ISAIAH 13 - KHYINGEI PU'TLOU Bible (BSI)

Babylon'yei Doura Pu'tlou Shunthutpikur

¹ Amoz'yei chanapawa Isaiah'ne Babylon'yei ngamrou putkhritdei Pu'tlou rapya kar'anmukur.

² Lhungbung chouna doura mu'kna hutlha khat khoine phran khat khangbanglak, heitoubi yanungei neiyei hou chouni yuk'ungraobi shunpilak; heirou yanungei neihut yukyapbine yama krung rapbei shumtrumra wachangnanungei shunpilak.

³ Keiyei khoine khaithutbi makadthutkur thimi rapnungei Keine chay piwurla. Heirou Keiyei malungkhanei lhouya touthutnanungei Keiyei raallui rapya chay piwurla. Heirou Keinung'tlim tangcha thimi rapya rampha Keiyei malungkhaya lhou khoine touyernanungei chay piwurla.

⁴ Thimi chungwani kartilnei houklung naksine lungkur lhungdou raprei houya katningthilak! Limrap chungwani kartilkur hounaksine Krungram chungwani kartilbi karnorilkur houya katningthilak! Thangwan-Shimleiyei Pu Umpune raallui rapya raal bomranungei raal marchupibi leiyura.

⁵ Raalluirap heiri tlatna ramrei, tlaipang wadongna ram raprei wachanglei. Ya rapya Umpune Aiyei malungkhanei hutshurap khoine tlaipangpallei ram namyerwaya maangyernanungei yenlhakura.

Dunpune Babylonyei doura pichar tounei tlaini

⁶ Chapni kanrel laa-sherlaklo! Kouweiyo toulanungri Umpuei pichar tounei tlainiri yennaklei. Tlaini heiwari Mane-Mantrang Umpurei maang-taakyernei tlaini khoine hungrou.

⁷ Kheen heirouri tlaipangei hutbangrap namyerwa heiri msewurbi hisundarouwa; heirou thimi nammaei solung rapkhi namma yasundawurchirou.

⁸ Heirouri yani chi-mathunwurbi, lhawai klah'le, chi'knani yaya manirouwa. Heirouri yari napuiya nao-khounei klah-mrim naksine leichirouwa, heirou yani khatle-khatle kngakni thirillouwa; heirouri yaiyei mairung rapkhi meithlan naksine mraochirouwa.

⁹ Louthilak, Umpuei tlaini hungleime; tlaini heiwari Aiyei thuithikur meithukei malungkhale kalhonne hunglei. Ane ram heiwaya tlumni mangyerwurbi, heitoubi bi'heirou paalbi klei borh thimi rapyakhi namma louthutdurou.

¹⁰ Kouweiyo toulanungri tlaini heirouri nungthourei heirou thangwanrei sorwa rapnekhi yaiyei kwaar almakkarou; heirou kinnikhi kathukle tallengne aiyei kwaar almakne yenmehrouwa; heitoubi tanglakhi masanung kwaar almakkarou.

¹¹ Tlaipangya aiyei lhangaimakur heinung'tlim Keine aya tanti pirouwa; heitoubi khril lhangaimak thimi rapyari yaiyei lhangaimak lhou heinung'tlim Keine klah dayerrou; heirou tangcha thimi rapyari Keine khribdeekurbi mangyerrouwa. Heitoubi yaitamni mathumchoubi miya thuithini mareknapi thimi rapyari Keine tangsundarou.

¹² Keine kimkur kya thimiya manklu sinaya duini tangni sheempirou, heirou tlaipang thimiyari Ophir ramrei sinaya duini man taangyerrou.

¹³ Ngam heineri Thangwan-Shimleiyei Pu Umpuei meithukni malungkhakur tlainirouri Keine nungthouya kaangtlumyerrou, heirou tlaipangya aiyei birouwei khngaakchutyerrou.

¹⁴ Heirou thimi rapri yaa chanyei hulchakur rchao'kalla naksine hoirouwa, heirou hunikhi yaya markumpirou makkur yaorul naksine hoirouwa. Heirouri thimi napung-kantang heiri ai'aiyei limra hol'lhakrillouwa, heitoubi thimi napung-kantangni ai'aiyei ramra truk'kallengrouwa.

¹⁵ Heitoubi hukounak khatya chanphalanungri ayari cheipakni thunkalleirou, heirou hukounak khatya raal manlanungri a heiri raal-shonra hirou.

¹⁶ Yaiyei naoshen mandicha rapyakhi yai-maibongra mit-dodo muthungni umhatdurou; heirou yaiyei cheem-kei rapkhi putcheirap namyerwa khrokloubi mulouheirou; heitoubi yaiyei nuwa-chawa rapyakhi manlouheibine daimarekbi touchopburou.

Babylon'ri Medea Rapbei Hutra Dalhakrou

¹⁷ Thilak, Keine Medea rapya thoulhakbine Babylonia rapbei doura karhani toufyourouwa; heirou yani sina-lapaya horthibi madupha thimirap nimak;

¹⁸ heirou yaiyei malaa-taak rapne kartlang douwa rapyakhi harhar dani kaapchaal'lhakrou; heirou yani koukhatkhi kringpikhei yaomakni ukwairei naoshen rapyakhi hatdurpirou; heirou yai mit'thrilnara naoshun-naopar rapyakhi malungshipi yaomakni hatdurpirou.

¹⁹ Babylon'ri chaan-khatrou Krungram hangra Chaldea rapbei tangchana bom khoine thang'al hoinakhou heiwari Dunpune Sodom'le Gomorrah naksine hoiyerrouwa.

²⁰ Heitoubi bi heiwari yul-dathramarou, nimanung chaan khatroueini chaan-khat phani thimi paalmakni hangwalni horwurbi leirouwa. Arab rapnekhi rambi heitamrouri khuiluphiyei cheem sabangkhoumarou. Heirou yaosil thimi rapnekhi bi heirouri yaiyei yaorul rapya silkhoumarou.

²¹ Heiya bi heiwari thuithikur ramyaa rapne bil-thimni neibi leirouwa; heirou yaiyei cheem-kei rapkhi tikini rapne thim'rouwa, heirou Ostrich waa rapne rabu hoinabi leirouwa; heirou yrao rapne bi'heirou chunklaochani leirouwa.

²² Heirou yekshang rapne yaiyei raaldaang rapbei rilla ungraobi khungrouwa; heirou yaiyei karyuikna krungkul rapya ram-ui rapne rabu hoinarouwa. Heisitoubi Babylon'yei likarsui thuithinei tlaini khat khrangni hungrouwa; heirou aiyei hungdongnanungei tlaini heiwari tlamakarou.