ISAIAH 45 - KHYINGEI PU'TLOU Bible (BSI)

Cyrusya Umpu ei Hutshu Hoikyer

¹ Umpune Krungbom lhakpiwurkhou Cyrus'ya asitoubi shunkur, Keine aiyei thyarei hutbangya churloubi, lim rapya aiyei maibongra namsundayernanungei, heitoubi Krung rapya namdeeknanungei, heitoubi aiyei maibongra palshung-shumtrum rapya laatbine khounanungei, heirou palshung rapya thungphopmakni khounanungei;

² Keine neiyei maibongra louchabi heitoubi lhungbung khok-khakna rapya toumalnapirou; heitoubi yaiyei lapathir shumtrum-cheemkhar rapya Keine nangchaalpirou; heitoubi thirpummei hangchei rapya namkhrombi deekyerpirou.

³ Keine neinungei mehna'daakrei klei lalthum rapya, heirou muphamakna bira muni klei lalthum rapya piyeirou, heiyanungri Keiri neiya mintlangbi ungpikur Israellei Dunpu Umpume toubine nangni mueirou.

⁴ Keiyei shik Jacob'nungtlim heirou Keiyei khalthutkur Israelnung'tlim, Keine neiyakhi mintlangbine ungthutkura. Nangni Keiya shak mupimanungkhi, Keine neiya rikrai khrumknaei minthulya piwurla.

⁵ Keiri Umpu, heirou dei hukhi mak, Keiya duinara thrai deiri hukhatkhi mak. Nangni Keiya shak mupimanungkhi Keineri neiya mantrangyerpilei.

⁶ Heiyanungri kulkung'rouweine kulrel waphani klei thimi rapne mupharouwa touri Keiri Umpu, heirou Kei nimakni thrai dei hukhatkhi mak.

⁷ Keine kwaarya sheempi, heirou kmehyakhi sheempikhou. Keine kyingkhi yenpi, heirou thuithikhi sheemkhoupi. Heirap nammaya thukyerkur heiri Umpu Keime.

⁸ “O Thangwan ram, thaklhangrei yuklaksundapilaklo; heirou nungthourei rameini tharmu chimya shungsundapilaklo; heirou thleini taka kat'aangbi mayuklhaklaksu, heitoubi ralthutpiya hei khoine kat'heilaksu; heitoubi tharmuchim heikhi katpukthutlaksu; Umpu Keine heiwaya sheempikhoume.”

⁹ Aya yuksheempi Pule karhoukril thimi heinungeiri kounakei lhawai lah'kna.Yarapri thleibulrei sheemthutkur phubaihar rapbei hangrei harcha khatnaksilei. Thleibulni phusa thimiya, “Nangri kou touwo?” Nimanung, aiyei sheemthutkur phuwan rapne yuksheempi puya, “Nangri hutsakhi heimaklei,” toubine louyunrouko?

¹⁰ Aiyei pui-panungei, “Pawani kounungei keiya louringyerkhouwo? Nimanung, Nuwini keiya kouya tounanungei loupukkhouwo?” toubi kyun thimi heinungeiri kounakei lah'kna.

¹¹ Israelya sheempipu Khying Pu Umpune asitoubi yunlei, “Hungthukrou kyou tloubomra nani Keinungei Keiyei chanao rapbei ngamrou tlou ngaithi kyako? Nimanung, Keihutdei lhou tounara nani Keinungei shunmatu kyako?

¹² Keine tlaipangpalya sheempikhou, heitoubi heiyei doura paalnungei tlaipang thimi rapyakhi sheempikhou. Keihutni nungthouya mherpaakpikur, heitoubi heiyei thanglim rapyakhi sheempikhou.

¹³ Keine Cyrus'ya tharmu chimni lhou tounanungei khalbangpikhou, heitoubi aiyei lhouwairap nammaya ruichingpikhou. Heirou ani Keiyei Khulilya sabangrou, heitoubi Keiyei thimi rapya koumankhi yaomakni kullouwei malhetthutyerrou,” toubi Thangwan-Shimleiyei Pu Umpune shunpilei.

