HOSEA 6 - KHYINGEI PU'TLOU Bible (BSI)

¹ “Hungalo, kani Umpunung kallenglakase; kouweiyo toulanungri, Ane kaya sheetchalwurkhoula, heitoubi kayari ani damyerpithurou; heirou Ane kaya umhemwurkhoula, heiya kayari Ane yemna bi lhompithurou.

² Heitoubi tlaini khniniyei hillouri Ane kaya kanthouyerpirou; heitoubi khyumnirouri Ane kaya kanthouyerpirou; heirouri kani Aiyei mit'thrilnara ringrou.

³ Heineri kani ningmulakase, heitoubi kane Umpuya munanungei chanthungase; Aiyei yongrou kyou heiwari ningshun kul kanakne, heirou phalbiyei nung kronakni, heirou manthrallei nung robi thleimai dokyerkur heinaksi hoirou.”

⁴ O Ephraim, Keine neinungei kouya toupiserouwo? O Judah, Keine neinungeiri kou toupiserouwo? Kouweiyo toulanungri, neiyei lhangaiyo touri ningshunnei ramei kanchaikur heinaksilei, heitoubi ningshunnei rdaine heeplhakkur heinaksilei.

⁵ Heingammei yayari Thimkhui rapbei tloulhangne manuisundawurla; heirou Keiyei murrei tloulhang rapne yayari Keine hatdurpila; ngamri Keiyei picharri tliplai kwaar'naksine meithukrou.

⁶ Kouweiyo toulanungri, Keiri makat putyari kringpi kheiya duini madu, heiya thuina putya madu nimak; heitoubi meira hongbi makatthutyari, Keiya shak mupikuryadui Keine madu.

⁷ Heiya yari Adamyei chaanrouwei mardingrilkur tlou'kantomya toubaiwurla; heitoubi yane Keiyari thi'msitbi karhane lhou toulei.

⁸ Gilead'ri yaiyei lhangaimak borh lhou tounabi khukarthil khat; heirou bi heiwari heenaine marmokkurla.

⁹ Heirou mucha thimi rulkhatne thimi napung khatya mrimbi omkngaak naksi; Suipi purap rulkhatne omkarhungbine thimi hatnanungei raangbine leilei; heisitoubi yane Shechem'yei lamtangra thimi hatdurla.

¹⁰ Israel rapbei cheemkhurra thuithikur lhou khat Keine mulhakkurla; heirou bi heiwari Ephraim rapbei chorit naimak lhouya touwurla; heitounei Israelri borhni marmokurla.

¹¹ Kouweiyo toulanungri, O Judah, nangkhi, neiyei touwurkhounei klahman tanti pinanungei kheenri Keine kartinwurla.