ISAIAH 44 - KHYINGEI PU'TLOU Bible (BSI)

Dunpu Israelya Phor Pikur

¹ “Heiya asinungri, louningpilaklo, O Jacob, Keiyei shikrui; heirou Keiyei khalthutkur Israel!

² Naya sheemkhoubi, heirou nuwiyei ukwaiyei naokaora naya yuksakhoubi, heitoubi naya pangpirou kyou Pu Umpune asitoubi yunlei, ‘Keiyei shikrui, O Jacob, chimaklo! Heirou Keiyei khalthutdurkhou O Jerusalem, chimaklo!’

³ Kouweiyo toulanungri yuihatna bira Keine yui shungsundapirou, heitoubi thlei taarna ramra kung chanyerrou. Heitoubi Keine neiyei yu-cha rapbei doura Keiyei Lhawai shungsundapirou. Heirou neiyei chanao rapbei doura Keiyei phor yongdayerpirou.

⁴ Neiyei chanao rapne yuihangra tingtou naksine katpukthutrou, heirou kungpaal-yuiruira pukbi klei chanreel trungnaksine hoirou.

⁵ Heirou yaihangrei khatni yunrou, ‘Keiri Umpueime,’ heitoubi yaihangrei khatni aitamya Jacobei yu-chaei minya ungnarou; heirou khatneri aitamei hutbangra, ‘Keiri Umpuei thimime,’ toubi mayebangrou; heitoubi khatneri Israellei minya rikrai khrumpirou.”

⁶ Israellei Krung heirou aya Kalpipu, Thangwan-Shimleiyei Pu Umpune asitoubi shunpilei, “Keiri younakhi heirou dongnakhi khoi; heirou Keiya duinara dei Dunpuri hukhatkhi mak.

⁷ Heirou Keinaksiri thrai deiri huleilei? Heinaksi thrai leiyanungri Keiyei maibongra wathukbi paothutlaksu, heitoubi chimme toubine yunlaksu; heitoubi Keine lim rapya phunbaang waiyoutirrei thukwurkhou lhou rapya, heirou hillou hungthukrou kyou lhou rapya yanungei shunthutpilaksu.

⁸ Chimaklo, heirou lhawai lahwurbi khalchanamaklo. Bongei youbi Keine heirapya nanungei shunthutpiwurla nimaka? Nari Keiyei shakhi rapme; heirou Keiya duinara dei thrairi hu leilei? Nimanung Thlungtang dei leileihuiko? Keiri khathakhi mumaklei.”

Thrailha Rapya Khrumbi Karshukmaklei

⁹ Thrailha rapya sheemthutkur thimi rapri koukhi nimak, heirou yaiyei sheemthutbi khoulhakur putchei rapri yaiyei hutlha khoiyei klei rapkhi koukhi mit mumaklei, heirou koukhi ningmunei khyalkhi maklei; heineri yari yaitamni rikraiheirou.

¹⁰ Koukhatkhi karshukmak thrailha raple heirou thimilha rapya huni sheemthutkhou?

¹¹ Thilak, thrailha rapya sheemthutkur thimirap namyakhi rikrai phayerheirou; kouweiyo toulanungri heirapya sheemthutkur lhangsa rapkhi tlaipang thimithilngei; yarapri lokpa kartillaksu, heitoubi pulni mayungbi chi-kanchunni leilaksu; heirouri ya nammaya rikrai phayerheirou.

¹² Lhangshani chaiche shinbine meihal-khring rilla thir rousabi sherni sheemthutlei; heitoubi aihutra sek shinbine mantrang kleiyei'mkhei urthutbine rousakur thirmtumya umbine thimi lharap sheemthutlei. Heiya ani msulyei kheen heirouri mantrang yenchummura, heirou ani yuidingkhi mongmakni leiwurnarou katlahwura.

¹³ Heirou lhangsha khatneri heenglhou pangbi, heengra kolomni simanlha yekbine, heitoubi paichani yemkhakbi thimi lharap sheemthutlei, heitoubi lhangaini mansambangbi thrai-shangra dunkhoulei.

¹⁴ Heirou ani cedar heeng rapya, nimanung cypress heengrap, nimanung bok'heeng rapya heengyao hangrei pukbi klei rapya shaatlouheilei. Heitoubi ani sirek'heeng rapya lingpuklei; heirouri nungni yukroeinung heengtrung rapya heisi tangbaangyerlei.

¹⁵ Heirouri heeng rapya ani meiyuheeng hoinalei. Heisitoubi ani heengrap heiwaya tha shaatbine hongbi mei r'haibi lumkna; heitoubi ani heeng thayari chaak-an thungminkna (mumtol ngouminkna). Heitoubi heeng thayari ani thrailha sheemthutbine heirapya khrumlei, heirou heirapya yemkhakbine thimi lharap sheemthutbine heitoubi heirapbei maibongra sikhuplhakbine khrumlei.

¹⁶ Heitoubi heiyei lhang-khatyari ani meira iklhakbine hongurlei; heitoubi heiyei meidoura ani anchum roulhakbine touminrou, heitoubi heiwaya ukthoni bulmailei. Heirouri ani meira r'haiyei lumbine aitam ukningra kyun, “Aha! Keiri mei r'haiphanarou beimakni lummura.”

