ISAIAH 41 - KHYINGEI PU'TLOU Bible (BSI)

Umpu ne Israelya Trungpinei Tlou

¹ Samadru ruira paalbi kleirap, Keiyei kyunya riechani louningpilak, heitoubi lim rapne mantrang phalaksu; yani maibong lhangra tonlhakbi Keinungei wachangbine yunlaksu! Heitoubi kani pichar tounanungei pulni wakartillase.

² Huni kulkung lhangrei napung-khatya toufyouwurbi, Aiyei tharmu chimmei Puwatlhoura yenlhakpileiyo? Ane lim rapya Aiyei maibongra yenlhakbine, heitoubi yaiyei Krung rapya namsundabi kulchalbi khoupiwurlei. Ane yarap heiyari Aiyei raalshon'ne rahui thukni hattumwurlei; heitoubi martheene chakerya saloukur naksine Aiyei malaa'ne trailouyerlei.

³ Yaya Ane hullouheibi heitoubi yaihoni tekkhi trumlhakhoumakna bira shuikngam yaomakni Ane yaya kulchalphopbi khoupiwurla.

⁴ “Tlaipang chaan kyou'rouwei ungthutbine anakei lhouya huni touthutkuro? Heiwari Umpu Keime, kyoukhi heirou kluikhi Keime.”

⁵ “Samadru ruirei ramrap nammani mulhakurbi chirilwura; heirou tlaipangpal wadongna phani kanthingura. Yane lokpa kartilbine Keipongra wachanglei.

⁶ Yane khatle-khatle trungpirilbi, heitoubi ai'aiyei teinao rapya ‘chimaklo!’ toubine thoulhakrillei.

⁷ Heisi toubine heeng-lhouchur thimi rapne sina-lhangsa rapya thoulhakpi, heirou sek shinbi thir ummallo lhangsani thir roushabi ummalkna lhangsaya thoubangbi shunpilei. Heirou thirsou lhangsanung shunlei, ‘Thirsounei lhou awari lhangai lhoume.’ Heirou thirmsui yemphop thiminung chutchamaknungei chetni yemphopnungei shunpikur.

⁸ Heiya, Keiyei shik Israel nangri, heirou Keiyei khalpikur Jacob, Keiyei palui Abrahamei shullamrei yu-cha nangri;

⁹ neiyari Keine tlaipangpal wadongnarei kalthutpi, heirou thleidongna ram'rouwei Keine ungthutpi, heitoubi neinungei shun, ‘Nangri Keiyei shokme, Keine neiya khalthutbi yapimakuri toumaklei.’

¹⁰ Nangri chimaklo, kouweiyo toulanungri Keine neiya kalhonpilei. Neilhawai lahwurmak, kouweiyo toulanungri Keiri neiyei Dunpu. Keine neiya mantrangyerpirou. Keine neiyari Keiyei thyarei hutni churloubine khangbaangpirou.

¹¹ Thilak, neidoura malungkhapi thimirap namma heiri tamungyerbine rikrai phayerrou; heirou neidoura karhani yanimak thimi rapyari koukhi nimakni maangyerrou.

¹² Neiya yeekna thimi rapya nangni rapharou, heiya nangni yayari raphamumakrou; heirou nangkou raal kardourilkur thimi rapri koukhi nimakni mangbine hungdongrouwa.

¹³ Kouweiyo toulanungri Keiri, neiyei thyarei hutbangya churphopbi ruipipu naiyei Dunpu Umpume; heirou Keine neinungei, ‘Chimaklo, Keine neiya trungpirou,’ toubi shunpikur heiwari Keime.”

¹⁴ Chimaklo, khlung shunnaksi mandi nangri, Jacob; Chimaklo, Israel thimirap; ‘Keine naya trungpirou; naiyei Kalpipuri Israellei Khying Pume,’ toubi Umpune paothutlei.

¹⁵ Thilak, asinungri Keine nayari ruitlairei cha'sphal makhana thruha kyao ran heengmtum khat hoiyerwurla; heitoubi nani lhungdoura kakabi yaya mnuisundarou; heitoubi lhungdourap heiri chaker naksine hoirouwa.

¹⁶ Heirou yayari nani martheera dawurouwa, heirou yaya martheene shatrailourou. Heirouri lhimnung-martheene shachekrouwa. Heiya nari Umpura hakrao-nungkngai hoirouwa; heitoubi Israellei Khying Puei thang'alri naiyei tangchana bom hoirouwa.

