HOYOUNA 4 - KHYINGEI PU'TLOU Bible (BSI)

Moses'nung Mantrang Pikur:

¹ Heirouri Moses'ne loumallangbi kyun, “Yane keiya uklumpima'nungri, nimanung keiyei kyunya ninglhakpimaka'nungri kousi touserou? Ngamri yani asitoubi louyunkhi kya, ‘Umpune neinungei muyerpikuri koukhi makme.’ ”

² Heirouri Umpune anungei shun, “Neihutrei shinbi klei heiri kouweiyo?” Heirouri ani loumallang, “Awari shungkrokme.”

³ Heirouri Ane shun, “Shungkrok heiri thleira khingsundalak.” Heisi tounarouri ani cheishu heiri thleira loukhingsundakur, heirouri cheishu heiwari frul heiholkur; heirouri Moses trukthutkur.

⁴ Heiya Umpune Moses'nung shunkur, “Neihutbang heilamthutlak, heitoubi khmeira yukmanlak.” Heisitoubi ani aiyei hut lamthutbi yukmankur, heirouri frul heiri aiyei hutdoura cheishu heiholwurthu.

⁵ “Heiyanungri yaiyei pawa rapbei touri Abraham, Isaac heirou Jacobei Dunpu, Umpune neinungei muyerpikurme touri yani uklum'rouwa.”

⁶ Heirou Dunpune heiya duinarakhi yanungei shunpithu, “Asinungri neihut heiri neiyei khyadakra yukthunlhaklak.” Heisi tounarouri ani aihut heiri aiyei khyadakra thunlhakbi khoukur, heitoubi ani hanui yuklouthutdei kaallouri, thilak, aiyei hutbur heiwari raichi paatdurbi thur popkurnaksi ngoukur.

⁷ Heirouri Ane shun, “Neiyei hutbur heiwari hanuikhi neiyei khyadakra yukthunlhakthulak.” Heitounei ani hanuikhi aiyei hutbur heiwari aiyei khyadakra thunlhakthu; heitoubi aihutbur heiwari aiyei khyadakrei yuklouthutnarouri, thilak, heiwari aiyei sharung deirei hak'unnaksini karbillura.

⁸ “Heirouri asitoubine hungthukheirou,” Dunpune shunlei, “kounakpi yani neiya uklumpimanungri, nimanung neiyei lamkriyei kyun tlou rapyakhi ninglhakpimanungkhi, neiyei hiltoei shunpikur tlou rapbei hutlha rapya yani uklumkur kya.

⁹ Heiya yani hutlha khintam'rekyakhi uklumpimanungri, nimanung neiyei kyun tlouya ninglhakpimanungri, heirou nangni Nile kungrei yui thacha shukloubini heitoubi thlei taarnara shungsundalak; Heiyanungri neiyei Nile kungrei shukloukur yui heine thlei taarna doura hee holrouwa.”

¹⁰ Heiya Mosesne Umpunung loushun, “O keiyei Umpu, keiri tlouyun-tlouyaikhi heimak, Nangni Neishok keiya churungknani muyerbi shunpibongnangkhi, heirou asinungkhi keiri miyei maibongra tlou yunmani thimi nimakme; heiya keiri tlou ak'aknei ngamrou lhangaini yunchangmakme.”

¹¹ Heirou Umpune anungei shun, “Tlaipang thimiyei murri hui'sheempi? Nimanung aiyei tlouthukmak nimanung khnasitri, nimanung mit deori huni hoikyer? Heiwari Umpu Keine hoikyer nimakeiko?

¹² Heiyanungri nangri asinunghak hunglaka, heirou Keine, Keihakni neiya kalhonpirou, heirou neiyei yunthutnungei tlourap heiri Keine shunmatupirou.”

¹³ Heiya ani loukyun, “O keiyei Umpu, keiyei shuncha'kniri, kringpibi Neiyei watyilkni thimi khatya hilpilaklo.”

Aaron'ya Moses'yei Runghutra Tlou Yunkyer:

¹⁴ Heitounei Umpune Mosesyei doura meithukni malungkhakur; heirou Ane shunkur, “Lev cheemkhurrei Aaron heiri neiyei teinao nimakko? Ari tlou lhangaini yunkheime touri Keine kmu. Heirou heiyakhi duinara, thilak, ani neiya murillou toubi walei; heirou ani neiya murillanungri, aiyei ukningra beimakni malung'pilrou.

