ISAIAH 1 - KHYINGEI PU'TLOU Bible (BSI)

Dunpuei Thimi Rapbei Khril Lhangaimak Lhou

¹ Judah'yei Krungrap Uzziah'le, Jotham, Ahaz heirou Hezekiah'ne thrungei krungchaanrou, Amoz'yei chanapawa Isaiah'ne Judah'le Jerusalemei ngamrou asitoubi kar'anmukhou.

Judah'yei Lhangaimak

² “Loumayeklaklo, O thangwanrap, heirou louningpilaklo, O tlaipang-shimlei; Kouweiyo toulanungri Pu Umpune yunlei: ‘Keine chanao rapya yukbaangbi tangthutyerpila, heiya yaneri Keidoura karhani raal youlei.

³ Halpani aiyei puya shak mumanrelei, heirou gadha'nikhi aya msuina halshangya bi kmu; heiya Israel'neri Keiya mupimaklei, heirou Keiyei thimi rapneri phab dapimaklei.’

⁴ Ulleiyo, borh klei limrap, mralni thimmurame; khril thuithi thimi rapbei yu-charap, tuycha-lalcha thimi rapbei chanaorap! Ya rapne Umpuya horkhouwurla; yani Israellei Khying Puya yapimakura, heitoubi mai kallekthutdura.”

⁵ Kounungei hanui kallengne naya tanti piyerrouwo? Kounungei nani heisi raal youbi leirouwo? Nailuri hemwurchiya, heirou naiyei solungri lhawai lahwurbi marhuisundawurchiya.

⁶ Homai'rouweine lu kaphani sharung namma msei makna bi touri makura, hemna bi, naikhorna bi, heirou tringlhangbi hee thukna bi rapne thimmura; nai namthutbi damnanungei phitumne lhombine yumphobpikur toukhi makura. Heirou shirek teipikhi toumakura.

⁷ Nai ramri taakkurchiya, heirou nai khukarthil rapkhi meine kaangtumwurchila. Naiyei yekul rapkhi nai mit'thrilna maibongra miram-mithril rapne kontumwurchila. Heirapri miram-mithrillei thimi rapne lukloubine heitoubi kontumbi taakyerkurnakura.

⁸ Heirou Zion'yei chanapuiya heiyari darkha yekulrei matru'nakni horbi khingurkhoula; heirou ya rapri mchanghei loumatru khingurkhou heinaksine, heirou yeekna thimi rapne kuikoolbi khoukur khukarthil naksiyura.

⁹ Pu Umpune kaya thacha horkhoubine ringyerkhoumanungri, Kakhi Sodom'le Gomorrah naksine hoiyurarou.

¹⁰ Sodomei ruipipu yama uparap, Umpuei tloulhangya louningpilaklo! Gomorrah'yei thimirap nani kai Dunpuei Chaytlouya ninglhakpilaklo!

¹¹ “Nai seomanpungkur malamput rapne Keinungei kouya tounarouwo?” toubi Umpune yunlei. “Meira hongbi makatnungei malan put, yaopa raple halpa rapbei anyaori Keinungei marthumni leiyura. Keiri halpa rapbei, yaopa rapbei, nimanung tlangpa rapbei heeya madumak.

¹² Nane Keiyei maibongra wachangeinung, Keiyei Pucheem yuntlangmaira huni naya ho trumlaklo toubi shun?

¹³ Karshukmak malamput rapri hanui kallengne heilhakpimaka, Naiyei mrohkun iknei khrim heiwari Keinungri machinkna; Tangla-ran, Sabbath heirou naiyei Khulbung kartilbi knei lhunnei borh heiwakhi Keiri doukanthrambi leiheimakura.

¹⁴ Naiyei tangla-ran knei, heirou kartinkur knei lhunrap heiri Keinungri machinkna. Knei lhun heirapne Keinungei putkhrit hoinawura; heirou heirapne Keilhawai lahyerwurbi douchangmakura.

¹⁵ Nane naihut mlamthutbi shunchayei kheenrou Keiyei mitri nairouwei louyullurou; Kounakpi nani tlani shunchabinekhi, Keine naya ninglhakpimakrou; Ngamri naihutri heene mraowurchiya.”

