ISAIAH 12 - KHYINGEI PU'TLOU Bible (BSI)

Dunpuya Mathangna Laa

¹ Heirouri heiyei tlainirouri nangni asitoubi yunheirou: “O Umpu; Keine Neiya mathangrou! Kouweiyo toulanungri Nangni keiya malungkha'khouwa'nungkhi, Neiyei malungkhakur heiri dongura; heitoubi Nangni keiya malung damyerpiwurla.

² Thilak, Dunpuri keiya ralthutpi Pume; Keine Aya uklumrou, heitoubi keiri chimakrou; Kouweiyo toulanungri Dunpu Umpuri keiyei mantrang, heirou keiyei laa; heirou Ari keiyei Ralthutpina bom hoiyura.

³ Ngam heineri nane ralthutpinei yuisorei hakraowei tuysirya shuklourou.”

⁴ Heitoubi heiyei tlainirouri nani yunheirou: “Umpuya mathanglaklo, heitoubi Aiyei minya unglaklo! Aiyei touthutpikur lhou rapya lim rapbei hangra shunthutpilaklo! Aiyei minya chouni mathumbangnungei paothutpilaklo!

⁵ Laa shabine Umpuya mathanglaklo; Ngamri kngak khatdei thang'allei lhou rapya Ane touthutdurla! Aiyei touthutkur kngakei lhourap nammaya tlaipangpal nammani mulaksu!

⁶ Hakrao-nungkngaile kalhonne hou chouni ungraobi paolaklo; O Zion'rei thimirap; ngamri Israellei Yerrouwei Tang Khyingei Pu Umpune naihangra thrungpilei.”