ISAIAH 3 - KHYINGEI PU'TLOU Bible (BSI)

Jerusalemle Judah'ya Pichar tou

¹ Kouweiyo toulanungri thilak, Thangwan-shimleiyei Pu Dupune Jerusalem'rei heirou Judah'rouei chamainung murchak heirou mongnungei yuidingya thulpikhounarei khintamrek louthutrouwa.

² Mantrang lhouwa rapkhi heirou raallui rapkhi, pichar pu rapkhi, heirou kar'ankmu thimi rapkhi, heirou yama upa rapyakhi louthutrouwa.

³ Raallui somngaei raallui pu rapkhi, heirou rikrai khrumkna yama upa rapyakhi, tlousempi pu rapkhi, heirou hutsha-khei thimi rapkhi, heirou thui-khei thimi rapyakhi louthutrouwa.

⁴ Heitoubi Keine kartlang douwa rapya yaiyei krung hoiyerrouwa; heitoubi douwa rapne yaidoura tlousempi pu khoine paalbi pichar touheirou.

⁵ Heirou thimi rapne norrilbi marhotrillou, palui khatni aiyei palui khatya, heirou cheemlhun khatni aiyei cheemlhun khatya marhotdeirou. Douwa rulni upa rapbei doura norheirou, heirou shul thimi rapne lilkhoi upa rapya rikrai khrumpimakrou.

⁶ Heiyei kheen heirouri thimi khatni yai pawaei cheemra aiyei teiya churmanbine: “Nangri linglikchul klei nimako? Heineri nangni keidoura ruipi pu hoipilaka. Heitoubi deekbai thukkur heirapbei doura nangni tlou sempirou da” toubine yunheirou.

⁷ Heiyei tlainirouri ani yanimakni: “Keiri naya tlousempi thimi hoichangmakrou, kouweiyo toulanungri keicheemra chanung-mainungkhi maklei, heirou linglikchulkhi koukhi khoumak; heineri nani keiyari thimi rapbei ruipipu hoiyernungei yamakrou,” toubine louyunheirou.

⁸ Kouweiyo toulanungri Jerusalem'ri thikmathuibi tapponloula, heirou Judah'ri kanelwura. Ngamri yaiyei tlou yunnara, heirou yaiyei lhou tounara Umpuya karhawura; heitoubi Aiyei thang'allei mithrilnara malungkhayerwurla.

⁹ Yaiyei mairungni yaimshaei mralya mutdurla. Heirou yani Sodom'nakni yaiyei borhya yulkhoumakni mutthutdurla. Yanung'tlim lah'kna hoilakasu! Kouweiyo toulanungri yaimshani yaitamei doura klah yenlhakurla.

¹⁰ Likarsui lhangai heiri yanungei hoirou toubine tharmuchil thimi rapnung shunpilak, kouweiyo toulanungri yani lhangai lhou touwurnei hei heiwaya chapharou.

¹¹ Khril lhangaimak thimi'nungeiri lhawai lanalei! Anungei likarsuithee hungdaheirou; kouweiyo toulanungri aihutne touwurkhou klahman heiri ani phaheirouhui.

¹² Keiyei thimi rapyari douwa rapne yaya marhot thimirap hoiyura, heirou napuiya rapne yaidoura pu khoine pallura. Keiyei thimirap, lam ruipi pu rapne naya lehni ruipheiloula, heitoubi nayari lam tamungyerwurla.

Dunpuei Pichar

¹³ Umpune Aiyei pichar birei kanthouwura, heitoubi Aiyei thimi rapya pichar tounanungei mayungura.

¹⁴ Umpune Aiyei thimi rapbei yama upa raple krungcha raple kalhonne pichar bira wachangura. “Ngamri nani darkha yekul rapya kontumwurchila, heitoubi kanring-kanwai thimi rapbei putchei rapne naicheemra thimni marpeilhakbine leiyura.

¹⁵ Keiyei thimi rapya marhotbi heirou kanring-kanwai thimi rapya manuihatbi kouya tounarouwo?” toubi Thangwan-Shimleiyei Pu Dupune paothutlei.

Judah'yei Napuiya Rapya Tlousherkur

¹⁶ Heiyakhi duinara Umpune yunlei: “Zion'rei chanapuiya rapne tangchanei ngamrou, ngak khangalbi, heirou mitlung thunnilbine karwaichalei, heirou yai hokhi chunlanglang chanchabi, heitoubi yai horei tonshi rapkhi marshi-khungyerbine chunchani karwaichalei.

¹⁷ Heingamei Pu Dupune Zion'rei chanapuiya rapya yai machalra raichi paatyerbi msei naiyerrouwa, heitoubi Umpune yayari machal lhongyerbi rikrai phayerrouwa.”

¹⁸ Tlaini heirouri Pu Dupune yai horumrei msuibangkur tonshirap, heirou lurei kyit lingkhang-phirap, ngakhungrei tangla koolnak nabangbi klei khrulrui rapkhi;

¹⁹ heirou yai khnabilrei sinapar rapkhi, hutrumshin rapkhi, heirou maikhum-phirap;

²⁰ heirou phisuirei, heirou lukhumrei, heirou hutrmit-hutyengrei msuibang khrulrui rapkhi, heirou shintlak-kaina kungoirei, meiluk-kokrap, heirou dui chumakna chantra;

²¹ heirou min khaklhakkur hutshi, nalhung sina-parrei;

²² heirou yai phaikhring linglik-chulrap, shamkinrap, phi-uprap, heirou yaiyei tuy-kaorap;

²³ heirou yaiyei mingshelrap, heirou yai phaikhringei shambrap, lingkhang-phirap, heirou yaiyei phiyeng-khyaang rapkhi namma louthutdurou.

²⁴ Heinung tlimri khrim muiknam mrohyei rungkhlangra chulkhrim namyerrou; heirou shintlak-raakna kungoirei'yei rungkhlangra ruifret khoine pirouwa; heirou lurei sham karbilnei rungkhlangrani machal-lhongyerrou; heirou dun thimiyei phaikhring phiyei linglik-chulyei rungkhlangra phimtum hupbaangyerrou; heitoubi lhangai-karyuikna mairungei rungkhlangra rikrai phayerrouwa.

²⁵ Naiyei napawa rapri raalshonra hichirouwa; heitoubi naiyei mantrang raallui-lhouwa rapri raalbomra leichirouwa.

²⁶ Jerusalemei palshung-shumtrumrari khikanrel laa sherbine chapchirouwa, heitoubi hangwalni thleira kalletchani chapbi leichirouwa.