ISAIAH 43 - KHYINGEI PU'TLOU Bible (BSI)

Lhukthutbi Ngaaksilpi'nungei Kantompikur

¹ Heiya asinungri, neiya Sheempipu Umpune asitoubi yunlei, O Jacob; heirou neiya sapipu Dunpune asitoubi shunlei, O Israel! “Chimaklo, kouweiyo toulanungri Keine neiya lhukthutpiwurla; heitoubi Keine neiya minlhangbi ungthutdurpila; heineri nangri Keiyeime!

² Heirou nani yuitlaira kralni chawanungkhi, Keine naya kalhonpirou; Nane kungra rallanungkhi, nayari tuylhouya martlaobi dumphopburmakrou. Heirou nani meiwaira kralni chawanungkhi, nayari meini kaangurmakrou; meithlannia rampha naya leekloumakrou.

³ Kouweiyo toulanungri Keiri naiyei Dunpu Umpume, heirou naya Kalpipu, Israellei Khying Pume. Egyptya Keine naiyei rungkhlang khoine lhukthutna put hoiyerwurla; heirou Cush'le Seba'yakhi Keinungei naiyei rungkhlang silyerwurla.

⁴ Nangri Keiyei mit'thrilnarari manklu thimi hoiyabi, Keine neiya malungshini rikrai khrumpikhou; heitounei ngammei Keine neiyei rungkhlangra, neiyei rongchan heinung'tlim thimi deiya kartlengurla.

⁵ Chimaklo! Kouweiyo toulanungri Keine neiya kalhonpilei; Neiyei yu-cha rapya Keine kulkung lhangrei yenlhakpirou, heitoubi kulrel lhangreikhi yenlhakbine naya kartilyerrou.

⁶ Keine khaluya shunrou, ‘Keiyei thimi rapya lakurlaka,’ heitoubi khateya, ‘Yayari mankanpimakalo!’ toubi Keine shunrou. Keiyei chanao rapya tlatnarei yenlhaklaka, heitoubi Keiyei chanapuiya rapya tlaipangpal wadongna ramrei yenruilhaklaka!

⁷ Keiya minlhangbi ungkur thimi mapung-kantangya yenruilhaklak; kouweiyo toulanungri Keine yayari Keiyei thang'al hoinanungei sheempikhou, heitoubi yaya sathutpikhou.

⁸ Mitlung leirerikhi mitdeo thimi rapya, heirou khna yaorerikhi khnasit thimi rapya heiurthutlak.

⁹ Limrap nammani pulni kartillaksu; heirou thimirap nammani pungni kallonglaksu. Yaihangrei huni awaya paothutchangrou? Heirou huni youkur lhouthuk rapya kanungei yunpichangrou? Heitoubi yani heirapya chimhakme toubi hutlha mutpilaksu, heiyanungri ya deirapne loumayekbi, ‘Heiwari chim’ toubine yunlaksu.

¹⁰ ‘Nari Keiyei tloumayung thimirap,’ toubi Umpune paokallanglei. ‘Heirou nani mubi Keiya uklumnanungei, heirou Keiri A'hakme toubi nani phab dananungei, heirou Keiyei maibongra dei Dunpu hukhatkhi leikhoumakhui, heirou Keihillakhi dei Dunpu hukhatkhi leimakrou’ toubi muyernanungei Keine khalthutpikur Keiyei shikruirap.

¹¹ Kei, Keimshahakri Umpu, heirou Kei nimakneri Kalpipu dei hukhatkhi mak.

¹² Naihangra shak mumak thrai rapya khrumbongnung, heiwari Keine shunpibi muyerkhou, heitoubi kalpikhou, heirou paothutpikhou touri nari Keiyei shakhinung hutlha rapme” toubi Umpune shunthutpilei.

¹³ Keiri kyouroueini kalui naimakei louklei Dunpume, heirou Keihutrei lungloueikur manirouri hukhatkhi makme; heirou Keine lhou touthutyeinung hunikhi louthingbi toudongkur manimaklei.

¹⁴ Israellei Khying Pu, naya Lhukthutpi Puni asitoubi yunlei, “Nanungei'tlim Keine Babylon'ra raallui rapya heimalhetrou; heitoubi yaiyei palshung shumtrumrap nammaya nangdeeksundarou, heitoubi Chaldea rapya yaiyei lal holna mali rilla hakrao-nungkngaini ungraochakhou heiwaya kanrel-laashernei hou holyerrouwa.

¹⁵ Keiri naiyei Khying Umpu, Israellei Sheempi Pu, naiyei Krungme.”

¹⁶ Samadru kralni lamtang sheempi Puni, heirou thuithikur yuilhou doura lamtlun matputpi Puni;

¹⁷ heirou yeekna rapbei sapuk kaari rapyale sapuk rapya yenmanheibi, heirou hutmantrang lhouwa rapya maniwurbi hanui kanthou'changmak'nungei toudeekpikur, heirou meishar shumitkur heinaksine toumitdurpi Pu Umpune asitoubi yunpilei:

¹⁸ “Nane raalwurkhou lhouthuk rapya ningthutmaka, heirou khman lhou rapyakhi nani yukningthutmaka.

¹⁹ Thilak, Keine ran-rannei lhou rapya touthutrouwa. Lhourap heiri asinung hungthukbine leiyura; nani heirapya mumakhuiko? Keine ramthingra rampha lamtang khat sheem'rouwa, heitoubi shitnrui ramra rampha kung chanyerrouwa.

²⁰ Ramhangrei yoo-yaa rapnekhi Keiya mathangrou, yekshangrap heirou Ostrich waatang rapnekhi Keiya mathangrouwa. Ngamri Keiyei khalthutkur thimi rapne mongnungei Keine ramthingra yui thukyerwurla, heirou shitnrui ramra kungkhi chanyerwurla.

²¹ Heineri Keiyei hoinanungei sheemthutkur thimi rapne Keiya mathangnei laa sharouwa.”

Israel Rapni Shunningmakur

²² “Heiya O Jacob, nangneri Keiya ungphakhoumaklei; heinung'tlimri O Israel, naneri Keiya malethutdurlei!

²³ Nane Keinungei naiyei yao rapya malan putrap khoine hongbine makatkhoumaklei; heitoubi Keiyari nai makatput rapya makatbine rikraikhi khrumpimaklei. Keinekhi nayari makat putdei ruiput, heirou mrohkun makatnei ruiput rapya khritni khangbangbine putkhrit hoiyerkhoumaklei.

²⁴ Nane Keinungei tuy pibine khrim muiknam mrohkun lopikhou toukhi maklei, heirou Keinungei nani makat putrei anyao-shirek rapya heimakatkur toukhi naimaklei; heinung tlimri nani Keinungei naiyei borh touwurnei put khrityatom heikhangbanglei, heirou nani Keiyari naiyei klal lhou toukur heiwanetom lhawai lahyerwurlei.”

²⁵ “Keiri, Keimsha'hakni naiyei borh rapya Keinung'tlim namma kukpikur Puri Keime; heirou Keine naiyei borh rapya hanui kallengne ningthutpimarou.

²⁶ Naya chimyerpinanungei Keidoura sowal khingbanglak, heitoubi kani kartilbi yunrillase.

²⁷ Naiyei lamkri patarwani borh touwurkhoula, heirou naiyei lhou'urpu rapnekhi Keiya karhani lhou touwurkhoula.

²⁸ Heitounei ngammei Keine naiyei Khying Puwatlhouei pu rapya toumarmokrouwa; heirou Jacobei yu-cha rapbei doura kmang-deekbai thukyerouwa; heitoubi Israelya rikrai phayerouwa.