ISAIAH 17 - KHYINGEI PU'TLOU Bible (BSI)

Damascus'yei Ngamrou Shunthutpikur Pu'tlou

¹ Damascus'yei ngamra shunthutpikhou Pu'tlou: “Thilak, Damascus'ri khukarthil khat hoinarei toudongrouwa; heitoubi deekthrombi mangrom putchei rapya marpeina bi khoine leiyerrouwa.

² Khukarthil rapkhi khingurkhoula; yarap heiri yaorul rapbei konmrekbi mathrilna bi hoiwurchiya. Heitoubi bi heirouri thimi hukhatnikhi yaorul rapya toumathunpirou makrouwa.

³ Ephraim'rouwei raalpal rapkhi kanchairouwa; heirou Damascus'rei krungbomkhi mangchirouwa; heirou Aramrei himaleithung thimi rapkhi makurchirouwa. Ya rapri Israellei chanao rapbei thang'al naksi hoirouwa,” toubi Thangwan-Shimleiyei Pu Umpune paothupilei.

⁴ “Heitoubi tlaini heirouri Jacobei thang'alri nimsundayerouwa, heitoubi Israellei sharungei marnamnei siruk heiwakhi yenshulyerouwa.

⁵ Kheen heiwari trunkhum thimi hukhatni Rephaim phaikarrei trun khumyeinung aihutne chahui rapya aatbine lukmarkum heinaksine hoirouwa.

⁶ Kheen heirouri Olive trung doura kakabi khngaktrulyei kheenrou heengbung chouna msurra heipum khat-khni trulkarkul'thungkur heinaksine, heirou heibom manbobna banra heipum phali-phangatam trulkarkul'thungkur heinaksine hoirouwa,” toubi Israellei Dunpu, Umpune paothutpilei.

⁷ Tlaini heirouri thimi rapne yaya sheempi Puya ningmupibi rikrai khrumpirou, heitoubi yaiyei mitni Israellei Khying Puya thrilmupharou.

⁸ Heirouri yaiyei hutni sabaangurkhou khrahpal rapyari yani lhouhoipimarou, heirou yaiyei hutmayung rapne sheemthut-sathutdurkhou putchei rapyakhi mitni thrilpimarou, heirou Asherim thrai-shutlai rapyakhi heirou heiyei mrohkun hongnabi khrahpal rapyakhi mupimarou.

⁹ Heiyei tlainirouri yaiyei mantrangkur khukarthil rapri, Israel rapbei ngamni Hivia raple Amoria rapne yaiyei khukarthil rapya khingurkhoubi loutrukur heinaksine ramhang heengyao hangra khingurkhourouwa. Heitoubi ram heiwari hangwalni maang-taakna bi khoine leithungrouwa.

¹⁰ Kouweiyo toulanungri naya ralthutpina bom khoi Dunpuya nani malumwur'khoula; heirou naiyei kallena bi khoi Thlungya nani ningthut'pimakura. Ngam heineri, nani darkha trung lhangaiya lingpukbikhi, heirou miramrei heilungya yenlhakbine lingpukbikhi;

¹¹ nani heirapya lhangaini linglhakbi pukthutkyer tlainirouri, heirou heirapne heipar lhangaini katparbi heiyourou; heiya heitrun lukyei kheenrouri, damchangmak kna'lam naksine pharthrai dawurbi trulmaangurchirou.

¹² Ulleiyo! Thimichung ungraochanei houya heiningthilaklo! Yane samadrurei yuilhouwei hounakni ungraochabi lungurame! Ulleiyo! Lim rapbei lungkur houya ningthilaklo! Yane yuilhouwei hounaksine lungurame!

¹³ Lim rapri samadrurei yuilhou mharcha naksine mharchawurame, heiya Ane yaya shunkhampirou; heitoubi yani tlatnara trukrouwa; heitoubi lhungdoura marthee-maibongra raba loutraikur heinaksine yaya hulcharouwa, nimanung lhimnung-martheera rahui traichakur heinaksine hulcharouwa.

¹⁴ Heirouri thilak! Rawai'nungri raalni hou lungrouwa! Heitoubi ningshun nung warbongnungni yari louleimakrouwa. Heisitoubi kaya marhotkhou thimi rapnung, heirou kaya maangnanungei raangkhou thimi rapnungei heisibil hungthukheirou.