¹⁶ Naitam choumthaibi marthingyerlak; Keiyei mithrilnarei naiyei borh toukurya louthutdurlak; Heitoubi khril lhangaimak borh lhou tounarei donglaka.

¹⁷ Lhangaiyei lhouya tounungei marnolak; Tharmu chimya raphalhaklak; marhotpikurya touchimpilak; Pui-pa mak saracha rapya trungpilak, heitoubi trulmeiwi rapnung'tlim tlou yunkalpilak.

¹⁸ “Asinung hungalo, kani omkarhungbi tlou semrillase,” toubi Umpune yunlei. “Naiyei borhni heenak mraobikhi, heirapya thurnakni ngouyerpirou; heirou heirapri tuysomyui naksine mraowurbikhi, heirapya yaokhmul naksine ngouyerpirou!

¹⁹ Kounakpi nani ukrei tlou khoine yapibi shunya chanthunganungri, nani ram heirouwei hei lhangaiya chamurou.

²⁰ Heiya kounakpani yapimakni raal youlanungri nari raalshonra hichirou. Ngamri awari Umpuei murni shunthutdurkhoula.”

Jerusalem'ri Chorit Naimakura

²¹ Malungamkna Kholilni koutoubi chorit naimakurrawo! Bongnung chaan khatrouri tharmu chimni bil thimkhou; chim lhouni anungei bil-thimni leikhou; heiya asinungri thimi hatkrilni bil thimmura.

²² Neiyei kulshan rapri thirdithil hoiyurchiya; heirou neiyei darkha yuiri yuiding marhaowurchila.

²³ Neiyei yama krung rapri raal kyou thimirap hoiyurchiya, heirou mucha thimi rapkou palui hoiwurchiya; thimi napung-kantangni tuy chanei lhouya maduwurchiya; heitoubi klahman hutthul rapya phananungei thiphawurchiya. Pui-pa mak saracha rapyari ngaaksilpimakura, heirou trulmeiwi rapnung'tlim yuntrungpinei tlouri yai maibongra wathukmakura.

²⁴ Heingamei Israellei Mane-Mantrangei Pu, Thangwan-Shimlei khintamei Dunpu Umpune yunlei: “Ah! Keiyei yeekna thimi rapbei doura Keiyei malungkhaya thrahnanungei, Kei'mshani yaidoura khlang lhakrouwa.

²⁵ Naidoura karhani Keihut khoupirouwa, heitoubi naiyei thirdi rapya iksoubi yayerkur heinaksine nairouwei borh nammaya louthutdurbi marthingpirouwa.

²⁶ Heitoubi naiyei pichar pu rapya Keine haallei naksine mallenglhakpithurou. Heirou naiyei tlou sempipu rapya youtirrei naksine kallenglhak'yerpirou. Heihillouri nani Kholil heiwaya tharmuchim heirou malungamkna Kholil toubine ungthurou.”

²⁷ Tharmuchim heiwane Zion'ya lhukthutpirou, Heirou aiyei rillei klei thimi rapkhi, ukning hungnei ngamrou yaya kalpirou.

²⁸ Heiya lamdui thimi raple, borh thimi rapyari pulni mangyerrouwa; Heitoubi Umpuya horwurbi khingurkhou thimi rapri hungmangurheirou.

²⁹ Nane malungamdop bok'heeng holira thrai khrumkhou heiwane naya rikrai phayerheirou; heirou naiyei solungni madubi khalthutkur yekul rapne nayari rikrai phayerheirou.

³⁰ Kouweiyo toulanungri nakhi heengna trulkur bok'heeng naksine hoiyeirouhui; Heirou yui phamaknei yentaarkur yekul naksine leiheirouhui.

³¹ Heirou mantrang thimi rapri beekbaihar naksine hoichirouwa; Heitoubi yai touthutkur lhourap heiwane meirik hoinarouwa. Heitoubi ya-khintam rekya kaangtumrouwa. Heirouri mei bulmitpirou thimiri hukhatkhi makrouwa.