HOSEA 4 - KHYINGEI PU'TLOU Bible (BSI)

Umpu ne Israelya Karhani Chay Pikur

¹ Umpuei tloulhang rapya louningpilak, Israellei douwarap na namma; kouweiyo toulanungri, Umpune nairamra klei thimi rapya yanimakurame, ngamri nairam heirouri tharmu chim toukhi makura, nimanung kringpikhei toukhi makura, nimanung Dunpuya mulhaknei roushingkhi makura.

² Yane khatle-khatle klallei tlouya kantomrilbi, mandalrille, heirou hatkrille, mucha'kril heirou minu-michaya lalkril, heirou chorit naimakei lhouya tourilbi, heirou youkna lammit rapya toubaibine hatril-norrilnei lhouri chungwane katduiyura.

³ Ngam heineri ram awari klah kanrelni thim'rouwa, heitoubi bi arouwei paalbi klei thimirap nammakhi, ramhangrei yaa-yoole, heirou nungthourei traicha yoo-waa nammakhi kalhonne hi'tlumchirouwa; heithilkhi nimakne samadrurei thangarap nammakhi kyaoni mangchirouwa.

Suipipu Rapya Umpu ne Yanimak

⁴ Heiya hoiyanungkhi thimi hukhatne thimi khatya klal theibangmakneasu; heirou thimi khatne khatdei doura chim-klallei tloumayungpi toumakneyasu; ngamri yanimakri Keile nai tlakra kleime, Suipi purap.

⁵ Nane nunghangnung thikmathuibi kanelrou, heirou masanungni Thimkhui rapne nakou kalhonne thikmathuibi pulni kanelrou. Heirouri Keine naiyei nuwiyei ram Israelya toumangpirou.

⁶ Keiyei thimi rapya roushing yaomaknei ngamrou mangyerwurla; ngamri roushingya nani loulhaknimaklei. Keinekhi nayari Keiyei suipipu hoiyermarou. Heirou nani Pu DUNPUei chaytlourap nammaya malumwurnei ngamrou, Keinekhi naiyei chanao rapya malum'rouwa.

⁷ Yane thimi mshing katchungduinei ngamrou, Keiya karhane borhkhi duini touwurla; heingammei yaiyei thang'alya rikrai-knayei bomra holyerrouwa.

⁸ Yane Keiyei thimi rapbei borh limna makat put rapya chamaibine leiyura; heirou yai ukningri lhangaimak borhyathil maduyura.

⁹ Heirou Keine thimi rapkhi, Suipipu rapkhi khatnakdikni yaiyaiyei toukur lhoubom hilthungni yaya tanti tourouwa, heitoubi yaiyaiyei lhou hilthungni churnei man pirouwa.

¹⁰ Yane chaarerikhi ukthotou naimakrou; yani chorit naimakei lhou toubi minu-mishalkou rkhum-phitho tilrillou, heiya thimi pungdui toukhi naimakrou; ngamri yani chorit naimakei lhoura martlaowurbi Umpuya malumwurkhoula.

Thrailha Khrumri Umpu ne Yamak

¹¹ Heirouri yani tulran, heirou tulshukya mongmalipbi yai'ukning tamungurchiya.

¹² Heirou Keiyei thimi rapne heengei thrailha rapya khrumbine, heiwanungei tlou kallangrillei. Heirou yai bikbaihar shinbine meiruikhi deekbi thilrillei. Heirou chorit naimakei ukningni yayari ruikanwaiwurla. Heitoubi yani Dunpuei maibangra chorit naimakei lhouya touwurla.

¹³ Lhungbungra yani thrainungei malamput makatlei, heirou lhunglim-daamlimra yani mroh kun ikbine thrai khrumrillei; bok'heeng holira, heirou anchitang holira, heirou daikallimra yani thuinaput hongbine makatlei; heitoubi bi heirapra naiyei chanapuiya rapne chorit naimakne sharung yorbi leiyura, heirou naiyei mou-cha rapne mishalya lalrilnei lhouya toubine leilei.

¹⁴ Heiya hoiyanungkhi, Keine naiyei chanapuiya rapbei chorit naimaknei, heirou naiyei mou-cha rapbei mishalkou lalrilnei ngamrou yayari tanti pimakeirouhui; ngamri naimshani chorit naimak thimi rapkou chabi, heirou thraibomrei klei sharungya kyor thimi rapkou kalhonbine thuinaput makatkhou. Heiya parmal toukna heinaksine: “Roushing yaomak thimiri heisi hungmaangeirou.”

¹⁵ O Israelrap, nani chorit naimakei lhouya toubikhi, Judah'yari klal dayerpimaklei; heitoubi nari Gilgalla wachangmakno, heirou Beth-Aven'rakhi kachangmaklo; heirou klui naimak Umpuei minrakhi nane tlou kantommak.

¹⁶ Kouweiyo toulanungri, Israel rapri gadha'yei napaltha'naksine napaltha; heiyanungri koutoubi Umpune yayari ramhangra yaorulnaksi silchachangrouwo?

¹⁷ Ephraimri thrailha rapya khrumnara yaothungurchiya. Aitamtom heisi hoilakasu.

¹⁸ Yane chamalip-maimalipbi chorit naimakei lhou rapya toubine leiwurchiya; heirou yaiyei lhou'urpu rapkhi maipaknei lhouyari rikraiknayei lhouyadik hulchabine leiwurchiya. Ya rapkhi heisi hoilakasu.

¹⁹ Yayari martheeni liptlai mharnaksine mharlourouwa; heirou yaiyei thrainungei makatkur heiwane yayari rikrai phayerrouwa.