ISAIAH 16 - KHYINGEI PU'TLOU Bible (BSI)

Moabei Doura Deekbai Thukyerbi Maangyerkur

¹ Ram heiyei krungnungei Sela'rouweine ramthingei lamtangthung Zion'yei chanapuiya rapbei lhungdoura ruiput khoine yaopa heipithunglaklo.

² Heirou Moabei chanapuiya rapri ramwaa raburei hulmtraiwurbi Arnon'yei kungpaalla chunabi naimakni traichakur waashun naksine hoirouwa.

³ “Kanungei tlou sempibi chimni pichar toupilaklo. Nunghangnung neiyei lhimni masaei kmehnakni yukmallepilaklo. Horthutkur thimi rapya yulkhoupilaklo, heitoubi tounaram maknei rocha thimi rapya yorchawurpimaklo.

⁴ Moabrei horthutkur thimi rapri nale kalhonne leichoklaksu. Kouweiyo toulanungri marhotbi lahkyer thimi rapri hungdongura, heirou toumaangrou thimi rapkhi luiwurla. Heitoubi miya hotmaangpi thimi rapkhi ram heirouwei namyer maangurchiya.

⁵ Heirouri kringpi-kheini bilthim krungbom khat phunbangeirou, heitoubi heiyei krungbom doura malungamkna Pichar pu khat David'yei cheemkhurrei hungthukbi thrungeirou. Heiyakhi duinara Ane chimmei picharya toupirou, heitoubi A heiri tharmu chimmei lhouya tounara khrangrou.”

⁶ Moabei tangchawurnei ngamya kani mayekwurla, beimakni tangchalei. Heirou aiyei thuithikurle, napal toukurle, heirou aiyei meithukni malungkhater heiwakhi mayeklei. Heiya aiyei tangchanei lhourap heiri hangwalni hungdongeirou.

⁷ Ngam heineri Moab'ri kanrellaksu; Moab'nungtlim thimi napung-kantangni kanrel-laa sherlaksu. Msulni tarhatkur thimi'rap naksine nani Kir-Hareseth'yei darkhahei taaryei mumtolya thibine kanrellaklo.

⁸ Kouweiyo toulanungri Heshbon'yei louyao rapri yentaarwurchiya, heirou Sibmahyei darkha-trung rapkhi taarwurchiya. Chaan-khatrou Jazer waphani yampakkhou darkha-yam rapya, heirou ramthing wa'tlungei yambi, heirou heirapbei bo shunbine samadru yuphani yamkhou lhangai-karyuikna darkha yam rapya lim deiyei pu rapne tatmnuibi konchalwurchila.

⁹ Heingamei Keine Jazer'le kalhonne Sibmah'yei darkha yamnungei tlim chapburkhou. O Heshbon heirou Elealeh, keiyei mityuini naya martlaoyerouwa; kouweiyo toulanungri naiyei darkha hutlha hei luknei hakrao-nungkngaiyei ungraonei hou heiwari yendongrouwa,

¹⁰ Heirou louyaorei trunwai hutlha hei lhangainei hakrao langthounei hou heiwari louthutrouwa. Heirou darkha yekulrei nungkngai-langthounei ungraokur hou heiwakhi makrouwa. Heirou darkha hei shumnara heiyui shum thimi rapnekhi shummakarou. Kouweiyo toulanungri heiyei hakrao-nungkngaiyei ungraocha heiri Keine louthutdurla.

¹¹ Heingamei Keiyei solungra Moab'nungtlim khilaaei taari hou khoine kanrelpilei. Heirou Keiyei solungra Kir-Hareseth'nungtlim kanrel-laa sherpilei.

¹² Heirouri Moab'ne lhawai klahni lhungbung chouna thrai'bomra, heirou ani khyingei Pu-khrumna bira kakabi shuncha-buchayei kaallouri, aiyei tlouya ninglhakpimakarou.

¹³ Tloubom awari Umpune Moabei ngamrou lamkrini yunthutdurkhoula.

¹⁴ Heiya asinungkhi Umpune asitoubi shunpithulei: “Kneek shok rapne tlaini kansherbi klei heinakni, kum-khyumei rilla Moabei thimi mshing chungnei ngamrou kanyerchakhou thang'al heiwari yenkanthritrouwa, heirou himaleithung thimi rapkhi tharemcha hoirouwa, heitoubi hutmantrangkhi yenmanthirrouwa.”