ISAIAH 25 - KHYINGEI PU'TLOU Bible (BSI)

Dunpuya Mathangna Laa

¹ O Umpu, Nangri keiyei Dunpume. Keine Neiya rikrai khrumrou. Neiminya keine mathangrou. Kouweiyo toulanungri Nangni kngakei lhou rapya touthutkhoume. Bongei waiyoubi Neiyei wairangkhou heiwari malungamkna heirou shuikurkhi yaomakhui.

² Kouweiyo toulanungri Khukarthil khatya Nangni deekbai thuknei khingmanpungna hoiyerwurlei, heirou raalpalni kuikoolkhou khukarthil khatya Nangni toumangurlei. Yeekna thimi rapbei khukarthil khatya toumitdurlei, heirou khukarthil heiwari hanui kallengne sabaangkhoumarou.

³ Ngam heineri hutmantrang lim rapbei thimi rapne Neiya mathangrou; khril thuithikur lim rapbei khukarthil rapne Neiya chirillouwa.

⁴ Kouweiyo toulanungri Nangri tounaram mak thimi rapya lousoupi Pu khoine louklei. Nangri kanring-kanwai thimi rapne lahyei kheenroukhi trungpikhou. Lhimnung-martheetang kayeinung louyulna Bi khat, heirou nungshayei kheenrou kallena daikalim Bi khatme. Kouweiyo toulanungri, kringpikhei yaomak thimi rapne chiekpalra lhimnung-martheetang nangkur naksine norwurlei.

⁵ Kumkangei nungshaei meisha naksine rangkur ramtaang thimi rapbei ungraochanei houya ramei huphopkur heinaksine nansundawurpi, heirou kringpikhei yaomak thimi rapbei laaya ramei huphopburbi yendaikur heinaksine Nangne trimyerwurpi.

⁶ Thangwan-Shimleiyei Pu Umpune Lhungdou heitamrou thimirap nammanungei tangni malchak khangnungei marshikrou; malchak-khang heiwari tlani thung'marshikbi rehyerkur ning-khyak tulranle toubi khangrou.

⁷ Heitoubi lhungdou heirouri Ane tlaipang thimirap namyerwaei mairungra yarkhalbi klei maikhalphiya heirou tlaipangpallei limrap nammaei doura huphopbi klei phiyengya louthutdurbi toumangrouwa.

⁸ Heitoubi khi heiwaya Ane klui naimaknungei madulrouwa, heirou Pu Dupune thimirap nammaei mairungrei mityui rapya rutmthaipirou. Heitoubi Ane tlaipangpal karyouni klei Aiyei thimi rapbei klah-knangya louthutdurpirou, toubi Umpune shunthutdurkhoula.

⁹ Heitoubi tlaini heirouri asitoubi yunheirou, “Thilak, Ari kaya kalpina'nungei toubi kani thiphakhou kaiyei Dunpume. Ari kani loukarngeikhou Umpume; kani Aiyei Ralthutpina bomra hakrao-nungkngai hoiyase.”

¹⁰ Kouweiyo toulanungri Umpuei hutbangri lhungdou arouwei yuklamsundapirou. Heitoubi Moab'yari haldee hangra sapul khinglhakbi touchulyerkur heinaksine aiyei bira khingsundarou.

¹¹ Heitoubi yuira karbul thimini yui haiyeinang aiyei hutbangrap mherkur heinaksine, yani heiyei rilla hut yaabphabine leiheirou. Heiya Umpuneri yaiyei tangchanei hutbangrap heiwaya namsundawurbi toumangurpirou.

¹² Chouni sabangkur Moabei raalpal heiwari Dunpune tangdeeksundapirou; heiwaya nimni tangsundawurbi rahui thukni nangchaallurou.