ISAIAH 2 - KHYINGEI PU'TLOU Bible (BSI)

Umpu ne Pu Khoini Thrungrou

¹ Amoz'yei chanapawa Isaiah'ne Judah'le Jerusalemei ngamrou kar'anmukhou tloulhang rapri:

² Hilluiyei tlaini raprouri asitoubine hungthukeirouhui, touri Umpuei Pucheem mayungna Lhungdou khat bung chounahakra phunbangeirou. Heitoubi lhungdou heiwari lhunglim rapbei hangra yerrouwei chouduini mathumbangeirou. Heirouri limrap nammani bi heitamrou wakallongeirou.

³ Heirou thimi chungwani wakartilbi yani yunheirou: “Wawalo, Umpuei Lhungdoura kawase, Jacobei Dunpuei Cheemra kachangase; heiyanungri Ane kanungei Aiyei lamtlunyei ngamrou shunmtupirou, heirouri kani Aiyei lamtlunra charou.” Kouweiyo toulanungri Zion'rouei Chaylam pithutdeirou, heirou Jerusalem'rei Umpuei tloulhang rapya paothutdeirou.

⁴ Heirou Ane tlaipang lim rapbei tlakra pichar toupirouwa, heitoubi thimirap nammanungei pichar toubine tlou sempiheirou; heirouri yaiyei raalshonrap heiri loukhuina langkol hoinarouwa, heirou yaiyei raalcheirap heiri louhyin hoinarouwa. Heirouri lim khatni lim khatdei doura raalshon tlangmakarou, heirou yani hanui kallengne raal-sireikhi marnomakarou.

⁵ O Jacob bommai'yei thimirap, hungalo, heitoubi kani Umpuei kwaarra chawase.

⁶ Kouweiyo toulanungri Neiyei thimi, Jacobei bommai'ya Nangni horwurbi lakurkhoula. Ngamri yaihangrari kulkung lhangrei thuitou thimi rapne thimmura; heirou Philistia rap'naksine thraiyei tlou kar'anbi shunthutrilbine leiwurchiya; heitoubi miram-mithrillei thimi raple yakantlangrilbi manokrillurchiya.

⁷ Yairam heiwakhi sinale-lapani thimmura, heirou yaiyei lalthum heiwari dongkhi trimkhi naimakura. Heirou yairam heiwari sapuk rapne bil-thimmura, heirou yaiyei sapuk kaari rapkhi luikur-trimkur toukhi naimakura.

⁸ Yairam heiwakhi thrailha rapne thimmura; heitoubi yaimshaei hutni sheemthutbi mallokur putchei thrailha rapbei maibongra yani lu sikhuplhakbi khrumwurla.

⁹ Heisitoubi thimi rapya ukning tounimyerbi, thrailha rapbei maibongra khrumyerwurla; ngam heineri yaya kukpimaklo.

¹⁰ Thlungkhan daakra truklhaklaklo, heitoubi thleipur rilla yuchangbine yullaklo. Ngamri Umpuei meithukni malungkhana maibongrari heirou Aiyei Toumani-thang'allei bomrari,

¹¹ tangcha thimi rapri rikrai phawurbi nimsundayerouwa. Heitoubi heiyei tlainirouri Umpuyatom mathumbangrouwa.

Pichar Toubi Tanti Pinei Tlaini

¹² Kouweiyo toulanungri Umpune ukningra tangchabi napaltou thimi rapyale, ukning khnim thimi rapyakhi khintamrekya pichar tounei tlaini khat hungeirouhui. Heirou yaitamya mathumbaangbi tangchakur thimi napung-kantangei doura pichar toubine aya rikrai phayerheirou.

¹³ Heirou Lebanon'rei chouni kanyerchabi klei Cedar trungrap nammaei dourakhi, heirou Bashan'rei Bok'heengrap nammaei dourakhi pichar touheirou.

¹⁴ Lhungshaang lim namyakhi, heirou bung chouna namyakhi pichar touheirou.

¹⁵ Heirou chouni sabaangkhou raaldaangrap namakhi, heirou chouni sabaangkur raalpalrap namyakhi pichar touheirouhui.

¹⁶ Tarshish'rei lalholna malirap nammaei dourakhi, heirou hutsa-karbilni mansambangkur malirap nammaei dourakhi pichar touheirouhui.

¹⁷ Heirouri tangchabi napaltou thimi rapya tangsundaheirou; heirou tangcha thimi rapya rikrai phayerbi mangyerheirou. Heitoubi heiyei tlainihakrou Umpuyatom chouni mathumbangeirou.

¹⁸ Heiya thrailha rapyari yertleng mangyerheirou.

¹⁹ Heirouri thimi rapne thlungkhan hangra truklhakbine, heitoubi thleipur rilla truklhakbi yullouwa. Heirou Umpune tlaipangpalya toumthunnung kanthouei kaalnung, tlaipang thimi rapne Umpuei meithukei malungkhana maibongrouei, heirou Aiyei Toumaneyei thang'allei maibongrouei loutrukurbi, thlungkhan daakra truklhakrou, heitoubi thleipur rilla loutrukyulrou.

²⁰ Tlaini heirouri tlaipang thimi rapne yai khrumnungei yaimshaei hutni sabi sheemthutkur lapathirle sinaei thrailha rapya rpuk rapnungle, baakshin rapnungei khingpiwurchirou.

²¹ Heirouri Umpune tlaipangpalya khngaakbi kanthingyernung kanthouei kaalnung tlaipang thimi rapne Umpuei meithukei malungkhana maibongrouei, heirou Aiyei Toumani thang'allei maibongrouei loutrukurbi, thlungkhan daakra truklhakbi, heirou thleipur rilla loutrukyulrouwa.

²² Tlaipang thimiya malungamnarei dongalo, aiyeime touri khnapurrei ringnanungei nilso tomngeime; aya mshing kansherchokbi kouya tounarou!