HOYOUNA 12 - KHYINGEI PU'TLOU Bible (BSI)

Ralthutpinei Knei Chaak-khaang:

¹ Heirou Moses'le Aaron'ne Egyptra leiyeinang Umpune shun:

² “A'tangla awari nanungei waiyouna tangla hoiyerrou; a'tangla awane nanungei kumserrei lamkri tangla hoirouwa.

³ Heirou Israellei kulyom nammanungei asitoubine shunpilaka, ‘A'tanglayei tlaini chipni hungtlunga'nungri, yani ai'aiyei cheemmai bomputdei khoini thoumine yaoshun khatsol marshiklaksu.

⁴ Heitoubi cheemmai bomputrap heini mandiyabi, yani yaoshun khatsol marshik manimanungri, yani ai'aiyei bommai thimi mshing hilthungni maironungei urkanrumrilbi marshiklaksu.’

⁵ Heirou nai urthutnungei yaoshun heiwari pa hoirou da, heitoubi aiyei sharungra msei naimak, kum khat phakur yaoshun hoiyerrou da; heirou heirapri nani yaorul hangrei nimanung tlangrul hangrei manthutkhi kya.

⁶ Heirou yaoshunrap heiri nani tangla heiyei tlaini chiple phalini hungphani khou kya; heitoubi Israellei kulyom nammani wakartilchibi, rawainang yaoshun heichaya hatrou da.

⁷ Heirouri thimi rapni yaohee thacha dongloubini, yai chamaina cheem heiyei shumtrum heengrap thyoi-thyarakhi heirou shumtrum dourei heengpheirakhi yaohee teiphangrou da.

⁸ Heitoubi anchum heiwari yani heiyei tlainiyei masanunghak meira roubini, heitoubi phri sikmak mumtolle heirou shimlimkhale kalhonni chamailourou da.

⁹ Heitoubi anchum heiwari khringni mainungei yamakrou, nimanung yui kyaoni butbi mainungeikhi yamakrou; heinung'tlimri meira roubini mairou da; yaoshun heiyei lukhi, ho rapkhi heirou khrilrangkhi kyaoni meira hongurlak.

¹⁰ Heitoubi anchum heiwari nani ningshun nungwarkhal phani maleiyernungei yamakrou; heiya ningshun nungwarphani maleikur hoiyanungri, maleikurei'mkhei heiwari nani meira hongurlak.

¹¹ Heirouri nani asitoubi chamairou da: ‘Nane shintlakrui chetni kaibi, heirou naiyei hora khorkhang tunglhakbini, heirou nai cheishurap heiwari naihutni shinbini heitoubi nani khnotni chamairou da; awari Umpuei Ralthutpinei Knei chak-khang khat.’

¹² Kouweiyo toulanungri, heiniyei masanungri Keine Egyptbei ram karyouni yenkarwaicharou, heitoubi Egypt ramrei chanapawa samranrap namyerya, thimi rapkhi heirou ui-waa rapkhi, Keine hatchirouwa; heitoubi Egypt ramrei thrai lharap namyakhi Keine pichar toubine maangyerchirou: Ngamri Keiri Umpume.

¹³ Heirou nani naileina cheem rapra teiphaangkur yaohee heiwani nainungei mu'kna hutlha khat hoirou; heitoubi Keine hee heiwaya mulanungri nayari raallurkhourou, heitoubi Keine Egyptbei ramya pharknani shar'dayerbi hiyerrei kaalnungri naidoura dayermakrou.”

Phri Sikmak Mumtol Chak-khang:

¹⁴ “Tlaini awari nanungei ningthutna tlaini khat hoirouwa, tlaini heiwari nani Umpunungei makatnei Kneitang khat khoini markhullou da; heirou naiyei yuthit-chathit rapbei chaanrou ramphani Khyingei Marngeinei Kneitang khat khoini markhulrou da.

¹⁵ Nane tlaini enini phri sikmak mumtol shairou, heiya lamkriyei tlainirouri nani ai'aiyei cheemrei phri marthingthutrou da; kouweiyo toulanungri, thimi hukounakpani lamkriyei tlainirou waiyoubini tlaini enini hungphani phri sikkur mumtolya shaillanungri, heinaksi thimi rapyari Israellei hangrouwei louthutdurou da.

¹⁶ Heirou lamkriyei tlainirou nani khyingei kulyom kartilbi, heitoubi tlaini enini tlungniroukhi khyingni kulyom kartilbini khrumcharou da; heirou tlaini enini heirouri nani thimi hukhatkhi naiyei chanung-mainungei thungmarshik nimakneri, deilhouri koukhatkhi paangnungei yamakrou.

¹⁷ Heirou nani phri sikmak Mumtol Shainei Kneikhi khat markhullou da; kouweiyo toulanungri, tlaini heihakrou Keine naiyei thimi rapya Egypt ram'rouwei ruithutpikur; ngam heineri, nani tlaini heiwaya naiyei chathit-yuthitdei chaan ramphani khyingei marngeinei Kneitang khat khoini markhullou da.

