ISAIAH 11 - KHYINGEI PU'TLOU Bible (BSI)

Jesse'yei Ban, Kyingei Krung

¹ Heirouri Jesse'yei ramuirei dun khat katshunrou, heitoubi Airouwei Ban khat heisoubi heitoubi heikhi kat'heirou.

² Heirouri Umpuei Lhawaini Aidoura leipirou. Heirouri roushingle, phab danei lhawaile, tlou sempinei heirou mantrangei lhawaikhi leipirou. Heirou khyalle Umpuya chi-rikrainei lhawaikhi Aidoura leipirou.

³ Aiyei solungra nungkngaiyo touri Umpuya chi-rikrai tou heiriya. Heirou Aiyei mitni mulhakur heirouei Ane pichar luilhakmakrou.

⁴ Heirou tharmu chimmei tlouni kanring-kanwai thimi rapya Ane pichar toupirou; heitoubi marhotpikur thimi rapya Ane ukning khyingni pichar toupirou. Heirou Aiyei murrei tloulhangni tlaipangya mangyerou, heitoubi Aiyei murrei heisothutkur nilni khril lhangaimak thimi rapya toumangeirou.

⁵ Tharmuchim heiwane Aiyei shintlakrui khoine yitrou, heirou malungamkna heiwane Aiyei shonkhumrui khoine msuirou.

⁶ Heirouri yekshang rapne yaoshun rapkou kalhonne leimalnarou. Heitoubi hume(phursan) rapne tlangshun rapkou pulni neichokrou. Heirou halshun raple, yangkong shun rapne halpadou rapkou namh shaimalnarou. Heitoubi naoshen mandicha khatni yaya lam ruipirou.

⁷ Heirou halpui raple yekthrum rapkhi pulni namh shaimalnarou; heirou yekthrum-shun raple halshun rapkhi pulni neimalnarou. Heirou yangkong panekhi halpa naksine namh chakshairou.

⁸ Chuchu kmong naoni frulsok purrei paalra mrekrou; heirou nu khaikur naoni rultu pur rilla hut heironlhakrou.

⁹ Yane Keiyei Khying Lhungdoura koukhatkhi touhemkril nimanung toukmang toukhi makrou. Kouweiyo toulanungri yuini samadru namma karyouni omphopbi klei naksine Umpuei khyal-roushingni tlaipangpal karyouni thim'rouwa.

¹⁰ Heitoubi heiyei tlainirouri asitoubi hungthukrouwa, touri Jesse'yei Yrung heiwari lim rapbei mu'kna hutlha khat khoine mayungbi leirouwa; heitoubi lim dei rapne Aya yenrapharou; heirouri Aiyei thrungna bi heiwari thang'allei bom khoine leirouwa.

Himaleithung thimi rapya kalpi

¹¹ Heitoubi heiyei tlainirouri asitoubi hungthukrou touri, Umpune Aiyei hirom thimi rapya hanui kallengne Assyria, Egypt, Pathros, Cush, Elam, Shinar, Hamath heirou samadru ruithung paalbi klei lim rapbei hutrouwei yaya kalthutpithurou.

¹² Heirouri Ane lim rapbei hutlha phran khat khangbangpirou, heitoubi horthutkur Israellei thimi rapya markumpirou; heirouri tlaipangpal chithek phalitam karyouni Judah'yei rachekkur thimi rapyakhi khumtilpirou.

¹³ Heirouri Ephraim'yei horthitang heiwakhi makrouwa, heirou Judah'ya marhotpikur rapyakhi dannurouwa; heirouri Ephraim'ne Judah'yei doura horthimakarou, heirou Judah'nekhi Ephraim'ya marhotpimarou.

¹⁴ Heiya yani kulrel lhangrei klei Philistia rapya namsundabi kulchalpirouwa; heitoubi yani pulbi kantlangni kulkung lhangrei thimi rapyakhi maniwurbi mangyerrouwa; heitoubi yani Edom'le Moabei ramrakhi hut lhakbi mangyerrouwa; heirouri Ammonia rapne yaidaakra leirouwa.

¹⁵ Heirou Umpune Egyptbei Mrao Samadruya heepyerwurbi taaryerouwa; heirouri Euphrate Kungtangei yuidoura Aiyei hut khangbangrou, heitoubi martheetang katfyoubi thiyerrou; heirouri Nile Kungban enitamei dourakhi karyouni heepyerrou, heitoubi heirapbei yuitaarna doura thimi rapya khorkhang tungbi honi poralyerrou.

¹⁶ Heirouri Israel rapne Egypt'rei yenkalleng naksine Aiyei hi'mleithungkur thimi rapnungei Assyria'rouweine lamtang khat phaatputrouwa.