HOSEA 9 - KHYINGEI PU'TLOU Bible (BSI)

Hosea'ne Israellei Doura Tantiyei Tlou Shunthutpikur

¹ O Israel, nari Limdei rapbei thimi'naksi langthoumak, kouweiyo toulanungri, nari naiyei Dunpuya khingurkhoubi chorit naimak napuiya'nakne chawurkhoula, heirou nane trunwaikhi marthumni luklhaknithulei.

² Heiya nane ruitlairei trunwai lung rapnekhi, heirou darkha heiyui shumna heinikhi thimi rapya picha-pimaimakarou.

³ Yari Umpuei ramra palchangmarou; heiya Ephraim'ri Egyptra kallengthurouwa, heitoubi yani Assyria'yei borh chak-anya chamaibine leirouwa.

⁴ Yane Umpunungei darkha heikhi malamput khoine makatkhoumarou, heitoubi yani Ayari heiwani pilyerchangmarou; heirou yaiyei malamput makatkur heiwari hinarei chaak khangnaksi hoirouwa; heiwaya chamailoukur thimirap nammari borhni marmokchirouwa; heinaksi chak-an heiri yaitammei ukya thoyernanungei tomni, heiya Umpuei Cheemra urlhakbi makatnungei bomri nimakrou.

⁵ Heinaksi naiyei kartinkhou tlainiyei ha'krao nungkngai lhou heiwari Umpuei chak-khangnei tlaini heirouri nani kouya touheirou?

⁶ Kouweiyo toulanungri, thilak, klah-knang hungeinung yari trukchekurchirouwa; heiya Egypt rapne yayari hulmarkumrou; heitoubi yayari Memphis'ra khi ruirou; heirou yaiyei sina lapani lhombi sabaangkur cheem-kei rapkhi, heirou Pucheem rapkhi thruni yamkhaluchirouwa.

⁷ Tanti pinei tlaini rapri hungtlungura, heirou thimi rapbei touwurkhounei klahman pinanungei tlaini rapkhi hungtlungura; awari Israelni murou da; kouweiyo toulanungri, naiyei borh chungachaknei ngamrou, heirou nani karhourilachaknei ngamrou, naiyei Thimkhui rapkhi muheimakura, heirou lhawaira kar'an thimikhi yuntlungmak thiminaksi hoiwurchiya.

⁸ Thimkhuiwa heiri Dunpule kalhonne Aiyei thimi Ephraim'ya ngaksilpilei, heiyei aiyei yenchaheina lamtlun kantangri chang kamkhouwurla; heirou aiyei Pucheem rillakhi ayari horthiwurchiya.

⁹ Yari Gibe-ah'yei chaanra thukkurkhounaksi, tuycha-lalchanei lhouni thimmurchiya; heingammei yaiyei borh lhou rapya Ane kansherthibi, heinung'tlim yayari Ane tanti pirouwa.

Israelne Borhlhou Touwurkhounei Klahman Phakur

¹⁰ Israel rapya Keine ramthingrei darkha hei trungnakni raphathutpikhou, heirou yaiyei nutar-patar rapyari khyudhei hutlha khmin'naksi Keine thimallokhou; heiya yaneri Baal-Peor'ra kabine, rikraiknaei lhou khoine Baal thraiya khrumbine, machinknaei watlhoura yaimshaya makatdurla.

¹¹ Heirou Ephraimri, yaiyei thang'al heiwari waa traikurnakni yairouwei traiwurouwa, heineri yaihangra naopuk toukhi naimakarou, heirou chanao shunnei heirou nao-urnei sillu toukhi makrouwa.

¹² Kounakpi yani chanao puklanungri, heiwani yanungei Keine klah dayerheirou, touri yaiyei napawa khatchatomkhi maleithungmakne hiyerchirou; heirou Keine yaya lakurkhouei kheenrouri yanungei kounak thuithiyei klah hoirouwa.

¹³ Ephraim'ri, Keine mukhouei kheenrouri Tyrus phaikarra lingpukkur heengtrungnaksi; heiya Ephraimni aiyei chanao rapya heenai dayerkur thimi rapbei hutra pilhakheirouhui.

¹⁴ O Umpu, Nangne kouya pirou kyouwo? Yanungei pipilaklo! Shullamrei naoya rulyerlak, heirou yaiyei nubomya taryerwurlaklo!

Israellei Doura Umpu ei Pichar

¹⁵ Yaiyei lhangaimak borh namyerwa heiri Gilgal'yei rilla klei mulei; bi heiwaya mubi Keine yaya machinlei; yaiyei lhangaimak lhou touwurnei ngamrou, Keine yayari Keiyei Pucheem'rouwei hulthutdurouwa, heirou yayari Keine malungshimarou, ngamri yaiyei Krung rapri raal kyou thimithillei.

¹⁶ Ephraim'yari klah dayerwurla; aiyei yrungri kat'taarwurchiya; yari heikhi heimakarou; kounakpi yani chanao puklanungri, yai ukwairei yukpuksundakur chanao yerrouwei malungshidui heiwaya Keine hatdurou.

Thimkhuine Israellei Ngamrou Shunthutkhoupi

¹⁷ Keiyei Dunpune yayari khingmtraiwurou, ngamri yani Aiyei kyunya ninglhakmaklei; heingammei yani Lim deiyei hangra puichabine yenpaalkhei thimirap hoirouwa.