¹⁸ Lamkriyei tanglarou, tangla heiyei tlaini chiple phaliniyei rawainung waiyoubini, tangla heiyei tlaini somnile khatdei rawai hungphani, nani phri sikmak mumtol shairou da.

¹⁹ Heirou tlaini enini nainaiyei cheemra phri khounungei yamakrou; kouweiyo toulanungri, hukounak khatni phri siklhakur mumtol shailoukur yaowanungri, heinaksi thimi heiri, ani ramtaang thimi nimanung ram heirouwei puklhakur thimi louhoikhi kya, ayari Israellei kulyom hangra yaothungyermakrou.

²⁰ Heirou phri sikkur mumtolri nani tekkhi shainungei yamakrou; naiyei leina bi kantangrou nani phri sikmak mumtolya shairou da.”

Lamkri Ralthutpinei Kneitang Chak-khang:

²¹ Heirouri Mosesne Israellei Yama uparap nammaya ungmarkumbi, heitoubi yanungei shun, “Nane hungbi, heitoubi nainaiyei bommai kantangei thimi mshing hilthungni yaoshunrap khalthutlaka, heitoubi Ralthutpinei Kneitang Chak-khangna'nungei yao rapya hatmarshiklaka.

²² Heitoubi nani hyssop heeng nbur khat deekloubi, heirou lhingrei khoukur yaoheera namluplak, heitoubi hee heiri shumtrum'heeng khyoi-thyarale heirou shumtrum dourei heengpheirakhi thingphaanglak, heitoubi ningshun nung warbongyen thimi hukhatnikhi ai'aiyei cheem'rouwei dangra wathukmakni leiniyasu.

²³ “Kouweiyo toulanungri, Umpune Egyptbei thimi rapya hatnanungei bi kantangra yenkarwaicharou; heirou Umpune shumtrum dourei heengpheirale shumtrum thyoi-thyarei heengra hee teiphaangkur heiwaya mubini, shumtrumrap heiwaya Ane raallurkhourou; heitoubi naya hatrou kyou thimi rapya naiyei cheemra changyermakni raalthutyerrou.

²⁴ Heirou anaksi lhou rapri nai cheemrei waiyoubini naiyei yu-cha rapbei chaan rampharou Khyingei Puwatlhou khoini markhullou da.

²⁵ Heirou Umpune nanungei piroume toubine kantompikhouna ramra nani wachangei kaalnung, nani awaya Puwatlhou khoini tourou da.

²⁶ Heitoubi naiyei chanao rapni nanungei, ‘Puwatlhou awaei mu'knari kouwo?’ toubine ngailanungri;

²⁷ heirou nani yanungei asitoubi, ‘Awari Umpuei Ralthutpinei ngammei Aya mathangnei Puwatlhou, kouweiyo toulanungri, Israellei chanao rapni Egyptra leiyei kaalnung, Umpune yenkarwaichabi Egyptbei thimi rapya hatdurbi, heirou kaiyei cheem rapyari raallurkhoubi hatpimakni horkhoukurme,’ toubine loushunpilak.” Heirouri thimi rapni yaiyei lu sikhuplhakbini Umpuya khrumchakur.

²⁸ Heirouri Israellei chanao rapni chawurbi, heitoubi Umpune Moses'le Aaron yasinungei shunpikur hilthungni yani heisibil lhou khoini toukur.

Egyptbei Cha Samran Rapya Hatkur:

²⁹ Heirou masa yantrim heirouri Umpune Egyptbei chanapawa samranrap touri Pharaohyei chanapawa, aiyei Krungbom dourei ombi klei samran heirouwei waiyoubini, kul chalphopbi khoukur shok rapbei chanapawa samran rapkhi, heirou ui-waayei lamkriyei puk charapyakhi namma hiyerkur.

³⁰ Heirouri Pharaohkhi, aiyei lhou'urpu upa rapkhi, heirou Egyptbei thimirap nammakhi masanung kanthouwurchi. Heirouri Egyptbei ram karyouni khi kanrilbi chapnei houni kartlinni lungkur. Koungameiyo toulanungri, ram heiyei rilla thimi himakna cheemme touri khatchatomkhi yaomakur.

³¹ Heirouri Pharaoh'ne masanung Moses'le Aaronya ungyerkur; heitoubi yaya shunkur, “Kanthoubi Keithimi rapbei hangrouwei shaalluralo, heitoubi nakhi heirou Israellei chanaorap nammakhi, heirou naiyei yunthutkur heinaksini, nani chawurbi Umpuya khrumlakalo.

³² Heirou naiyei shunthutkur heinaksini, naiyei yaorul rapkhi heirou ui-waa, halrul rapkhi namma kyaoni louheibini shaallaka; heitoubi keinungeikhi phor pikhoulaklo!”

