ISAIAH 10 - KHYINGEI PU'TLOU Bible (BSI)

Assyria'ya Dunpuei Hutshu Hoikyer

¹ Chimmak chaylam rapya pithutkur thimi, heirou minamnei ayilya mayethutkur thimi rapri lah'kna hoiniyasu;

² kanring-kanwai thimi rapya pichar bira minampibi michang-mikhai knaini, heirou tounaram makkur Keiyei thimi rapne phabomthuk rapyakhi muloupibi, heirou trulmeiwi rapya manthapimakni mareknabi toumangurpi; heirou puipa mak saracha rapya thuithini marhotbi konmangurpi thimi rapnung'tlimri kounakei lhawai lakna.

³ Asinung pichar tounei tlainirouri nani kou touheirou? Tlatnarei hungbi naidoura mang-taakkur thukyerkur tlaini heirouri nani kou loutouchangrou? Nane hunungei loutrukbi naya trungpiyerrouwo? Heitoubi naiyei lalthum rapri nani koura lakurkhourou?

⁴ Kulchalphopna daakra namlhakur nimakni, nimanung khi'lhung hangra namlhakur nimakni yanungeiri koukhatkhi maleimakrou. Heisiya hoiyanungkhi Aiyei malungkha heiwari kanthritmaklei, heirou Aiyei hutbang heiri heisi khangbangbine khouleihui.

Assyria'yei Doura Umpu ei Pichar Klei

⁵ Keiyei malungkhanei shungkrok hoinabi klei O Assyria, neinungeiri kounakei lah'kna! Neihutra shinbi klei shungkrok heiri Keiyei meithukni malungkhanei shungkrokme.

⁶ Ayari Keine Dunpuya shak mumak lim rapbei doura karhani malhetrouwa; heirou Keiyei meithukei malungkhakur limyei doura watyilrouwa. Heitoubi raalmanbi urlouyernungei, heirou raalla deekbaibi khrommangkur lalthum rapya markumyerou; heitoubi yaya lamtlairei thleibulya tatmnui naksine tatmnuiyerouwa.

⁷ Heiya Assyria'ne aiyei ukningra heinaksi ningchakhoumakhi kya, heirou aiyei solungra khalmukhoumakhi kya, heiya ani yaya raal maniwurbi mangyernanungei ningchakhoukhi kya.

⁸ Kouweiyo toulanungri ani kyun, “Keiyei raallui upa rapri namma krungchathil nimako?

⁹ Heirou Calno khukarthil heiwari Carchemish khukarthilnaksi nimako? Heiyanung Hamath khukarthil heiwakhi Arpad khukarthilnaksi nimako? NImanung, Samaria'ri Damascus naksi nimako?

¹⁰ Keiyei hut awane thrailha rapya khrumna krungram rapya wa'tlungurari, yaiyei thrailha rapri Jerusalem'le Samaria'rei thrailha rapyakhi duini lhangaikhou heiwayakhi Keine toumangurkhou.

¹¹ Heirou Keine Samariale, aiyei thrailha rapya mangyerkur heinaksine Jerusalemle heiyei thrailha rapyakhi toumangbom thukmakrouko?”

¹² Heineri Pu Dunpune Zion Lhungdourale, Jerusalem'ra tounungei lhourap nammaya luilhakur heirouri Ane yunneirou, “Assyria Krungei ukning lhangaimak heile, aiyei tangchanei lhoutou heiwaya Ane tanti piyeirouhui.”

¹³ Kouweiyo toulanungri ani yunkhou, “Keiyei mane-mantrangei hutni, heirou keiyei roushingni lhourap namma touthutkur, ngamri keinungei mumaninei khyal klei, lim rapbei ram ri-karchunna rapyakhi toumangurla, heitoubi yaiyei putchei-lalthum rapya lunglouheila. Heisitoubi hutmantrang lhouwa naksine krungbom rapya maniwurbine namsundawurla.

¹⁴ Keihutni waa rabuya khrubloukur heinaksine laldun thimi rapbei lalthum rapya namma khrublouheila, heitoubi thimi napung khatni waa-yui rapya lukmallongkur heinaksine, Keine tlaipangpal nammaya markumlouheila. Hukhatnikhi sha yapchangmakura, heirou taka aangbine khungchangrou thimikhi hukhatkhi yaomakura.”

¹⁵ Reini heeng yukshe thimiya loukallekbine chushakur kyaoko? Nimanung horaini aya khngaakbi yuk-aat thimiya karhani loukallekbi aatkur kyako? Heisiya hoiyanungri shungkrokni aya shinbi shucha thimiya manirou waikyou heinakrim hoirou; nimanung cheishuni aya shucha thimiya shinchanungeiri yamakrou.

¹⁶ Ngam heineri Thangwan-Shimleiyei Pu Dunpune Assyria'yei mantrangkur raallui rapbei doura thuithikur pharthrai knalam yukpisundarou; heitoubi Aiyei malungkhakur heiwane Assyria'yei thang'allei daakra meithlan naksine katkaangeirou.

