ISAIAH 40 - KHYINGEI PU'TLOU Bible (BSI)

Dunpune Israel Rapya Kalpikur

¹ “Nungwaiyerlaklo, nungwaiyalo, O Keiyei thimirap,” toubine naiyei Dunpune shunpilei.

² Marnimyei houni yunbine Jerusalemei thimi rapnungei shunpilaklo; heitoubi anungei ungraobi shunpilak, touri aiyei tanti heiwari hungdongura, heitoubi aiyei borhrap heiwari airouwei limwurbi louthutdurpila; kouweiyo toulanungri Jerusalemni borh touwurkhou namyerwa heinung'tlim Umpuei hutrouei ani khnui thukni tanti phawurkhoula,

³ Hou khatni ungraobi shunlei, “Ramthingra Umpuei lam khat lousheemlaklo. Heitoubi ramthingei shitnrui ramra kaiyei Dunpu'nungei lamtang khat laimthaibi loumarshiklaklo.

⁴ Nimna phaikarap nammakhi thulchoulaksu, heirou chouna lhungdourap heirou bungchourap nammakhi tousundabi nimyerlaksu; heitoubi khok-khakna thleimairap nammakhi toumanchemlaksu; heirou tung-tangna lhunglimrap nammakhi maryakur phaikar khoine toupaklaksu.

⁵ Heirouri Umpuei thang'alya kandangni mutyerouwa; heitoubi tlaipang sharungrap nammani thang'al heiwaya pulni mupharouwa. Kouweiyo toulanungri Umpuei murhakni tloubom heiwaya shunthutdurkhoula.”

⁶ Houkhatni asitoubi shunlei, “Ungraobi shunpilaklo!” Heirouri keine loukngai, “Keine ungraobi kouya shunrouwo?” Tlaipang sharungrap nammari loutrung naksi, heirou aiyei karyuikna thang-lhangaiyo touri ramhangrei parlim rapbei lhangainaksilei.

⁷ Umpuei nilsoni yaidoura shophangei kheenrouri loutrung-ramtrung rapne lepcha leikhoubi yentaarwurlei, heitoubi parlim rapkhi trulsundawurlei. Tanghakpani tlaipang thimiri loutrungnaksi.

⁸ Loutrung-ramtrung rapkhi yentaarwurlei, heirou parlim rapkhi trulsundawurlei, heiya kaiyei Dunpuei tloulhang rapri klui naimakni leirouwa.

⁹ O Zion, lhangaiyei pao-ur thimi, nani lhungbung chounara kakabi heitoubi neiyei hou chouweimkhei ungraolak; lhangai pao-ur thimi, O Jerusalem, nani chimakni ungraolak, heitoubi Judah'yei khukarthilya, “Naiyei Dunpuya thilak, arou leileime.” toubine shunpilaklo.

¹⁰ Thilak, Pu Dupune mantrangle kalhonne Aithimi rapbei doura thrungpinungei yongrouwa. Thilak, Aiyei churnei klahman heiwari Ane yenlei, heirou Aiyei tounungei lhou rapkhi Ale kalhonne yenlei.

¹¹ Yaosilpu naksine Aiyei yaorul rapya Ane silchapirou. Heitoubi Ane yaoshun rapya Aihutra markumlhakpirou, heitoubi yaya Aiyei malungpakra pombi khangchapirou. Heitoubi yaopui rapya Ane lhangaini ruichapibi thilhakpirou.

¹² Huni samadrurei yui rapya aiyei hutmaira holbi markhewurla? Heitoubi huni nungthouya aiyei hut-thongyengni lambi markhekur leiyura? Heirou huni thleirei rahuikun rapya shangphaira holmarkhewurla? Heitoubi huni lhungdou raple lhunglim rapya khal holbi khrit khangthikur leiyura?

¹³ Huni Umpuei Lhawaiya lam shunmandobi, heitoubi Aya tlousempibi shunmatupikur leiyura?

¹⁴ Ane hukou tlou kartongrillei, heirou huni Aya tlou sempibi shunmatubi phab dayerpila? Heirou huni Aya tharmu chimmei tlouya marnopilei, heitoubi khyal-roushingei tlouya shunmatupilei? Heirou huni Aya phab dananungei shunmatupilei?

