HOYOUNA 25 - KHYINGEI PU'TLOU Bible (BSI)

Pucheemra Malamput Makatnei Lammitrap:

¹ Heirouri Umpune Moses'nung shun:

² “Israellei thimi rapnungei asitoubi shunpilak, touri yani Keinungei khrumna put makatlaksu; heirou yaiyei ukningra pi'knile kalhonni Keinungei makatbini pithutkur putcheirap heiri nangni loulhakkhoulak.

³ Heitoubi nangni yairouwei thraibaangnungei makat putrap heiri: Sina, lapathir, heirou kulshanthir.

⁴ Heirou phaikhring phi kim khmongdup, nungthou kim, heirou hee kim, heirou phaikhringei phiyeng, heirou tlang'khmulkhi markumbaanglak.

⁵ Heirou mrao'kim sangphangkur yao'un rapkhi, nunghog'un rapkhi heirou Shittim heengkhi khumbaanglak.

⁶ Mei waarnungei shirekkhi, mnuina shirek shumnungei hei lungrap, heirou khrim muiknam iknungei mroh kunkhi markumlak.

⁷ Onyx thlungkwaar, heirou thlung kwaar deideikhi markumbini, linglikchul heiyei malungpak doura thruibangnungei markumlhaklak.

⁸ Heitoubi yaihanga Keiyei leinanungei yaya Pucheem khat sabangyerlak.

⁹ Keine neinungei shunmatupikur Pucheem Tabernacle sanei lammitrap tlungni sabangyerlak; heitoubi heiyei rilla khounungei shungyang putlamrap mshing tlungni sabini marshiklaksu.”

Mardingrilna Theengkung

¹⁰ “Heitoubi yani Shittim heengni Mardingrilna Theengkung khat, heiyei dungrani thong khnile lhang'khat shaangni, heirou heiyei homrani thong khatle lhang'khat paakni, heirou chourani thong khatle lhang'khat chouni salaksu.

¹¹ Heitoubi nangni Theengkung heiwari rillakhi heirou baorakhi sina khyingni lupbangrou da; heitoubi nangni heiwaya doura karhilni sinani kum sheembini mansambanglak.

¹² Heirou nangni sinani hutshi phalitam koolbini, Theengkung heiyei ho phalitamra hempoplak; hutshi khintamni khat lhangra hempoplak, heirou khintamni khat lhangra hempoplak.

¹³ Heitoubi nangni Shittim heengni putpu khintam sheembini, heitoubi heirapya sina lupbanglak.

¹⁴ Heitoubi nangni putpu rapya Mardingrilna Theengkung heiwaya chungcha yananungei, mnakrei hempopkur sina hutshi rilla thunringlak.

¹⁵ Putpurap heiri Theengkungei hutshi rapbei rilla ronlhakbi, tekkhi phuithutmakni khourou da.

¹⁶ Heitoubi Keine neinungei pirou'kyou Kantomrilnei hutlha heiri Theengkung rilla khoulak.

¹⁷ Heirou nangni sina khyingni Kringpi'kheiyei Omna khat, heiyei dungrani thong khnile lhang'khat shaangni, heirou homrani thong khatle lhang'khat paakni sheemlak.

¹⁸ Heitoubi nangni sinayei Cherubim'rap sabini, heirou heirapya hutsa karbilni chalbini, kringpi'kheiyei Omna msur thyoi-thyara mansambaangbini khoulak.

¹⁹ Heitoubi Cherubim khatni khatlhangei msurra, heirou cherubim khatni khatlhangei msurra khoubini, heitoubi Cherubim rapbei msur thyoi-thya heiri kringpikheiyei Omna msur khintamra karchurilyerrou da.

²⁰ Heirou Cherubim rapbei sharap heiri doura taangmherbi, yaiyai sharap heine kringpi'kheiyei Omna doura hupkhalyerrou da; heitoubi yai maikhi khatle-khat kallukrilbi, kringpi kheiyei omna lhangra kalleklhakyerrou da.

²¹ Heirou nangni kringpi kheiyei omna heiri Mardingrilna Theengkung doura khangbangbi khourou da; heitoubi Keine neinungei pirou kyou kantomrilnei hutlha heiri Mardingrilna Theengkung rilla khourou da.

