ISAIAH 15 - KHYINGEI PU'TLOU Bible (BSI)

Moabei Doura Umpu ei Pichar

¹ Moabei ngamrou Pu'tlou khat asitoubi shunthutpilei: Masa khatrou Moab'rei Ar'ya mangyerwurbi Moabri hangwalni tounaram makni leirouwa; masa khatrou Moab'rei Kir'ya toumangurbi Moabri tounaram makni hangwalni dongrouwa.

² Dibon'ri aiyei chanapuiya rapbei bungchouna dourei thraibom rapra chaprou kakawura. Heirou Moab'ne Nebo'le Medeba'nungtlim kanrelbi kalletchani chapbura. Thimi rapbei lurei shamkhi trulwurchiya, heirou murkhmul rapkhi ngoumthaiwurchila.

³ Yane khullamra rmol-phichunya upbine karwaichawura; thimi nammani yaiyei cheembung doura kakabi, heirou phungtungra pothutbine, heitoubi mityui dani heirou malungdouni chapbi kanrellurchiya.

⁴ Heshbon'le Ele-aleh'khi houthukni ungraochani chaplei. Yai chapnei hou heiri Jahaz ramphara loumayeklei. Heitounei ngammei Moabei raal-shamb baangbi klei raallui rapkhi hou chouni chapburchiya. Ya rapri chimathunwurbi malung kanchunwurchiya.

⁵ Keiyei solungra Moab'nungtlim lhawai klahni chapthutlei; aiyei raal-trukchekkur thimi rapne Zoar'le, Eglath-Shelishiyah waphani heitrukurchiya. Kouweiyo toulanungri yani chapthotho Luhith lhungdoura wakakalei. Heirou thimi rapne Horonaim'yei lamtangra chamallomni yaiyei deek-bai thukkur heinung'tlim ungraochani chapbura.

⁶ Kouweiyo toulanungri Nimrim kungei yuikhi yentaarwurchiya. Heirou ramhangrei louna-ramna mar'em rapkhi taarwurbi trulwurchiya. Ram heirouri ramna mar'emtouri koukhatkhi makkura.

⁷ Heingamei phalhakhou lalthumrap nammakhi, heirou yaiyei marpeilhakur putcheirap nammakhi, yani Arabim heengyao hangei kungbaanrap leinara urlouheila.

⁸ Kouweiyo toulanungri Moabei ram karyouni klah-mrimyei chapnei houni thimmura. Heirou heiyei ungraochaei chapnei hou heiwari Eglaim'rakhi heirou Beer-Elim ramphani wa'tlungura.

⁹ Kouweiyo toulanungri Dibon'yei yuiri heethillura, heiyanungkhi Dibon'yei doura Keine duini klah-mrim yenpithurou. Heirou Moabei himaleithung thimi rapbei doura heirou yairamra Keine yangkong malhetlhakbine chik'hatyerrou.