¹⁵ Thilak, lim rapri yuikhangcharei yongdakur yuitah naksichalei, heirou ya rapri Aiyei khal holna cheirei popbi klei rahuikun heinakchangei. Thilak, Anungeiri samadrupung rapkhi rahuidang heinakchangei.

¹⁶ Lebanon'rei heeng rapkhi khrahpalla hongnungei romaklei; heirou heiyei ui-waa rapkhi makatput khoine pumni hongnungei romaklei.

¹⁷ Heiyanungri lim rapya Umpuei maibongrari koukhi nimaklei, heirou yarapri Aiyei maibongra marhilnabi koukhi karshukmaklei.

¹⁸ Heiyanungri nani Dunpu'yari koule markherillou? Nimanung nani Ayari koule malkname toubine marhilnarou?

¹⁹ Hutsakhei thimiyei sheemthutkur thrailha raple marhilnarouko? Heirou sina sa lhangsani sina lhopbangkur thrailha raple marhilnarouko? Heirou kulshan lhangsaei sathutkur khrul raple marhilnarouko?

²⁰ Kanring thimi khatni heinaksi makatput hoiyernanungei butmakrou heengya khalthutlei, heitoubi heiwaya thrailha sheemthutnanungei ani hutsakhei thimiya raphabine sheemthutyerbi chutmakni dunkhouyerlei.

²¹ Nangya mumakhuiko? Nangri mayekmakhuiko? Kyourouwei neinungei yunpimakhuiko? Tlaipangpallei cheemmun thulbaangtirrei waiyoubi nangri phab damakhuiko?

²² Ane tlaipangpal yertomei Krungbom doura ombine leilei; heitoubi heiyei doura paalbi klei thimi rapyari khaorul naksine hoiyerwurla. Heitoubi nungthouya phiyeng naksine myerpakbine, heitoubi heiwaya rilla leikya khuiluphiyei cheemnakni thikmherwurlei.

²³ Krungcha rapya Ane koukhi nimakni hangwalni toudongurlei; heirou tlaipangei picharpu rapyakhi koukhi karshukmakni hungdongyerwurlei.

²⁴ Yane marshenni linglhakhoulei, heirou yani marshenni tuklhakhoulei; heirou yaiyei marshenni tuklhak-linglhakhou heiwari ningnaimakni yrung yonglei; heiya Aiyei nilsoni heirapbei doura shophangei kheenrouri yarapri taarwurbi trullura; heirouri lhimnung-martheene heirapya sapultaar naksine shatrailoulei.

²⁵ ‘Nane Keiyari hule marhilkna? Nimanung Keile malknari hu leilei?’ toubi Khying Puni yunlei.

²⁶ Naiyei mitlung rapri nungthoura mangalbi thilak, heitoubi sorwarap namma heiri huni sheemthutkuro touri nani muleiko? Heirapya Ane waiknaini ruithutbine heitoubi ya nammaya ai'aiyei min thulbangpilei. Ngamri Ari toumani heirou mantrang klei, heineri heirapya khathakhi karkulmakni sheemthutkhoupi.

²⁷ “Keiyei lamri Umpune loumallewurla, heirou keiyei phabom thukri keiyei Dunpune manthapimakura,” toubi koutoubi yunkurawo, O Jacob? Heitoubi heinaksiri kounungei kyunno, O Israel?

²⁸ Nangya mumakhuiko? Nangri mayekmakhuiko? Tlaipangpal wadongphani Sheempipu Dunpu Umpuri klui naimak Pume; Ari lahkur toukhi naimaklei, heirou msewurbi mathrilkur toukhi naimaklei. Heirou Aiyei khyal-roushing heiwakhi thimi hunikhi lamphachangmaklei.

²⁹ Lhawai kanwang thimi rapya Ane mantrangyerpi, heirou mantrang shul thimi rapya Ane mantrang lhakbangpilei.

³⁰ Nangak-kartlang douwa rapne kanwangni lahwurbikhi, heirou kartlang douwa rapne msewurbi thuithini tapanwurbi kanellanungkhi;

³¹ Umpuya uklum thimi rapri mantrang ranya phaeirou; heirou yani malaangei sha yaapbine traibaangkur heinaksine kanthumbaangeirou; heitoubi yani chanrou, heiya klah naimakrou, heirou yani lamtla charou, heiya msekur toukhi naimakrou.