HOYOUNA 9 - KHYINGEI PU'TLOU Bible (BSI)

(5) Egyptbei Ui-waa Rapbei Doura Phar'knani Shardakur

¹ Heirouri Umpune Moses'nung shun, “Pharaoh'yei leinara wachangbi heitoubi anungei washunpilak, ‘Hebrewa rapbei Dunpu, Umpune asitoubi shunlei: Keiyei watlhou tounanungei Keiyei thimi rapya malhetthutlak.’

² Kounakpi nangni yaya malhetthutmakni, asilumpha yaya manphopbi khourou dawanungri;

³ thilak, Umpune Aiyei hut'hakni pharthrai yensundabi, phailourei klei neiyei ui-waa rapbei doura, sapukrap, gadharap, utrap, halrulrap heirou yaorul rapbei dourakhi namma thuithini shar'dayerrouwa.

⁴ Heiya Umpune Israel raple Egypt thimi rapbei ui-waa rapbei tlakra khaithutbini kartlikyerrou; heisitoubi Israel thimi rapbei ui-waarap touwei'mkheiri koukhatkhi hiwurbi rielmakrou.”

⁵ Heirou Umpune heinung'tlim kheenkhi kartinbini shun, “Kyun tlou awari ninga tlainihak Umpune ram aei rilla thukyerrouwa.”

⁶ Heisitoubi thangei tlaini heirouri shunthutkur hilthungni Umpune lhou touthutkur; heirouri Egyptbei ui-waarap namma hitlumkur; heiya Israel rapbei ui-waa rapri khatchatomkhi himakur.

⁷ Heirouri Pharaoh'ne thimi malhetbi thiyernarouri, Israel rapbei ui-waa rapri khatchatomkhi himakni louklei mukur. Heiya Pharaohyei ukningri kalwurthubi, heirou ani thimi rapya malhetthutmakurthu.

(6) Rchung Wayerbi Nayerkur

⁸ Heirouri Umpune Moses'le Aaron'nung shun, “Naihutni meikarei udya thacha chaaploulak, heitoubi Moses'ne Pharaoh'yei maibongra mayungbi nungthou lhangra thekbaanglaksu.

⁹ Heirou udrap heine Egyptbei ramra rahui khoini yongdawurbi Egyptbei ram karyouni klei thimi rapbei dourakhi heirou ui-waa rapbei dourakhi dabaangbi yaiyei sharungra rchung khoini msei knaini heiporthutrou.”

¹⁰ Heisitoubi yaihutni meikarei ud rapya chaaplouheikur, heitoubi Pharaoh'yei maibongra wamayungbi, heitoubi Moses'ne udrap heiwaya nungthou lhangra khrebaangkur; heirouri udrap heiri thimi rapbei doura heirou ui-waa rapbei dourakhi dabaangurbi, heitoubi yai sharungra msei knaini rchung heiporthutbini narilkur.

¹¹ Heirou thuikhei thimi rapnikhi rchung porwurchinei ngamrou yani Mosesyei maibongra wabi mayungchang'makura; ngamri rchung'kna heiwari thim rapnungkhi heirou Egyptbei thimirap nammaei dourakhi beimakni narilkur.

¹² Heiya Umpune Pharaoh'yei ukning kalyerwurthu; heitounei Umpune Moses'nung shunthutpikhou heinakrimni Pharaoh'ne yai kyun tlouya ninglhakpimakur.

¹³ Heirouri Umpune Moses'nung shun, “Ningshun manma kanthoubi, heitoubi Pharaoh'yei maibongra wamayungbi anungei shunpilak, Hebrewa rapbei Dunpu, Umpune asitoubi shunlei: Keiyei watlhou tounanungei, Keiyei thimi rapya malhetthutlaklo.

¹⁴ Kouweiyo toulanungri, trum arouri Keine neidoura, heirou neiyei shok rapbei doura, heirou neiyei thimi rapbei dourakhi Keiyei pharkna namma yongdayerrou; heirouri tlaipangpal nam'rouwei Keinaksi Umpu deiri hukhatkhi makme touri nangni mupharouwa.

¹⁵ Kouweiyo toulanungri, Keine asinunghak Keihut khangbaangbi neiyale heirou neiyei thimi rapbei doura pharknani norbomkhi thukkura, heitoubi neiyari tlaipangpal arouwei louthutkurkhi yawura.”

¹⁶ Heisiya hoiyanungkhi, nai maibongra Keiyei toumaniya mutnanungei toubine, heirou naingamrou Keiyei minya tlaipangpal karyouni chainanungei tounei ngammei Keine neiyari asilumpha ringyerbini khoupilei.

¹⁷ Heitounei ngammei nangni Keiyei thimi rapbei maibongra neitamtom tangchawurbini, Keiyei thimi rapya nangni malhetthutmakni khouleihui.

