyo toulanungri Umpune tanghakpani Zion'ya nungwaiyerpirou, heirou aiyei rilla mang-taakkur birap namyakhi Ane thrilpibi markumbangpirou, heitoubi nungwaiyerrou. Heirou aiyei ramthing ram rapya Ane Eden naksine hoiyerpirou, heirou aiyei shitnrui ram rapya Umpuei yekul naksine hoiyerpirou. Heirouri hakrao-nungkngai heiwari airouwei pharou. Heirou mathangnei nungkngaiyei laa shanei houni thim'rouwa.”

⁴ “O Keiyei thimirap, Keiyei kyunya louningpilaklo! Keiyei limrap, Keiyei tlouya khminni ninglhakpilaklo. Kouweiyo toulanungri Keirouwei chaytlou shamthutpirou, heirou Keiyei tharmu chimmei pichar heiri thimi rapbei kwaar hoinarouwa.

⁵ Keiyei tharmuei ayilri yennakura, heirou Keiyei Ralthutpinei lhou heiwari pithutdurla; heirou Keihutni thimi rapya pichar toubine paalrouwa; samadru ruirei thimi rapne Keiya karngeibine leiyura; heirou Keiyei thrungpikurya yani malungamni karngeibi leiyura.

⁶ Nai mitlungni nungthoura mangalthilak, heitoubi thleira yukthilak; kouweiyo toulanungri nungthouri meikhunakni kanchairouwa; heitoubi thleikhi phichun naksine cheetdurheirou; heitoubi heiyei doura paalbi klei thimi rapkhi heinakrimni tranrul hikurnaksine hichirouwa. Heiya Keiyei Ralthutpinei bomri klui naimak-trim naimakni leithungrouwa. Heirou Keiyei tharmu chimmei lhouri baimakni leithungrouwa.”

⁷ “Tharmu chimya kmu thimirap, Keiya louningpilaklo; heirou ukningra Keiyei chaytlouya hilchanthung thimirap, Keiyei kyunya ninglhakpilaklo. Thimi rapbei lhangaimak kyunya chimaklo, heirou yaiyei khremknaei kyunya ningchiwurbi rikraiwurmaklo.

⁸ Kouweiyo toulanungri yayari rmutni phichun shaitlumkur heinaksine shaitlumrou, heirou khlungni yaakhmulphi lettlumkur heinakni lettlumrou. Heiya Keiyei tharmu chimmei lhouri klui naimakrou, heirou Keiyei Ralthutpinei lhou heiri thimi chaanserreinung hoirou.”

⁹ Kanthouwalo, kanthouwalo, O Umpuei Ban; naiyei mantrang yuk-kantrumlaklo! Bongeinakni mantrangyerlaklo, heirou youkur chaanyei'naksine yuk-kantrumloulaklo! Rahab'ya har-har umchaalkur heiri Nang nimako? Heirou samadru rillei chingyaaya thunkalleikur heiwari Nang nimako?

¹⁰ Maryakur samadru tlairei yui heepyerkur heiwari Nang nimako? Heirou yukna samadruya yui taryerwurbi, heitoubi kalpikur thimi rapya raalthutyernanungei lamtlun sheempikur heiri Nang nimako?

¹¹ Heineri Umpuei Lhukthutpi heiwari yenkallengthueirou; heitoubi Zion'ra hakrao-nungkngaini ungraochabine yenkallengthurou. Heirouri klui naimakei langthou heiwari yaidoura yongdaeirou. Heirouri yani nungkngai-hakrao hoiwurbi, lhawai klah heirou rikrai phakurtou heiri yanungei makrouwa.

¹² “Keine, Keihakpani neiya malung damyerpilei; heiyanungri louhtrung naksine yenrambi hiwurou kyou thimi rapya chiterkur thimi nangri huwo?

¹³ Heineri neiya yuksheempi Pu, Thangwanya sheempibi thikmherkur, heirou tlaipangpallei cheemmunya phunbangpikur Umpuya ningmalumkur thimi nangya huwo? Neiya marhotkur thimini neiya mangyerrou nakrimni thuithini toupikur heiwaya kheenserou chikaryombi klei thimi nangya huwo? Heiya marhotpi thimi rapbei thuithiyo touri koura leileiyo?

¹⁴ Raal manloubine thirrui msuiphopbi klei thimiya khrangni malhetthutpirouwa; heiyanungri a heiri khur rilla dalhakbi hilhakmarou, heirou aiyei mumtolkhi kwattou naimakarou.

¹⁵ Kouweiyo toulanungri Keiri samadrurei yuilhouya toufyoubi hou lungkyer Pu Dupume. (Thangwan-Shimleiyei Pu Umpuri Aiyei min).

¹⁶ Keine neiyei murra Keiyei tloulhang rapya lhakpiwurla; heitoubi Keiyei sha daakra neiya loumallepibi yulkhoupiwurla. Thangwan rapya thikmherna'nungei, heirou tlaipangei cheemmunya thulnanungei, heitoubi Zion'ya, ‘Nangri Keiyei thimime’ toubi yunyernanungeime.

¹⁷ Neitam fyoubi kanthouwalo; Kanthouwalo, O Jerusalem! Nangri Umpuei hutrei Aiyei malungkhanei daarkepya mongmliploulame; nari mlipbachaknei lu ngaowurbi kanelhakurbi kanthouchang'makni tulpe ramphaya chikshiploula.

¹⁸ Jerusalem'ri aiyei yukpukkur chanao rapbei hangrei hukhatnikhi aya lam ruipirou yaomakura; heirou aiyei yuktangpikur chanao rapbei tlakrei hunikhi aya hutbangra churbine taangchapirou thimi yaomakura.

¹⁹ Anaksi klah-knang khintamtam kanthrinni neidoura khnui thukni yongdawura; huni neinungei heinung'tlim klah-kanrelpirou? Butaamle, raal-shon'ne deekbai thukbi maang-taakkur kheenrou Keine koutoubi neiya malung damyerchangrou?

²⁰ Neiyei chanapawa rapri kanelwurchiya, rchaoni chaangra manwurbi karpankur heinaksine yari khullamei lamso kantangra neilhakbi leiwurchiya. Umpuei meithukei malungkhakur heiri yaidoura leiyura; naiyei Dunpune shamwurpila.

²¹ Ngam heineri kyun awaya louningpilaklo, marhotkur Jerusalem'rei thimirap; tul mongma'nungkhi mlipkur thimirap;

²² Aiyei thimi rapnung'tlim mayungpi Pu Umpu naiyei Dunpune asitoubi yunlei, “Thilak, naya mlipyerbi kanelkyer daarkep heiwari nai hutrouwei Keine louthutdurla; heirou Keiyei malungkhanei daarkep heirouwei nani kouniroukhi hanui kallengne mongkhoumarou.

²³ Heiya daarkep heiwari naya, ‘Loukunlak, heiyanungri kani naidoura karwaicharouwa,’ toubi yunbine naya marhotkhou thimi rapnungei Keine chay pirouwa. Heisitoubi yani naiyei namkal rapya thleimai naksine hoinayerkhou; heirou yani naya khullam naksine tatpakbine karwaichakhou.”