¹⁷ Heirouri Israellei kwaar heiwari meirul khoine, heirou Khying Dunpuei meithlan khoine katfyourouwa; heitoubi tlaini khatdei rilla Assyria'yei thru rapya, heirou trung rapya nungkhatnuirou kaangtumchirouwa.

¹⁸ Heitoubi Umpune Assyria'yei heengyao hangrei thang lhangaiya toumangpirouwa, heirou aiyei yekulrei hutlha hei lhangai rapya toumaangpirouwa; heirou aiyei lhawaikhi sharungkhi khintamrekya mangyerouwa. Heirouri nater thimiyei hikur heinakni yenhirouwa.

¹⁹ Heirouri aiyei heengyao hangrei heengtrung rapkhi mshing thacha hungdongrouwa; heiyanungri naoshen heichanikhi heirapbei mshingya sherchichangrou.

Himaleithung Thimirap Thachani Kallengrou

²⁰ Kheen heirouri Israel rapbei hangra Jacobei cheemkhur-bommairei thimirap thacha himaleithungrou; heitoubi yarap heiri yaya maniwurbi lim rapya ningmarshikbi malungamni leikhoumarou, heiya yarapne Israellei Khatpatom khoi Umpuya nanchabine malungambi leirouwa.

²¹ Shear-Jashub touri Jacobei cheemkhur-bommairei himaleithung thimirap thachani Mane-Mantrang Dunpunung yenkallengeirou.

²² O Israel, neiyei thimi rapne samadru ruirei shitnrui naksine mshing chungbinekhi, yaihangrei himaleithung thimirap thachani yenkallengeirou; heitoubi chimmei picharya toubine toumangurou.

²³ Kouweiyo toulanungri Thangwan-Shimleiyei Pu Umpune mardingpikur tloubomrap hilthungni tlaipangpal namyerwa heiri tumne mangyerrouwa.

²⁴ Heitounei ngammei Thangwan-Shimleiyei Pu Dunpune asitoubi yunlei, “O Zion'ra paalbi klei Keiyei thimirap, Egyptbei touwurkhou heinaksine, yaiyei cheishu lhangbine (khangbangbi) naya umchaalsundakur Assyria rapya nani chimaklo.

²⁵ Kouweiyo toulanungri kheen lepchaei hillouri naidoura Keiyei meithukei malungkhakur heiwari dongurbi, heitoubi Keiyei malungkha heiwari Assyria'ya mangyernanungei lhangra hollhakrouwa.”

²⁶ Heirouri Thangwan-Shimleiyei Pu Umpune Midian rapya Orebei thlungkhanra umhatkur heinaksine Assyria rapya umhatrouwa; heitoubi Aiyei cheishu heiwari Ane Egyptbei doura khangbangkur heinaksine samadruei doura khangbangthurouwa

²⁷ Heisitoubi tlaini heirouri asitoubi hungthukrouwa touri, Assyria'yei putkhrit heiwari naiyei khlabangrei lousundarouwa, heitoubi aiyei putpu heiwakhi nai ngakkhungrei louthutpirouwa, ngamri Umpune nayari shirek teipiwurla.

Assyria Rapni Raal Dakur

²⁸ Assyria'ne Rimmon'rouwei kawurbi, Aiath'ra kachangkur, heitoubi ani Migron'ra heirallhakur; heitoubi Michmash'ra aiyei hutshu rapya marpeibi khoulhakur.

²⁹ Heirou yani lamtla tlani heiralwurbi, heitoubi masa khatri Geba'ra mathrilbi yarekwurkhou; heirouri Ramahyei thimi rapri chitekwurbi kanchunwurchiya, heirou Saulyei Gibe-ah'rei thimi rapkhi loutrukwurchiya.

³⁰ Nane hou chouni ungraobi raal paolaklo, O Gallimei chanapuiya'rap! Louningpilaklo Laishah! Anungei loumallangpilaklo Anathoth!

³¹ Madmenah'ri trukwurchiya, heirou Gebim'rei klei thimi rapri yulnanungei bi raphabi trukchabi leiwurchiya.

³² Heiyanungkhi angtu tlainirouri ari Nob'ra kan-nganbi leikhourou, heitoubi ani Jerusalemei Zion Lhungdourei chanapuiya rapnung aihut katyapkhourou.

³³ Thilak, Thangwan-Shimleiyei Pu Umpuei kngak khatdei thang'allei mantrangni heengtrung rapya banrap namma dangsundarouwa; heitoubi heengtrung choudui rapyakhi shendeekchirouwa; heirou napaltou thimi rapyakhi taangsundawurbi rikrai phayerouwa.

³⁴ Chetkur heengyao rapya Ane Aiyei reini shendeekrouwa; heitoubi Lebanon'khi Mane-Mantrangei Pu Dupune kanelyerouwa.