¹⁷ Kanring-kanwai, heirou tounaram mak thimi rapne yuiding raphalei, heiya tekkhi raphamumaklei; heineri yuikhatni yaiyei dangkhi taarwurchiya. Heiya Umpu Keimshani yaya lourulbi mallangpirou, heirou Israellei Pu Dupu Keine yaya khingurkhoumakrou.

¹⁸ Chouna lhungbung doura Keine yuina putthutyerbi kung chanyerrou, heitoubi phaitlairakhi Keine yuiput wathukyerbi kungrap yongyerrou. Ramthingya yuiphum holyerrou, heitoubi taarna ramya yuiput wathukyerrou.

¹⁹ Keine ramthingei shitnrui ramra cedar heeng pukyerrou, acacia heengtrung rapkhi, myrtle heengtrung rapkhi, heirou Olive trung rapkhi pukyerrou; heitoubi Keine shitnrui ramra juniper heengtrung rapkhi pukyerrou; heirou yarap nammale cypress heengtrung raple kalhonne pukyerrou.

²⁰ Heiyanungri lhouthukrap heiya mulhakbi ningmurouwa; heitoubi Umpuei hutni heirapya touthutkurme, heirou Israellei Khying Pu Dupune heirapya thukyerkurme toubi yani yai ukningra ningmubi phab darouwa.

Umpu ne Thrailha Rapya Shingkna

²¹ “Naiyei lhouthukya heimlanlhaklak,” toubi Umpune shunlei; “Naiyei chimyernei tlou kyitya heilhaklak,” toubi Jacobei Krungni yunlei.

²² Yaya yai thrailha rapya heilhakyerbi, heitoubi kou thukrou youleiyo toubine yaya paothutyerlak.Bongei thukwurkhou lhouthukrap heiri yani kanungei bei shunthutpilaksu; heiyanungri kani heirapya khalsundabine, heitoubi heirapne hillouri kousi hungthukleiyo toubine ningmurou, nimanung, hillou kou hungthukrouwo toubine kanungei shunthutpilaksu.

²³ Heitoubi hillei hungthuknungei lhou rapya kanungei paothutpilaksu, heiyanungri nari thrai rapme toubi kani naya uklumpirou. Heithilkhi nimakni, lhangaiya hoiyasu, nimanung lhangaimakya hoiyasu, touthutthilak; heiyanungri kani heiwaya mubine chi-mathunkurkhi kya.

²⁴ Tanghakpari, nari koukhi nimaklei, heirou naiyei lhou rapkhi koukhi karshukmaklei. Heirou naya khalthutbi khrumkur thimi rapri machinknaei lhouthillei.

²⁵ Keine khalu lhangrei hukhatya toufyoubi, ani hungthukura; heitoubi ani Keiyari kulkung lhangrei mintlangbine hung'ungeirou. Heitoubi ani Krung rapbei doura thleidang doura karwaichakur heinaksine ranchaeirou; heirou phuwan sa thimini thleibul tatmnuikur heinaksine tatmnuieirou.

²⁶ Huni kyourouei ‘kani munanungei’ toubi shunthutpiwurkhou leiyura? ‘Aiyei kyunri chimleime’ toubi kani yunnungei huni maibong lamkrini paothutpikur leiyura? Tanghakneri heiri hukhatnikhi shunthutkhou'makhui, heirou hunikhi paothutkhou toukhi makhui. Heirou hukhatnikhi neiyei tloulhang rapya mayekkhou toukhi makkhui.

²⁷ Zion'nungei Keine lamkrini, “Thilak, yaya louthilak,” toubine paothutpikhou. Heitoubi Jerusalem'ya, “Keine lhangaiyei pao-ur thimi khat yenmalhetpirou,” toubine shunthutpikhou.

²⁸ Heiya Keine thiyeikallouri, bi heirouri hukhatkhi louleimaklei. Heirou yaihangrari tlou sempipu hukhatkhi yaomaklei. Kounakpi Keine ngaithilanungkhi hukhatnikhi loumallangpirou yaomaklei.

²⁹ Thilak, yarap namma heiri chimmak thrailhathil, heirou yailhou rapkhi koukhatkhi karshukmakei lhouthillei. Heirou thrailha rapri koukhi yaomak martheenaksi hangwallei lhouthillei.