HOYOUNA 11 - KHYINGEI PU'TLOU Bible (BSI)

(10) Egypt Thimi Rapbei Chanapawa Samran Rapya Hiyerkur:

¹ Kheen aroukhi Umpune Moses'nung shunkur, “Keine Pharaoh'le Egyptbei thimi rapbei doura yenpinungei pharthrai khatkhi leileihui. Heiyei hillouri ani nayari bi heirouwei malhetthutrouwa; heirou aiyei hulthutrou kyou heiwani nanungei kluiyei shamnabom hoirouwa.

² Asinungri thimi rapnungei shunpilaka, touri napawa napung kantangni, heirou napuiya napung kantangnikhi ai'aiyei cheemlhunrei thimi rapbei sinale kulshanyei shamb rapya bumarkumlaksu.”

³ Heisitoubi Umpune Israel thimi rapyari Egyptbei thimi rapbei mit'thrilnara kringpikhei pukyerkur. Heiyakhi duinara Moses toubi ung napawa heiwari Egyptbei ramrari, Pharaohyei shok rapbei mit'thrilnara heirou thimirap namyerrei mit'thrilnarakhi beimakni tang thimi khat hoiyura.

⁴ Heirouri Moses'ne shun, “Umpune asitoubi shunpilei, ‘Masa yantrimnang Keine Egyptbei hangra karwaichabi yenrallou.

⁵ Heitoubi Egypt ramrei chanapawa samran touwei'mkheiri hiyerrou; heirou Pharaoh'yei chanapawa, aiyei Krungbom doura ombi klei cha samranwa airouwei waiyoubni, aiyei chakri thlungra lhou paangbi klei shok-napuiya rapbei chanapawa rapkhi, heirou ui-waa pukthutkri cha rapyakhi namma hiyerrou.

⁶ Heirouri Egyptbei ramra bi kantangra khi kanrilbi chapnei houni kartlinrouwa; heinaksi houri bongnungkhi thuk'khoumakhui, heirou hilloukhi hanui kallengni thukkhoumarou.

⁷ Heiya Israellei chanao rapyari, napawa rapnung, nimanung ui-waa rapnungeiri ui rapni rampha mubikhi chukpimakrou; heisitoubi Egyptbei thimi raple Israellei thimi rapbei tlakra Umpune koutoubi kartlikril leiyerrou touri nani muphaeirou.’

⁸ Neiyei shokrap nammani keinungei wachangbi, heitoubi yaitamni kei'maibongra khrumbini ‘Nangni bi arouwei shaalthutlaka, heitoubi neihilla chanthung thimirap namyakhi ruiloulaka,’ toubine yunheirou, heihillouri keikhi wathukrouwa.” Heirouri ani meithukni malungkhawurbi Pharaoh'yei maibongrouwei wathukbini shaalkur.

⁹ Heirouri Umpune Moses'nung shun, “Pharaoh'neri neiyei kyunya ninglhakthumarou, heineri Keiyei kngakei lhourap heiwari Egyptbei ramra katduilhakyerouwa.”

¹⁰ Heirouri Moses'le Aaron yakhuntani Pharaoh'yei maibongra kngakei lhourap namma touthutkur; heisiya hoiyanungkhi Umpune Pharaoh'yei ukningya kalyerpiwurthu; heitounei ani Israellei thimi rapya aiyei ram'rouwei hanuikhi malhetthutpimakni dongurthu.