Nunghei Dayerbi Shar'dayerkur

¹⁸ “Thilak, ningari kheen ahakrou, Egypt toubi ung ram awane paalkanthoule angtu ramphaei rilla tekkhi mukhoumak nungheiya Keine rosundayerrou.

¹⁹ Ngam heineri asinunghak, neiyei ui-waa raple heirou neiyei loutlairei klei trunwairap nammakhi deekhrombi maangmaknanungei markumlaka. Koungameiyo toulanungri, cheemra markumlhakmakni klei thimi kantang, heirou loutlairei heirou ramhangrei louklei ui-waarap heiri nungheini nanglanungri namma hiwurchirouwa.”

²⁰ Heirouri Pharaohyei shok rapbei tlakrei Umpuei chaytlouya chi-rikraini kning shok khatpani aiyei shok rapya heirou yaiyaiyei ui-waa rapya cheemwaira markumlhakyerkur.

²¹ Heiya Umpuei chaytlouya tloukhoini loulhakpimak shok rapneri ai'aiyei thimi raple heirou ui-waa rapyari loutlaira lakurkhou.

²² Heirouri Umpune Moses'nung shun, “Nungthou lhangra neihut katkhangbaanglak, heiyanungri Egyptbei ram karyouni nunghei rosundarou; heirouri Egyptbei ram karyouni klei thimi rapbei dourale, ui-waa rapbei dourakhi heirou heengna-rohna rapbei dourakhi nungheini nangsundarouwa.”

²³ Heirouri Moses'ne aiyei cheishu heiwaya nungthou lhangra khangbaangkur, heirouri Umpune lhimnung-martheetang katfyouyerbi, liptlai alnei meile kalhonni tlaipang doura nunghei rosundayerkur. Heisitoubi Umpune Egyptbei ramra nunghei dayerkur.

²⁴ Egyptbei ram heiwani lim khat khoini paalkanthoutirrei waiyoubini tekkhi thuk'khoumak lhouthuk khat khoini nungheile liptlai alnei meile marhaobi thuithiyei nunghei dakur heiwari Egyptbei ram karyouni thukkur.

²⁵ Heisitoubi nungheini Egyptbei ram karyouni ramhangrei louklei thimi kantangkhi, ui-waa rapkhi, heirou loutlairei klei anna-louna rapkhi, heirou ramhangrei klei heengtrung-ramtrungrap nammakhi nungheini nangchaallhakbi maangurchiya.

²⁶ Heiya Israellei chanao rapbei paalnaram Goshen toubi ung bi heiwatomri nunghei dayerpimakur.

²⁷ Heirouri Pharaoh'ne Moses'le Aaron yakhuntaya ungyerbi, heirou yanungei shun, “Kheen ahakroukhi keine klallei lhouya touwurthula; Umpu heiri tharmu chimhakme touri keine muwurla; heirou keile keiyei thimi rapri khril lhangaimakthil.

²⁸ Heineri Umpunung shunchapilaklo, kouweiyo toulanungri, nungkhungnei houle, nungheile markotbini rosundakur heiwari thuithiyachakura; heirou nayari keine malhetthutpirouwame, nani hanui kallengni keikou leikhoumakroume.”

²⁹ Heirouri Moses'ne yanungei loushun, “Keine khukarthil arouwei wathukkurle tallengni, Umpunungei keihut khangbaanglanungri, nungkhungkhi dongrouwa, heirou nungheikhi kallengni damakarou; heirouri tlaipangpal awari Umpueime toubi nangni murouwa.

³⁰ Heiya nangle neiyei shok rapneri Dunpu, Umpuya chi-rikraimakroume touri keine kmu.”

³¹ (Heiya pad'trung raple mumcha trung rapri nungheini nangchaalwurchila, ngamri kheen heinungri mumcha rapri heiyei kal'hui, heirou padri par umyeikal'hui, heingammei nungheini nangchaalbi khrom'maangkur.

³² Heiya gehule chyuncha rapri hiltoei pukthutnei ngamrou, yayari nungheini nangchaalmakura.)

³³ Heisitoubi Moses'ne Pharaoh'yei birouwei wathukkurbi, khukarthillei pura mayungbini, Umpunungei aihut khangbaangbini shunchakur; heirouri nungkhungkhi trimmura, heirou nungheikhi rosundamakura; heitoubi tlaipang thleidoura nungkhi romakura.

³⁴ Heiya Pharaoh'ne nungkhi romakura, nungheikhi damakura, heirou nungkhungkhi dongurame toubi munarouri, ani hanuikhi klal lhou touwurthula, heirou aiyei ukningkhi, heirou aiyei shok rapbei ukningkhi kal'lhakurthuwa.

³⁵ Heirouri Pharaoh'ne aiyei ukning kal'lhakurbi, Umpune Moses'nung shunthutkur heinakrimni, Israellei chanao rapya ani malhet'thutmakni khoupiwurthu.