ISAIAH 34 - KHYINGEI PU'TLOU Bible (BSI)Lim Rapbei Doura Umpu ei Malungkha Pichar 1 Pongra knakni wachangbi ninglaklo, O Limrap; heitoubi khminni louninglhaklak, O tlaipang thimirap! Tlaipangpalkhi heirou heiyei doura paalbi klei chiwirap nammanikhi loumayeklaksu, heirou tlaipangpalkhi heirou heiyei putthukrap nammakhi louninglaksu! 2 Kouweiyo toulanungri Lim rapbei doura Umpuei malungkhakur heiri meithukura. Heitoubi yai raallui rapbei dourakhi Ane meithukni malungkhawura; heineri yayari Ane tlumni hattumwurla. Heitoubi yayari Ane tumne hatdurnungei pithutdurla. 3 Heisitoubi yaiyei khi'lhung rapri ramhangra khingthutrouwa, heirou yaiyei khi'lhung raprei chulkhrimkhi katnamthutrouwa, heirou yai heene lhungdourei kungrei tuyshun naksine kungsundarouwa. 4 Heirouri nungthourei Kinni, tangla heirou sorwa rapkhi yenmehrouwa; heirou nungthoukhi phoksho naksine khyopungrouwa. Heirou thangwanrei chiwirap nammakhi darkha yamrei na trulkur naksine, heirou khyudheeng nabo trulsundakur heinaksine trulsundarouwa. 5 Kouweiyo toulanungri Keiyei raalshon heiwari heene lupburbi mraowura. Thilak, heiwari Edomei doura pichar tounanungei yongdarouwa; heitoubi Keiyei klah dayerbi maangyerou kyou lim rapbei doura yongdayerouwa. 6 Heera lupkur Umpuei raalshon khat leilei, heiwari anyaole, yaopa rapbei heele, tlangpa rapbei heene lubphaangbi nalyolyolni papbura; heirou yaopaei makalrei anyaoni lhomphopbi leiyura. Kouweiyo toulanungri Umpune Bozrah'ra tangni malamput makatdurla. Heitoubi Edom'ra tangni hee danei lhou touwurkhou leiyura. 7 Heirouri ramrei halpa rapkhi yakou kalhonne hatrouwa, heirou halrul raple halpa rapkhi hatchokrouwa. Heisi toubine yairam heiwari heene dumphoprouwa, heirou yaiyei thleimai rapkhi anyaoni lhomphoprouwa. 8 Kouweiyo toulanungri Umpuei khlang lhaknanungei tlaini khat kartinbine khouwurla, heirou Zion'yei doura yarilmaknei ngamrou kumkhatrek Ane khlang lhakrouwa. 9 Heirouri Edom ramre kungbanrap heiri kungkhrong holchirouwa, heirou heiyei rahui kunrap heiri sinnukun naksine hollouwa; heitoubi heiyei ram heiwari kaangbine klei meikhur naksine hoichirouwa. 10 Heiyei mei heiwari masakhi-nunghangkhi mitkurtou naimakrou; heitoubi heiyei meikhu heiwakhi trimnaimakni kathukrou. Bi heiwari chaan khatrouwei chaan'khat phani taakyerbi lakurkhourouwa; heitoubi thimi hukhatnikhi ram heirouwei ralbine chakhoumarou. 11 Heiya makhao raple nunghog rapne ram heiwaya konmarekbine leirouwa; heirou tikini raple aak rapne ram heiwaya chakphopbine leirouwa; heitoubi Dunpune ram heiyei doura lamchei khingmarkhebine tamungyerbi koukhatkhi horkhoumakni hangwalni khingurkhourouwa. 12 Edomei ram heiyei yama-krung rapkhi hukhatkhi paalmakrou; heirou yaitam-yaimshani krungme toubine yunkna rapkhi, heirou yaiyei krungcha rapkhi makrouwa. 13 Heirouri raalpal kuikoolna raal-daang rillakhi thru-trung katpukthutrouwa; heitoubi raalpal kuikoolna khukarthil rapkhi thru yamni yamhuphoprouwa. Heitoubi birap heiri yekshang rapbei rabu hoinarouwa; heirou Ostritch waa rapbei leina bi hoirouwa. 14 Ramthingrei ramtung rapne bi heirou yekshang raple rorilbi karthangrouwa; heitoubi yraopa rapnekhi bi heirouwei khungbine yai palui rapya rungpharou. Moi, Lilith rapnekhi bi heirou trailhakbi yarekna bi khoine leirouwa. 15 Heitoubi bi heirou tikini rapnekhi rabu sheembine, heiyei doura waayui fyuibangbi, ophopbine shun keoyerrou, heitoubi yaiyei shadaakra okhalbine khoupirou. Moi, makhao rapkhi yaiyei pa rapkou kalhonne kanthrinni chubi chakmalnarou. 16 Umpuei Lailikya raphabine heiwaya pathilak: Yunthutkur tloulhangrap heiri khatchatomkhi kartlikmakrou; heirou hukhatkhi paang-tlungmakri yaomakrou. Kouweiyo toulanungri Aiyei murni heiwaya shunthutbine chay piwurkhoula. Heitoubi Aiyei Lhawaini yaya markumlhakurla. 17 Dunpune yaya likarsui thinanungei meirui khingthiwurla; heitoubi Aihutne yaya yerkhaiwurbi ri-taangkhaikhoula. Yane heirapya klui naimakni ramkalbi paalrouwa. Heisitoubi chaan khatrouwei chaan khat phani yani ram heirou paalrouwa. |
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
Bible Society of India