ISAIAH 46 - KHYINGEI PU'TLOU Bible (BSI)

Babylon'yei Thrai Lharap

¹ Bel'ri kunlhakura, heirou Nebo'ri shikhuplhakura; yaiyei thrailha rapri gadha raple halpa rapbei namkal doura marpeibaangurchila; heirou yaiyei urchakur putkhrit rapri yaa rapbei namkal doura nanbangurbi putkhrit hoinawura. (Yaiyei thrai rapri yaalha raple hal'lha tomngeiya. Heirou yaiyei thimilha rapri yanungei putkhrit khoine urchakur heiwariya; heirapne thimi rapbei lhawai lahkyer putkhrit hoinawurla.)

² Yari shikhuplhakurchiya, heirou yari pulni kunlhakwurchiya. Yari yaitamei putkhrit heirouwei kartleikur manimakura, heiya yaitamni kulrilla pulni chalphopnungei urloukhei heinaksiyura.

³ “Keiya louningpilaklo, O Jacobei cheemmai thimirap; heirou Israellei himaleikur thimirap na nammakhi louningpilaklo! Naya nuwiyei ukwaira urkanthoutirrei waiyoubi Keine naya thikulbi ngaaksilkhoupi, heirou naya pukthuttirrei waiyoubi Keine naya urchakhoupi.

⁴ Heirou nane kat'upakur kheenrou rampha Keine thikulpirou. Heirou nane yentarbi truk pukyei kheenrou rampha Keine naya pochapirou! Keine heinaksiya toupiwurkhoula, heirou Keine heisi toupiheirouhui; Keine naya urchapiwurkhoula, heirou Keine naya kalthutpirou.

⁵ “Nane Keiyari hule thimalkna? Heirou Keiya hule malna'kyer? Keiyale hule marhilkna? Heirou hule markhe'kril?

⁶ Kaorei sina khrupmubi, heirou lapathirya khalra holbine, heitoubi sina lhangsa neekbine heirapya thrailha sheemthutyerkur; heitoubi yane heirapbei maibongra shikhuplhakbi khrumkur thimi raple marhilnako?

⁷ Heiwaya lhabangra chungbine urchalei; heitoubi yane heiwaya aiyei bira dunkhoubi mayungyerlei. Heiya aiyei birouwei tekkhi kanchekchamaklei, heirou thimi napung-khatni ungraochani heiyunbikhi, ari koukhi loumallangmaklei; heirou heiwini yaiyei klah bomroueikhi kalthutpikur manimaklei.

⁸ “Awaya ningthutbi malummakni khalsundalak, O raal kyou lamdui thimirap; heitoubi nani malummakni ukningra ningchabine khoulak.

⁹ Youkur kheen kounakei maibongra kou thukwurkhou touri ningthutlak; kouweiyo toulanungri Keiri Dunpu, heirou deiri hukhatkhi mak; Keiri Dunpu, heirou Keinaksi Dunpuri dei hukhi mak.

¹⁰ Kyou'rouweine hungdongna phani, bongei waiyoubi tekkhi touthutkhoumak lhou rapya Keine shunthutbine asitoubi kyun, “Keiyei mantrangkur lhouwai heiri heisi hungthukyerrou, heirou Keiyei toukni heiwari heisi touthutrou.”

¹¹ Kulkung lhangrei metu'an kmai langteya waaya ungthutkur heinakni Keiyei mantrangkur thimi rapya tlatna ramrei yen'unglhakrou. Heitoubi Keiyei yunthutkur tlou rapya suimakni Keine hungthukyerrou. Keiyei manrangkur heiwari Keine suimakni touthutrou.

¹² “Napaltha thimirap, nane Keiyei kyunya louningpilak; ngamri nari tharmu chimmei lhouroueiri beimakni tlatdura.

¹³ Tharmu chimmei lhouri Keine knakni yenlhakpirou, tlatni khoupimakrou; heitoubi Keiyei Ralthutpinei lhoukhi karyimyerbi toutheelpimakrou. Heirou Keine Zion'ra Ralthutpiya yenpirou; heitoubi Israel'nungei Keiyei thang'al hoiyerrou.”