¹⁵ Heitoubi nangni anungei tlou heishunrou, heirou aiyei murni neiyei heishunkur tlou rapya heisi louyunthutrou; heirou Keine, Keihakni neiyei murya heirou aiyei muryakhi kalhonpirou; heirouri nakhuntani kou tourouwo touri Keine shunpirou.

¹⁶ Heiyakhi duinara ani neiyei runghutra thimi rapnung tlouyunpi thimi hoirou; heirou a heiri, neiyei murhaknakni hoirou; heitoubi nangniri yanungei Dunpu'naksine hoirou.

¹⁷ Heirou shungkrok awari neihutra shinlakka, heitoubi awayei ngamni nangni kngakei hutlha rapya touthutdeirou.”

¹⁸ Heirouri Moses'ne shaallurbi, aiyei puwa Jethro'yei leinara kallengkur; heirou ani apuwanung shun, “Keiyei shuncha'kniri, kringpibi keiya shaalyerlaka, heiyanungri keine Egyptrei klei keiyei teinao rapbei leinara kallengeise, heitoubi yarap heiri asilumpha ringleihuiko toubine hungthiyeise.” Heirouri Jethroni Moses'nung, “Malungdamni shaallakano!” toubine loushun.

Moses'ne Egyptra Yenkallengkur:

¹⁹ Heirouri Midian ramra Umpune Moses'nung shun, “Shaallakka, heirou Egyptra kallenglaka, ngamri neiya hatnungei rapha thimirap heiri namma hiwurchiya.”

²⁰ Heisitoubi Mosesne aiyei nule, heirou aiyei chanao rapya ruilouheibi, gadha doura tungyerbini, heitoubi ani Egypt ramra yenkallengkur. Mosesne aihutra Dunpuei cheishu heiwakhi shinloukur.

²¹ Heirou Umpune Mosesnung shun, “Nangni Egyptra kallengbi, heirou Keine neinungei pikur kngakei watlhou rapya, Pharaohyei maibongra hungtouthut'thilak; heiya Keine aiyei ukningri mantrangyerrou, heitounei thimi rapya ani malhetpimakrou.”

²² Heirouri nangni Pharaohnung, “Umpune, ‘Israelri Keiyei chanapawa Samranme,’ toubi yunlei.

²³ Heineri Keine neinung shunlei, ‘Keicha napawa heiwaya malhetthutlak, heitoubi ani Keiya watlhou toulaksu,’ Heiya nangniri aya malhetthutmakura, heineri thilak, Keine neiyei chanapawa samranya hiyerrou,” toubine shunlaka.

²⁴ Heirou asinungri asitoubi hungthukkura, touri Egypt'ranung hungna lam bi'khatra yarekyeinung Umpune aya loumurilbi heirou Umpune aya hatnungei raphakur.

²⁵ Heirouri Zipporah'ne thlunghar rim'khraat khat khulloubini, heitoubi aiyei cha napawaei sermur msurrei un taangloubini dankur, heitoubi Mosesyei ho'pongra khingsundabi heirou ani kyun, “Nangri tanghakni heeyei hutlha pikur keiyei shal'hakme.”

²⁶ Heisitoubi Umpune aitamtomya lakurkhou. Ngamri kheen heirou Zipporah'ne shun, “Nangri murdannei heeni hutlha hoiyerkur keiyei shal khatme.”

²⁷ Heirou asinung naneri Umpune Aaron'ya shun, “Ramthingra wabini Moses'ya wamurillak.” Heisi tounarari ani wawurbi Dunpuei Lhungdoura Mosesya wamurilkur, heitoubi aya machuppikur.

²⁸ Heisitoubi Mosesne Umpuei yanungei watyilnei shunpikur tlourap, heirou yanungei silnakur hutlharap nammakhi Aaron'nung yunpikur.

²⁹ Heirouri Moses'le Aaron'ne chawurbini heitoubi Israellei yama upa rapya khumtilkur.

³⁰ Heirouri Moses'nungei Umpune shunpikur tloulhangrap nammaya Aaron'ne yunthutpikur. Heirouri ani thimi rapbei maibongra kngakei hutlharap kounakkhi touthutbi mutpikur.

³¹ Heisitounei thimi rapni uklumkur; heirou Umpune Israel rapya yeelthikur, heirou yaiyei klah-mrimkurkhi Ane mupiwurlame toubi Yane mayeknarouri, Yane yaiyei lu sikhuplhakbini Aya khrumchakur.