ISAIAH 29 - KHYINGEI PU'TLOU Bible (BSI)

Jerusalem'ya Tlou Sherkur

¹ O Ariel, Chaan khatrou Davidni Kholil phunbaangkhouna bi Ariel! Neiyei kumserrei Kneilhun heiwaya kumkhman-kumran hungleiser heisi chasundabi leiyalo.

² Heirou kheen hungtlunga'nungri Arielya Keine klahra dayerrouwa. Heirouri a heiri klah-knangei kanrel-laasherna bi hoirouwa. Heiyanungri a heiwari Keinungei Ariel naksi khat hoirouwa.

³ Heirouri Keine neiya karhani raalpal naksine kuikoollouwa; heitoubi neiyei raal'daang rapya Keine kul chalbine luklourouwa; heitoubi neiya karhani raal'daangrap sabaangrouwa.

⁴ Heirouri neiya thleira taangsundarouwa, heitoubi nangni thleirei katyunbi, neihou heiri thralwangei hounaksine kathukrou; heirou neihou heiri rahui hangrei dedecha loumayekrou.

⁵ Heiya neiyei yeekna thimi rapri rahuikun naksine mshing chungrouwa; heirou khril-lhangaimak thuithi thimi rapkhi satrailoukur chaker naksine chungrouwa. Heirou anaksi lhouri mitrup khatdei rilla hungthukheirou.

⁶ Thangwan-Shimleiyei Pu Umpune marwanle, linglang-khngaakle, lhimnung-martheetangle, lhiptlai-mher'le heirou kaangtlumnei meithlanle kalhonne neinungei yongdarou.

⁷ Heirouri Arielyei doura karhani raal dabi klei Lim rapbei kulyomrap, heirou aya karhani aiyei raalpal kuikoolkur krungkullei doura raal dabine aya marhotbi lahyerkur thimirap nammari masaei rmong-chammanaksi hoiwurchirouwa.

⁸ Heitoubi heiyei kheenrouri msul thimine rmong loumanbi-thilak, rmongra chak chabi klei loumurou; heiya ani mitrak kathukbi kanthouei kheenrouri aiyei msul heiwari ukthomakrou, nimanung, yuikhat thimine rmong loukman heinaksine- thilak, ani rmongra yui mongbine louklei murou, heiya ani mitrak kathukei kheenrouri a heiri yuikhat khrahmakni aiyei dang taarbine hirouleiya. Heinakrimni Zion Lhungdouya raal dabi klei lim rapbei kulyomrap nammanungei hungthukheirou.

⁹ Neitamtom kngakni yuntlungmak thiminakni hoiyuralo; mit mehwurbi mitdeo thiminakni hoiyuralo. Yari malipburchiya, heiya tulneri nimaklei; yari kanelkhupkhup leiwurchiya, heiya tulning mongmalipneiri nimaklei.

¹⁰ Kouweiyo toulanungri Umpune naidoura lhawai shungsundabi iplhakyerkura. Naiyei mitlung khoiyei klei thimkhui rapya Ane mitra myemkhalwurbi mehyerwurla, heitoubi naiyei lu khoiyei klei mit-mai kwaar thimi rapyari Ane mai khumphopburpila.

¹¹ Heineri kar'anmunei lhoubomrap namyerwa heiri nanungeiri khumkhalwurbi simanlha namkhalkur lailiktho naksine hoirouwa. Lailiktho heiwaya pakhei thiminungei malanpibi, “Awaya bei yukpathutpilaklo,” toubi shunyei kheenrou, ani, “Keiri pathutchangmak, ngamri awari khumkhalbi simanlha nambaangurla,” toubi loukyun heinakrimrou.

¹² Heirouri lailiktho heiwaya lailik paheimak thimi khatnungei malanpibi, “Awaya bei yukpathutpilaklo,” toubi shunyeinung, heirou anekhi, “Keiri paheimak,” toubine loukyun heinakrimrou.

¹³ Heirouri Umpune kyun, “Thimirap heini yaiyei murnitom Keinungei heikarnaklei, heirou yaiyei maleinitom Keiya rikrai khrumlei; heiya yaiyei solung rapri Keirouwei lhatni louthutdurla. Heirou yani Keiya rikrai khrumkur heiwari tlaipangei youkna lhoutomni hoiyerlei.

¹⁴ Ngam heineri, thilak, thimirap heiya Keine hanui kallengne kngak khatdei thuithini toupithurouwa, heirou yaiyei shingkhei thimi rapbei khyal-roushingya maangyerrouwa; heitoubi yaiyei kar'anbi thrilmukhei thimi rapbei khyalkhi yulkhourouwa.”

¹⁵ Yaiyei lhou-waikrangya Umpurouwei yulkhoukur thimi rapnungei, heirou mehna daakra muni lhoutoubi klei thimi rapnungeiri kounakei lah'kna! Yane kyun, “Huni kaya murouwo?” Nimanung, “Huni kaya mayekrouwo?”

¹⁶ Nane putchei rapya thak-daak holfletyerwurla; phusa thimi heikhi thleibulkou malknani loukyako? Heirou sheemthutkur putcheini aya yuksapi thiminung, “Ane keiya sheemthutkhoumak,” toubi yunrouko? Nimanung, sheemthutkur putchei heiwane aya yuksheempikur thimiya, “Ari koukhi phabda thimi nimak,” toubine kyun kyako?

Hilleinung Ningmalungamna Bom

¹⁷ Lebanon'yei ram heiwari marngirkur ram khat hoiyerrou kheen tlamarou nimako? Heirou trunwai lhangaikur ram marngir heiwari heengyao hoiyerrouri tlamarou nimako?

¹⁸ Heitoubi heiyei tlainirouri khnasit thimine lailikrei tloulhang rapya mayekpharouwa; heirou kmehyei hangra lhawai klahni klei thimi rapnekhi yaiyei mitdeoya mupharouwa.

¹⁹ Klah-knangei marhotkur thimi rapkhi Umpuei bomrari nungkngai pharouwa. Heirou tlaipang thimi rapbei hangra kanring-kanwai thimi rapkhi Israellei Khying Umpuei bomrari hakrao-nungkngai hoirouwa.

²⁰ Kouweiyo toulanungri thuithini lhangaimak thimi rapri hungdongchirouwa, heirou miya tlouthee kyun thimi rapkhi tlumni mangchirouwa. Heitoubi lhangaimak lhouya tounanungei mrimbi kngaak thimi rapkhi namma louthutdurouwa.

²¹ Ya rapne thimi hukhatya siklhakbi mral leikyer, heitoubi pichar bira miya klal dayerna'nungei chaangra mankyer; heitoubi pichar bira minambi napung khatdei phabomthuk chimya lunglouheipila.

²² Heingamei Abrahamya kalthutpikhou Umpune Jacobei cheemkhur-bommaiyei ngamrou asitoubi kyun, “Asinungri Jacob'ri rikrai phamakarou, nimanung aiyei mairungkhi karhuitou makarou.

²³ Heiya Keihutni aiyei chanao rapbei hangra touthutdurkhou lhou rapya ani muwurbi, yani Keiminya Khying hoiyerrou. Heisitoubi yani Jacobei Khying Puya rkolbine, Israellei thang'allei Dunpuei maibongra mayungrouwa.

²⁴ Heirouri ukningra lalkur thimi rapne chimya mupharouwa; heitoubi tlou kyit thimi rapnekhi chimmei shunmatupikur tlou rapya loulhakrouwa.”