HOYOUNA 6 - KHYINGEI PU'TLOU Bible (BSI)

Dunpune Lhou Tounungei Kantompikur:

¹ Heirouri Umpune Moses'nung shun, “Asinungri Pharaoh'nung Keine kouya touleiyo touri nangni mupharouwa; kouweiyo toulanungri, Keine aya kalni tranlhakyei kheenrou ani yaya malhetthutpirou, heirou kalni tranyei kaalnangri ani yayari aiyei ram'rouwei hulthutdeirou.”

² Heirou Dunpune Mose'nung shun, “Keiri Umpume;

³ heirou Keine Abraham, Isaac heirou Jacobnung Mane-Mantrang Dunpu khoini yanungei mukandangyerkhou; heiya Keiyei min khoini Umpu toubi Keine yanungei mutpikhoumak.

⁴ Heirou Keine yakou kalhonni, yai ramtaangbi yenchaheina Canaan ramya yanungei piroume toubinekhi mardingpikhou.

⁵ Heiyakhi duinara Egyptbei thimi rapni kulchalphopbi khoukur Israel chanao rapbei klah-mrimni ungraochaei chapkur heiwakhi Keine loumayekurla; heirouri Keiyei mardingkhouya Keine ningthutkur.

⁶ Ngam heineri, Israellei chanao rapnung shunpilak, ‘Keiri Umpume, heirou Keine nayari Egyptbei putkhrit bom'rouwei urthutloubi, yaiyei minai bom'rouwei naya lhukthutpirou, heitoubi Keiyei hut lamthutbini, tangni pichar toupile kalhonni naya kalthutpirou.

⁷ Heitoubi Keine naya loubini Keiyei thimi hoiyerrouwa, heitoubi Keine naiyei Dunpu hoirouwa; heirouri nani murou touri Keiri Umpu, naya Egyptbei naibomrei putkhrit daakrei kalthutpikur naiyei Dunpu.

⁸ Heirou Keine Abraham, Isaac heirou Jacobnung piroume toubi kantompikur ramya nanungei Keine pirou, heirou ram heiwayei naiyei paalnanungei hoiyerrouwa, ngamri Keiri Umpu.’ ”

⁹ Heisitoubi Moses'ne Israellei douwa rapnung shunpikur, heiya yaneri Moses'yei shunpikur tlouya ukrei tlou khoini ninglhakpimak, ngamri yaiyei naibom heiwari thuithiachaknei yai ukning heiri beimakni mandikur.

¹⁰ Heirou Umpune Mosesnung asitoubi shun;

¹¹ “Wachangalo, Egyptbei Krungnung washunlak, Israellei chanao rapya aiyei ram'rouwei malhetthutbi shaalyerlaksu.”

¹² Heiya Mosesne Umpuei maibongra loukyun, “Thilak, Israellei thimi rapni keiyei shun tlouya ninglhakpimakme; keiri tloukhi lhangaini yunchangmak; koutoubi Pharaoh'ne keiyei kyun tlouya louninglhakpirouwo?”

¹³ Heirouri Umpune Moses'nungle Aaron'nung shunbi yanungei lhou silnakur, heitoubi Egyptbei Krung Pharaohyakhi shunbi, Israellei chanao rapya Egypt ram'rouwei ruithutnanungei watyilkur.

Israellei Cheemkhur Uparap

¹⁴ Yarap heiri yai nutar-patar rapbei cheemkhur uparap. Israel'yei chanapawa samran Reuben'yei cha napawa rapri: Hanoch, Pallu, Hezron heirou Carmi, heirapri Reuben'yei bommairap.

¹⁵ Heirou Simeon'yei cha napawa rapri: Jemuel, Jamin, Ohad, Jachin, Zohar heirou Shaul. Yarap heiri Canaania nyullei pukkhou cha napawathil. Yarap heiri Simeon'yei bommaithil.

¹⁶ Heirou yarap heiri yai shullam hilthungni thulpikur Levi'yei chanapawa rapbei minrap: Gershon, Kohath, Merari; heirou Levi'yei chaanri kum machale somthumle eni phani pulchikhou.

¹⁷ Gershon'yei cha napawa rapri: Libni heirou Shimi; yarap heiri yai bommai'yei minlamthil.

¹⁸ Heirou Kohath'yei cha napawa rapri: Amram, Izhar, Hebron heirou Uzziel; heirou Kohathyei chaanri kum machale somthumle khyumbil tlungni pulchikhou.

¹⁹ Heirou Merari'yei chanapawa rapri: Mahli heirou Mushi; yarap heiri yai shullam hilthungni yenraankur Levi'yei bommaithil.

²⁰ Heirou Amram'ni aiyei pawaei char, Jochebed'ya nu khoini loukur; heitoubi ani Amram'nung Aaron'le Moses'ya pukpikur; heirou Amram'yei chaanri kum machale somthumle enibil tlungni pulchikhou.

²¹ Heirou Izhar'yei cha napawa rapri: Korah, Nepheg heirou Zichri.

²² Heirou Uzziel'yei cha napawa rapri: Mishael, Elzaphan heirou Sithri.

²³ Heirou Aaron'ne Amminadabei chanapuiya, Nahshon'yei charwi Elisheba'ya nu khoini loukur; heirou ani Aaron'nungei Nadab heirou Abihu, Eleazar heirou Ithamar'ya pukpikur.

²⁴ Heirou Korah'yei chanapawa rapri: Assir, Elkanah heirou Abiasaph. Yarap heiri Korah'yei bommairap.

²⁵ Heirou Aaron'yei cha napawa Eliazar'ni Puti-el'yei cha napuiya rapbei hangrei khatya nu khoini loukur, heitoubi ani Eliazar'nung Phinehas'ya pukpikur. Yarap heiri Levi'yei bommairei yenraankur yaiyei cheemkhur yama upathil.

²⁶ Moses heirou Aaron'ya Umpune asitoubi shunpikur, “Israellei chanao rapya yai lingthral hilthungni Egypt ram'rouwei ruithutlak.”

²⁷ Heirou ya napung khni heine Egyptbei Krung Pharaoh'nung Israellei chanao rapya Egyptrouwei malhetthutlaklo toubine shunchakur. Yarap heiri Moses'le Aaron.

Aaron'ne Moses'yei Rungkhlangra Tlou Yunpi

²⁸ Heirou Umpune Moses'nung tlou shunninang Egyptbei ramra asitoubine hungthukkur;

²⁹ touri Umpune Moses'nung shunbi asitoubi kyun, “Keiri Umpume, Keine neinungei shunpikur tlou rapya Egyptbei Krung Pharaoh'nung shunpilaklo.”

³⁰ Heiya Moses'ne Umpuei maibongra loukyun, “Thilak, keiri tloukhi lhangaini yunheimak thimime, heineri koutoubi Pharaoh'ne keiyei kyun tlouya ninglhakpirouwo?”