ISAIAH 23 - KHYINGEI PU'TLOU Bible (BSI)

Tyre Ngamrou Shunthutpikur Pu'tlou

¹ Tyre'yei ngamrou asitoubi Pu'tlou shunthutpilei: Kanrilni chapbalo, O Tarshish'yei malirap! Kouweiyo toulanungri Tyre'ri tlumni mangurbi cheemkhi heirou mali-mathrumna bikhi makkurame. Pao awari Cyprus'rouwei yanungei shunthutpibi mayekyerwurla.

² Nari mulleiyalo, O Tyre'yei samadru ruira paalbi klei thimirap! Sidon'rei lal'hol thimirap, nakhi hou shaomaklo; naiyei malihul thimi rapri samadru heiralni chawurchiya.

³ Heirou yani samadruei yui'nlaak doura chawurbine, heitoubi Egypt'rei trunwai lung rapya yenlhakpilei, heitoubi Nile Kungtangrei putthuk rapya yenmarkumlhaklei; heitoubi heiyei putchei rapya nani ram deirei lim rapnungei yorthulei.

⁴ Neitamni rikraichawalo, O Sidon! Kouweiyo toulanungri samadruni asitoubi yunlei: “Keiri naopuknei manshan kna toukhi makhui, heirou nao pukkhou toukhi makhui. Keine kartlang douwaya yukbangkhou toukhi makhui, heirou nangaka douwaya yukthutkhou toukhi makkhui.”

⁵ Pao heiwane Egypt'ra wa'tlungei kheen heirouri, yani Tyre'yei paoya loumayekbi ukningra rah'shukni nungwaimakrou.

⁶ Tarshish'ra heirallaklo! Kanrelni chapbalo, O samadru ruira paalbi klei thimirap!

⁷ Bongei nutar-patar rapbei chaan heirouwei louklei, naiyei tangchana bommei khukarthil, heirou heiwane naya ramdei tlatnara yuldabi palnanungei ruithutloukur karyuikna khukarthilri heiwariko?

⁸ Krung lukhup khoiyei leikhou Kholil, heirou aiyei lalhol thimi rapya krungcharap naksine tlaipangpal karyouni rikrai khrumnakhou Tyre'yei doura huni yanimakni raangkhou kleiyo?

⁹ Heiwari Thangwan-Shimleiyei Pu Umpune aiyei lhangai-karyuikna nammaya mangyernanungei, heirou tlaipangpallei rikrai khrumknaya toumitdurnungei manraangkura.

¹⁰ Nile Kungtang naksine naiyei ram karyouni tulchekbine katpahoiyerlaklo; O Tarshish'yei chanapuiya rul; asinungri (mali-mathrumna yaomak naksine) naya louthingrouri koukhi makkura.

¹¹ Umpune Samadru doura Aiyei hut khangbangurla; Ane Krungbom rapya kanthingyerwurla; heitoubi Ane Canaan'yei mantrangkur raalpal rapya deeksundayernungei chay piwurla.

¹² Heitoubi Ane asitoubi shunthutdurla: “Nangri hanui kallengne kanthoukhoumarou, O Sidon; ngamri nangni yenmaangkura. Kanthouwalo, heitoubi Cyprus'ra heiralthutdalo! Heisiya hoiyanungkhi bi heirou ramphani nangri mathrilna bikhi naimakrou.

¹³ Chaldea rapbei ramya thilak! Ya rapne Tyre'yei ram heiwaya ramyaa rapbei konmrekna bi hoiyerwurla; heitoubi yani raal-ngaakna leire sabangbine, yaiyei krungkul rapkhi luklouheila, heitoubi heiwaya tlumni toumangurkhoula; heiwari Assyria'ne nimakme.

¹⁴ Kanrilni chapbalo, O Tarshish'yei malirap! Kouweiyo toulanungri naiyei mantrangkur Khukarthil heiwari mangurame.

¹⁵ Heirouri asitoubine hungthukheirou touri tlaini heirouwei waiyoubi Krung khatdei chaan-khatnak Tyre'yari kum somretbil malumwurheirou. Heiya kum somret yenluikur heirouri chorit naimak khatpiya shei shakna heinaksine Tyre'ya shei shaknaheirou.

¹⁶ Taari khat shinbine, khukarthil karyouni karwaichawalo, Oh malumkurwi chorit naimakpi napuiya! Neiyei taariya sirei kheini taangkhungbi, heitoubi kanrelnei laaya kalleng-kallengne katshalaklo; heiyanungri neiya louningthutkhi kya!

¹⁷ Heirou kum somretdei hillouri Umpune Tyre'ya ningmubi yongthipirou; heirouri ram heiwane hallei naksine chorit naimakei lal-holnei lhou rapya touthutbi tlaipangpal karyouni krungbom dei raple kalhonne lal-holmalnathurou.

¹⁸ Heisitoubi Tyreni aiyei lal-holnarei tungchakur lalthumrap, heirou tsai-anrap heirou sina-lapa heiwari Umpu'nungei siruk khaithutbi makatrou; heirou yani heirapya marpeibi khoulhakbi, nimanung tunglhakbi khoumarthumkur toumarou; heiya aiyei trunwai lungrap heiwari Umpunung'tlim watlhou toubi klei thimi rapbei chamainungei kroni khaithutbine thulpirou.”