HOSEA 1 - KHYINGEI PU'TLOU Bible (BSI)

¹ Judah'ra Uzziah, Jotham, Ahaz heirou Hezekiahn'ne Krung khoine pallei kheenrou, heirou Israella Joashyei chanapawa Jeroboam'ne Krung hoiyei kheenrou, Be-eri'yei chanapawa Hosea'nungei Umpuei paolaa atoubi yukshunpikur.

Hosea'yei nu heirou aiyei chanaorap

² Umpune lamkrini Hosea'nungei tlou yukshunyeinung, Umpune Hosea'nung atoubi kyun, “Nangne chabine chorit naimak napuiya khatya neiyei nu khoine loulhakbi, heitoubi aiyei chorit naimakei dongloukur chanao rapya puklanungri neiyei chanaorap hoiyerlak. Koungameiyo toulanungri, ram heiyei thimi rapne Umpuya khingurkhoubine, chorit naimakei lamra chawurchiyame.”

³ Heisi tounarouri ani chawurbi, Diblaim'yei cha napuiya Gomer'ya aiyei nu khoine loulhakkur; heitoubi ani nao urbi, anungei chanapawa khat pukpikur.

⁴ Heirouri Umpune anungei shunpikur, “Aiyei minri Jezreel toubine thulpilak, ngamri kheen beiyei hillouri Keine Jezreel'ya hee dayernei Jehuyei bommai'ya khlang lhakheirouhui, heitoubi Israellei shullamra aiyei Krungbom louthutdurbi toumitdurou.

⁵ Heitoubi tlaini heirouri asitoubi hungthukkura, touri Jezreel'yei phaikarra Keine Israel rapbei malaa-taakya toudeekkurou.”

⁶ Heirou Gomer'ne hanuikhi nao urthubi, chanapuiya khat pukkur. Heirou Dunpune Hosea'nungei shun, “Aiyei minri Lo-Ruhamah toubi thulpilak; kouweiyo toulanungri, Keine kouniroukhi Israel rapya kukpinanung malungshi mutpimakrou.

⁷ Heiya Keine Judah'yei bommai'ya kringpirou, heitoubi yaiyei Umpu Dunpu Keine yaya kalpirou; heiya yayari malaa-taakni nimanung raal shon'ne, nimanung raal bom'rouwei, nimanung sapuk'tung raallui rapne kalpimakrou.”

⁸ Heirou ani Lo-Ruhamah'ya nu khaikur hilloukhi nao urthubi, chanapawa khatkhi pukthu.

⁹ Heirouri Dunpune shun, “Aiyei minri Lo-Ammi toubine unglaka, kouweiyo toulanungri, nari Keiyei thimi nimakura, heirou Keikhi naiyei Dunpu hoimakarou.”

¹⁰ “Heisiya hoiyanungkhi, Israellei chanao rapri samadru'rei shitnrui naksine holchichangmakne, heirou mshingkhi sherchichangmakne chunglhakrou. Heirou asitoubine hungthukkeirou touri ‘Nari Keiyei thimi nimakme’ toubine yunkhouna bira, ‘Nari Khring Dunpuei chanao rapme’ toubine yunheirouhui!”

¹¹ Heirouri Judah'yei chanao raple Israellei chanao rapne khadtom khoine hungkartilbi, heirou yaihangrei thimi napung khatya khalthutbine yaiyei Ruipipu khoine bom lhakpiheirou. Heitoubi yai ram'rouwei yani wathukkeirouhui; heiyei tlaini heirouri Jezreel'yei tangdui tlainikhat hoirouwa.