Israel Rapbei Lamtla Hoyoukur:

³³ Heirouri Egyptbei thimi rapni Israellei thimi rapya khnotni ungbini yairam heirouwei khrangni shaallurnungei toubi, “Kari hiwurchileiyame,” toubi yani shunkur.

³⁴ Heisitoubi Israellei thimi rapni yaiyei yam mumtol phri sikbongnung, yaiyei lhing rapkhi kyaoni louheibini, heirou yaiyei phini yumphopbi heitoubi yai khlabangra chungbaangbi urlouheikur.

³⁵ Heirouri Israellei chanao rapni Mosesyei shunmatupikur tloulhangrap hilthungni loutoukur, ngamri yani Egyptbei thimi rapbei putcheirap kulshanyei shambrap heirou sinayei shambrap heirou phirul-phishamb rapkhi namma bumallongbini louheikur.

³⁶ Heirou Umpune Israellei thimi rapya Egyptbei thimi rapbei mit'thrilnara kringpikhei pukyerkur; heitounei ngammei yai wainungei putcheirap buyeinang Egyptbei thimi rapni waiknaini louthutbini loumalanpikur. Heisitoubi Egyptbei thimi rapya yani kontumwurkhou.

³⁷ Heirouri Israellei thimi rapni Ramesesrei hoyoubini Succoth'ranungei lamtlabi chakur; heirou yarap heiri thimi mshingra douwa, naoshun-naopar rapya sherchokmakni, yaiyei napawame touwei'mkheiri lishing macha'thrukmal honi lamtlabi chakur.

³⁸ Heirouri yari thimi chungwani, napuiya-naoshun naopar rapkhi kyaoni marhaobi, yaorul raple halrul rapkhi heirou ui-waa rapkhi namma kyaoni pulni lamtlakur.

³⁹ Heitoubi yani Egyptrei heiurkhei mumtol rapya phri sikmakni sheembini shaikur. Kouweiyo toulanungri, mumtolrap heiri phri sikmakni marshikloubini khoukur, ngamri yayari Egyptrouwei khnotni hulthutlounarou, yani karngeibi leikhoulapmakur; heirou yai chamainungei chak-anya ramphani koukhatkhi thungmarshik lapmakur.

⁴⁰ Asinungri Israellei thimi rapni Egyptra paallurkhouri kum macha'phalile somthumbil tlung.

⁴¹ Heirouri kum macha-phali'le somthum yenluikur tlainihak heirouri asitoubi hungthukkur touri Umpuei thimirap nammani Egypt ram lakurkhoubi shaalthutkur.

Ralthutpinei Kneitang Markhulnei Lammitrap:

⁴² Heiniyei masa lhouthuk heiwari Israellei thimi rapni, yaiyei chathit-yuthit rapbei chaanserrei khoini Umpunungei khrumnaput makatbini marngeirou da; ngamri heiniyei masanunghak Umpune Israellei chanao rapya Egyptbei ram'rouwei ruithutlounanungei karngeina masahakme.

⁴³ Heirouri Umpune Moses'le Aaron'nung shun, “Arapri Ralthutpinei Kneitang markhulnei lammitrap: Kneitang markhulna heirouri miram-mithrillei thimi rapni hukhatkhi chathung-maithungnung yamakrou.

⁴⁴ Heiya ai'aiyei tuy pibini lobi khoukur shok rapya nani, yaya sermurrei un danpikur hillouri, yarap heinekhi markhulnara chathung-maithungri kya.

⁴⁵ Heiya miram-mithrillei thimirap heirou neekbini khoukur shok rapni markhulna heirouwei chathung-maithungri yamakrou.

⁴⁶ Ralthutpinei Knei markhulnei chaak'khaang heiwari ai'aiyei cheemwaira chamairou da; nani heiyei anchumya cheemdeira urthutbini, kallunrilbini mainungei yamakrou; heitoubi heiyei anthru rapkhi harkhatkhi shaatchaalnungei yamakrou.

⁴⁷ Heirou Israellei kulyom nammani Kneitang awaya markhullou da.

⁴⁸ Heiya miram-mithrillei thimi rapni nakou kalhonbi Ralthutpinei Knei markhulnei chamainara yaorou dawanungri, yaiyei napawarap nammani sermur un danrilaksu, heitoubi markhulnara wayaowasu; Heiyanungri yakhi ram heirouwei pukkur thimi naksini hoirouwa. Heiya murdanmak thimiri heirouwei chathung-maithungnungei yamakrou.

⁴⁹ Ayil heiwari Israellei thimi rapnungkhi heirou miram-mithrillei thimi rapnungkhi khatnakdik khoini charou da.”

⁵⁰ Heirouri Israellei thimirap nammani ayil heiwaya baimakni chanthungbi lhou toukur; heisitoubi Umpune Moses'nungle Aaron'nung shunmatupikur hilthungni yani lhou toukur.

⁵¹ Heirou heinaksi tlainirou asitoubine hungthukkura, touri Umpune Israellei thimi rapya thral knaini Egyptbei ram'rouwei ruithutloukur.