¹⁴ Umpune asitoubi yunlei, “Egypt'rei putthukrap nammakhi, heirou Cush'yei lal'holnei putcheirap nammakhi neinungei heilhakheirou, heirou Sabia rapkhi, tangchoumlam thimi rapkhi nanungei wachangeirou, heitoubi nanungei hoiyeirou. Yarapya thirrui msuibine naihilla heichanthungbi waheirou; heitoubi naya wakhrumcharou. Yane nanungei shunchabi tanghakpani Dunpuri nakou kalhonpilei, heirou dei huyakhi nimak; thrai deiri hukhatkhi maklei,” toubi yunheirouhui.

¹⁵ O Israellei Dunpu, Kalpipu; Tanghakpani Nangri mi hunikhi muphachangmak Dunpume!

¹⁶ Yarap nammaya rikrai phayerwurbi tamungyerheirou; heitoubi thrailha sheemthutkur thimi rapya rikraiyerwurbi toumanokrou.

¹⁷ Heiya Israelyari klui naimakni ralthutpikurle kalhonne Umpune kalpiwurla. Heineri neiyari klui naimaknungei rikrai phayerbi toumanokyermakrou.

¹⁸ Kouweiyo toulanungri Thangwan-Shimleiya sapi-sheempibi, heitoubi tlaipangya sheemthut-sathutbine heirou heiwaya koukhi karshukmaknung hangwalni sathutkur nimakni, lhangaini phunbaangkhoubi paalyerkhou Pu Umpune asitoubi shunlei, “Keiri Umpu, heirou Kei nimakni deiri hukhatkhi mak.

¹⁹ Keine awaya mehna ram bikhatra leibine muni kyunkhi nimak, heirou Keine Jacobei yu-cha rapnungei, ‘Karshukmakna bira Keiya raphalak,’ toubi yunkhoukhi mak. Umpu Keiri chimbilya yunrou, heitoubi tharmuei touyatom Keine kyun.”

²⁰ “Limdei rapbei hutrei himaleikur thimirap nani pulni kartilbi Keinungei hungchangalo; kouweiyo toulanungri yaihutra heengrei sheemthutkur thrailha rapya shinchabine, heirapne yaya kalpichangrou koukhi makpaya yani heisi shunchabi klei thimi rapri koukhi kmuchat nimaklei.

²¹ Paothutlak, heitoubi naiyei tlouthuk rapya heiurbanglak, heitoubi yani pulni kartilbi kartongrillaksu. Bongei youbi huni awaya nanungei loushunthutpikhou? Huni youkur kheenrou nanungei kallangyerpikhou? Heiri Umpu Keine nimako? Heirou Kei nimakni deiri hukhi makme. Tharmu chimkhi, heirou Kalpi Puri Kei nimakni deiri hukhatkhi makme.

²² Tlaipangpal wadongna phaei klei thimirap na nammani Keinungei kalleklhaklaklo, heitoubi kalpiya phalaklo. Kouweiyo toulanungri Keiri Dunpume, heirou Keiya duinara dei hukhi makme.”

²³ Keimshani tlou kantomwurla, Keimurrei yunthutbi kantomkur tloulhangri tharmu chimmei toubom, heiwari hangwalni kallengmakrou, touri khuklu kantangni Keimaibongra kanthrunchabi khrumrou, heirou malei kantangni Keimaibongra kantomrou.

²⁴ Yane Keinungei shunrou, “Umpuei bomratom tharmuchim heirou mantrang klei.” Thimi rapne Anungei wachangrou, heirou Aya malungkhapi thimirap nammari hillou rikrai phaheirou.

²⁵ Umpuei bomra Israellei yucharap namyerwaya chimyerpieirou, heirou thang'al hoiyerheirou.