HOSEA 2 - KHYINGEI PU'TLOU Bible (BSI)

¹ Naiyei teinao rapya “Ammi” touri Keiyei thimirap, heirou naiyei char rapya “Ruhamah” touri kringpiya phakur thimirap toubine unglak.

Chorit Naimakpi Gomer Heirou Chorit Naimak Chanaorap

² Shunbine neipuiya samlak, kouweiyo toulanungri, a heiri keinu nimakura, heirou keiri aishal nimakura. Heiyanungri aiyei chorit naimakei mit'thrilya, heirou aiyei sharungya yorbi tuy taalnei ukningya khingurkhoulaksu!

³ Heinimanungri, aya pukyeinung hakthilne puknaksine, Keine aiyei shambya thiklhukurou, heitoubi ramhang satu naksine kukyerwurbi taoram naksine taaryerwurou, heitoubi msul-yuikhatne manrouhatrou.

⁴ Heirou Keine aiyei chanao rapyakhi kringpimarou; kouweiyo toulanungri, yarap heiri chorit naimakne dongloubine pukkur chanaothil.

⁵ Ngamri yai puiwiri chorit naimakei lhouya touwurkhou, heirou yaya pukkhou napuiya heiwini rikraiknaei lhouyathil touthutkhou; kouweiyo toulanungri ani kyun, “Keiyei malungshi napawa rapbei leinara kei wachangrou, ngamri yani keiyei chanung-mainungei thulpilei, upnungei yaakhmul heirou phaikhringei phi rapkhi marshikpi, heirou teinungei muiknam shirekkhi lopilei, heirou mongnungeikhi fleithutpilei.”

⁶ Heingamei Keine aiyei chana lamtlunya thruni yamkhaluyerouwa, heitoubi aiyei maibongra paltang sakhalrouwa, heiyanungri ane lam rapha'muchangmarou.

⁷ Heirouri ane aiyei malungshiril napawa rapbei hilla chanthungcharou, heiya ane yayakhi chanphamakrou; heitoubi ani yaya rapharou, heiya raphamumakrou; heirouri ane, “Asinungri keiyei shaaltirnung kallengrouwa, kouweiyo toulanungri, asiyei napawa rapyari shaaltirle leimalknane lhangailei,” toubine yunrou.

⁸ “Kouweiyo toulanungri, Keine anungei chanung-mainungei chaak-an, mongnungei darkha yuining, heirou shirekkhi thulpikhou touri ane mukhoumak; heirou aiyei sinakhi heirou lapakhi heirou kulshankhi Keine chungwani duibaangyerpikur, heiya heirapya ani Baal thrailha khrumnara yrengkur.

⁹ Ngam heineri trunwai luklum hungtlungeinung airouwei Keine cha heirou darkha hei rapya khum-mallenglourou, heirou Keine aiyei hangwallei klei sharungya hupkhalupina yaakhmul pun raple heirou phaikhringei pun rapya lhuklouheirou.

¹⁰ Heirou asinungri ayari Keine aiyei malungshi napawa rapbei maibongra phirul thiklhukpirouwa, heirouri ya hukhatnekhi ayari Keihutrouwei kalthutloukur manimakrou.

¹¹ Aiyei hakrao-nungkngaiyei kumoi, tangla douyei kumoi, kumhoinei-kumtinnei kumoi heirou minphuk-phalphuknei kumoi rapya Keine toudongrouwa.

¹² Heirou ane ‘Awari keiyei malungshi rapne keiya ippinei manme’ toubine kanyerchani kyun aiyei yekulrei darkha yam rapya heirou khyudhei trung rapyakhi, Keine mangyerrouwa. Heirapya Keine heengyao holyerrouwa, heitoubi ramhangrei yoo-waa rapne heirapya chaa'tlum-maitlum'rouwa.

¹³ Heirou Keine aya yilthibine, ane mroh kun ikbine Baal thrailha rapya khrumyeinung aya tanti pirouwa; heitoubi ane khnara sina par nabangbine, heirou ngakhungra khrul nabi aiyei malungshi napawa rapbei hilla chanthungchabine Keiya malumwurbi leiyei kalnung, Keine aya klah dayerrou,” toubine Umpune yunlei.

Umpu ne Aiyei Thimi Rapya Malungshipi

¹⁴ “Ngam heineri thilak, Keine aya manelbine ramthingra urthutlourou, heitoubi aya lhangaini yunbine shunmatupirou.

¹⁵ Heitoubi bi heirou anungei Keine aiyei darkha yekulya mallengpithurou, heirou Achor'yei phaikarya anungei malungamknayei palshung hoiyerrou. Heitoubi bi heirou ani nangak hoiyei laa sanaksine, heirou Egyptri wathuk'yei kallei touwurkhou lhangai lhounakni Keinungei toupirou.

¹⁶ Heitoubi heiyei tlainirou nangne Keiyari, ‘Kei shalwa’ toubine ungpirou, heiya nangne Keiyari ‘Keiyei Baal’ toubine ungmarou, toubine Umpune yunlei.

¹⁷ Kouweiyo toulanungri, Keine aiyei murrouwei Baal thrai rapbei minya louthutdurou; heitoubi yaiyei min rapya kouniroukhi hanui kallengne ningthutmarou.”

¹⁸ Heitoubi tlaini heirouri Keine Israel rapnungei ramhangrei yaalim-yoolim heirou nungthourei traicha waalim heirou thleirei ukni tulchabi klei chiwi raple kalhonne tloukantom khat mardingrillou; heitoubi heihillouri Keine tlaipang doura raallei malaa-taakya heirou raalshonya toudeekbine raal manewurbi, tlaipangei chiwirap nammani koukhi chi'kna makne kyingne paalrouwa.

¹⁹ Heitoubi neiyari Keine chaan khatreknungei Keiyei nu khoine loulhakpirouwa; heirou Keine neiyari chimni loulhakbine, klui naimakne malungshi-kringpi kheile kalhonne khoupirouwa.

²⁰ Keine neiyari malungamkna nu khat khoine loulhakpirou, heirouri nangne Umpuya shak murouwa.

²¹ ‘Heiyei tlaini'rouri, Keine nungthouya ninglhakpirou, heitoubi yani tlaipangpalya ninglhakpirou.’ toubi Umpune yunlei.

²² “Heirouri tlaipangpal thlei heini trunwai lungyakhi, darkha heiyakhi, heirou shireknungkhi ninglhakpirou, heirou yani Jezreel'ya ninglhakpirou.

²³ Heirouri Keine ram arou Keimshaei thimi phunbaangrouwa, heitoubi ‘Lo-Ruhamah’ toubi ungkhou malungshikhoumak aya Keine malungshipirouwa, heitoubi Keiyei thimi hoikhoumak ‘Lo-Ammi’ toubi ungkhou aya Keiyei thimirap toubine ungrouwa. Heirouri yani, ‘Nangri kaiyei Dunpume’ toubine yunrou.”