HOSEA 14 - KHYINGEI PU'TLOU Bible (BSI)

Borh Shunthutbi Ukning Hung

¹ O Israel, neiyei Pu Dunpu Umpunungei kallenglhakalo; kouweiyo toulanungri, nangri neiyei borhra tapanbi kanellurame.

² Aiyei tloulhang rapya loulhakbi, Umpunungei kallenglhaklak; heitoubi Anungei atoubi shunchalak: “Kaiyei borh namma louthutdurpilo, heirou kringpibi kaya loulhakpilak; heiyanungri kaiyei murni mathangnei watlhouya touchangrou.

³ Assyria'ne kayari kalpichangmarou; kani kaiyei sapuk kaari rapyakhi tungchangmarou; heirou kaiyei hutni sathutkur thrailha rapyakhi ‘Kaiyei Dunpume’ toubine yunmarou; kouweiyo toulanungri, tounaram mak saracha nakni, kani Neiyei bomra kringpi kheiya phawurlame.”

Umpu ne Israel Rapnungei Rannei Chaanya Mardingpi

⁴ Yaiyei uklummakur heiwaya Keine damyerpirou; heitoubi Keine yaya man'naimakne malungshipirou; ngamri Keiyei yaidoura leikhou malungkha heiwari makkura.

⁵ Keiri Israel rapnungeiri masayei rdainaksi hoirouwa; heitoubi ani sholengpar naksine lhangaini parrouwa; heirou Lebanon'yei poplar heengtrung naksine yrung khyukni runrouwa.

⁶ Aiyei dun rapkhi chungni katshunrouwa, heitoubi aiyei thang lhangairi Olive trungei lhangai naksine karyuirouwa; heirou aiyei khrimkhi Lebanon'yei Cedar heengnaksine muinam'rouwa.

⁷ Yane Aiyei shadaakra kallenglhakbi kallerou; heitoubi cha'trung naksine katpukthutrou; heirou darkhayamnaksine katparbi heikhi kat'heirouwa, heitoubi Lebanon'rei darkha heinakni min charouwa.

⁸ O Ephraim, Keine thrailha rapya kou tounarouwo? Neiyei shunchakurya ninglhakpibi, neiya thikulpikur heiwari Keime, Keiri mar'embithil klei heengtrung'naksi, heitoubi neiyei hei rapkhi bi heirouweithil phachi.

Tlou Suidongna

⁹ Roushing klei thimi huhuni kyuntlou awaya phab dalakasu! Heirapya khalmuchang mukhei thimiri mulhaklaksu! Ngamri Umpuei lam rapri yenglei, heitoubi tharmuchim thimini heirapbei rilla charou; heiya borh lhoutou thimi rapri heiwane thikmathuibi kanelrouwa.