¹⁷ Heiya heiyei heeng ikmleikurap heiwari ani thrailha heirou thimi lharap sheemnawurlei. Heitoubi ani heirapbei maibongra kanellhakbine khrumwurla, heitoubi ani kyun, “Nangri keiyei thraime, keiya kalpilaklo!”

¹⁸ Yari koukhi mumak, heirou yari koukhi phab damak; kouweiyo toulanungri Ane yayari mitmai myemkhalwurla, heitounei ngamrou yani koukhi mumak, heirou yai solungrap heinikhi koukhi ningthutbi khalmuchangmak.

¹⁹ Heitoubi heinaksi thimi hukhatnikhi yai ukningra ningthutbi, heirou yai solungra relthutbine ningmukur touri yaomakura; heirou aiyei ukningra, “Keine heengrap heiya lhang'khat meira iklhakbi hongurla; heitoubi heiyei meihal rapbei doura chak-ankhi thungminwurla; heitoubi anchumkhi rouminbine mailouheila. Heirouri dei maleikur heengrap heiri machinkna thrailha rapya sheemthutbine, heinaksi heengtumrei sheemthutkur thimilha rapbei maibongra keine kanellhakbi khrumwurkhoula,” toubi hungningthutbi phabda toukhi yaomakura.

²⁰ Ari ut mrupbi klei naksine, aiyei tamungkur ukningni aya ruipheiloula, heineri aitamya kouniroukhi kalpichangmakrou, heirou ani, “Keiyei thyarei hutni shinphopbi klei awaya chimmakura nimako?” toubine yunchangmaklei.

Dunpune Israelya Kukpibi Lhukthutpi

²¹ Awaya ningthutlaklo, O Jacob, heirou Israel! Kouweiyo toulanungri nari Keiyei shik rapme. Keine naya sheempikhou; ngam heineri nari Keiyei shik rapme; O Israel, neiyari Keine malumkhoumakrou.

²² Keine neiyei borh rapya rameidang wankur naksine mathaiwurla, heirou neiyei borh rapya yuiramei kanchaikur heinaksine limthaiwurpila. Keinungei yenkallengalo; kouweiyo toulanungri Keine neiya lhukthutpiwurla!

²³ Hakrao-nungkngaini ungraolaklo, O Nungthou-thangwanrap; kouweiyo toulanungri Umpune lhourap heiwaya touthutdurlame. O Tlaipangpal thleidong rampha nanikhi hakrao-nungkngaini mathanglaklo; O Lhungdourap, nanekhi hakrao-nungkngaiyei houni ungraobi mathanglaklo, heirou O heengyaorap, heirou heengtrung rapnekhi ungraobi mathanglaklo. Kouweiyo toulanungri Umpune Jacobya lhukthutdurpila, heitoubi Israelnungei Aiyei thang'alya mutpiwurla.

²⁴ Neiya nuwiyei shul rilla sheempiwurkhoubi, heitoubi neiya Lhukthutpi Pu Umpune asitoubi yunlei, “Keiri Umpu, put nammaya Sheempi Pu Umpu. Nungthouya Keimshani mherpakbine thik-engpikur, heitoubi tlaipangpal nammakhi Keine mherpakurkhou.

²⁵ Mandalbi chimmak Pu'tlou shunthutpikur thimi rapbei hutlha rapya Keine toushuiwurbi kartlikyerrou, heitoubi meirui deekbi hillei hungthukrou kyou tlouya shunthutpikur thimi rapya Keine yuntlungmak dayerrou; heitoubi shingkhei thimi rapyari Keine hilkarshonyerbi, heirou yaiyei khyal-roushingei lhou rapya yuntlungmakei lhoura hungdongyerrou.

²⁶ Keiyei shikrui rapbei tlou rapya Keine chimni hungthukyerkhou, heitoubi Keiyei paocha thimi rapbei lhou rapya Keine lalyerkhoumak; heirou Jerusalemei ngamrou Keine asitoubi shunthutpikhou, ‘Ayari hanuikhi yul dayerthueirouhui!’ Heirou Judah'yei khukarthil rapbei ngamrou Keine asitoubi shunthutpikhou, ‘Ya rapyari hanui sabangthueirouhui! Heitoubi yaiyei deekbai thukwurkhou rapya Keine hanui khulkanthoupithueirou!’

²⁷ Awari Keine Samadruya, ‘Nangri yenheepburalo!’ toubine shunkur; heirou ‘Keine neiyei kung rapya yui heepyerbi taaryerheirou,’ toubine shunkur.

²⁸ Keine Cyrus'nung shunkur, ‘Nangri Keiyei yaoshilpu, heirou ani Keiyei watlhou rapya lhangai-karbilni toueirou.’ Heitoubi Keine Jerusalem'nung paothutpibi, ‘Awaya hanuikhi sabaangpithurou,’ heirou Pucheemnung, ‘Neiyei cheemmunri hanui kallengne thulbaangpithurou,’ toubi shunkhou.”