²² Heitoubi bi heirouwei Keine neiya yongmurillou; heirou Mardingrilna Theengkung doura dunbi klei Cherubimni hupkhalkhou kringpikheiyei omnara leibini, Israellei thimi rapnung chay pinungei tloubomrap namma Keine neinungei yukshunpirou.

Phoryei Mumtol Khouna Turngdou

²³ “Heirou nangni Shittim heengni turngdou khat sarou da; turng heiwari dungrani thong khni shaangyerlak, heirou homni thong khat pakyerlak; heitoubi chourani thong khatle lhang'khat chouni salak.

²⁴ Heitoubi nangni heiwaya sina khyingni lupbanglak, heitoubi heiyei kumrakhi karhilni sina lupbangbini mansamlak.

²⁵ Heirou nangni heiyei rimra hutmainam khatdeimal paakni karhilni kum naiyerlak; heitoubi nangni heiyei rimra karhilni sinani kum sheembini mansamlak.

²⁶ Heirou nangni sinayei hutshi phalitam koolbini sheemlak; heitoubi hutshi heiri turng heiyei chithek phalitamra ho khatsolla huklhaklak.

²⁷ Hutshirap heiri rim kaphani kat'huklhakbi, turng heiwaya chungnanungei putpu ronlhak yananungei sheemlak.

²⁸ Heitoubi nangni Shittim heengni putpu khintam sheembini, heitoubi heirapya sinani lupbanglak; Heiyanungri heirapni turngya chungnarou da.

²⁹ Heirou nangni heirouwei yrengchanungei chakpang-kaikam, chukhrung-anthlei, chimailuk khumna, heirou borh mathainanungei yuiding shungkhouna lhingtang rapkhi sheemrou da; nangni heirapya sinani sheemrou da.

³⁰ Heitoubi nangni mumtolrap heiri turngdoura karyomni Keiyei maibongra marpeibini khourou da.

Sinayei Meitharl

³¹ “Heirouri nangni sina khyingni meitharl khat sheemrou da. Meitharl heiyei phampakle, heiyei mayungna chei heiri karbilni marchallou da; heirou meitharllei chei'ban rapkhi heirou heiyei msurra meishar dunnanungei par-um naksini kep rapkhi khatsol sheembini khourou da.

³² Heirou heiyei mnak thyoi-thyara chei'ban thruktam lamthutyerrou da; meitharllei khatlhang mnakra chei'ban khyumtam rungyerrou da; heitoubi khatlhang mnakrakhi chei'ban khyumtam rungyerrou da.

³³ Meitharl khatlhangei chei'ban khyumtamei doura almond heengban par-umle nabo kyaonaksi kok khyumtam sabini mansambangrou da; heitoubi meitharl khatlhangrei khyumtam dourakhi almond heengban par-umle nabo kyaonaksi kok khyumtam sabini mansambaangrou da; heisitoubi meitharl chei'ban thruktammei doura kok khatsol sabini mansambaangrou da.

³⁴ Heitoubi Meitharl heinungei almond heengban par-umle nabonaksi kok phalitam sheemthutrou da.

³⁵ Heitoubi meitharllei chei'ban bak'rungna rmid pu-kantangei daakra khatsol marchal'lhakrou da.

³⁶ Heirou chei'ban raple rmid kantangra parkok raple khatnakni karbilni hempoprillou da. Heisitoubi heirapya namma sina khyingnithil sarou da.

³⁷ Heitoubi nangni meisharkhi enitam sheembini, meitharl dourei kok rapbei doura warnungei dunbaangrou da; heirou meishar'rap heiya meitharl maibongrei klei nammaya munanungei waaryerrou da.

³⁸ Heirou meitharl shupop-shumitna meicheple heenglhing heikhi sina khyingni sarou da.

³⁹ Heirouwei changbomthuk putlamrap namma heiri sina khying talent khat loubini sarou da.

⁴⁰ Heitoubi heiyei changbomthuk putchei rapbei ngamrou, lhungdoura neinungei shunpikur hilthungni nangni thibini msing tlungni sheemrou da.