HEBREWA 9 - KHYINGEI PU'TLOU Bible (BSI)

Tlaipangrei Heirou Thangmunrei Pukhrumnei Lhou

¹ Lamkriyei mardingpikur heirou tlaipang thimiyei hutne sabaangkur cheemra Pukhrumyei chanungei youkna tloulamrap kyao.

² Ngamri Khuiluphiyei Pucheem khat manringbaangkur, heitoubi heiyei rillei lamkri bomthora shirek meishar ho khatle heirou Dunpunung makatkur mumtol baangkhouna phunphai khatkhi dunkhoulei. Heitoubi bi heiyari ‘Khyingei Bi’ toubine ung.

³ Heitoubi Pucheem heiyei khintam tlungei punshel yarkhalna hillei bi heiyari ‘Khyingei Hyingduina Bi’ toubine unglei.

⁴ Heitoubi heiyei rillane muiknam mroh hongnanungei sinayei khrahpal khatkhi khoulei, heirou Manna lhakna sinayei daarkok khat dunbaangbi khouna Mardingrilna theengkung khat sinane lhomphopbi khoulei. Heitoubi heengbo heimachidthut Aaronyei shungkrok'le, heirou Chaylam chiptam mayelhakur thlungpak rapkhi bi heirou khou.

⁵ Heitoubi Theengkung heiyei doura Dunpuei thang khoine Cherubim'ne kringpiyei omna lhangra yaapmallebi klei. Kane tloubom heiyei ngamrou tlungne yunchichangmakrou.

⁶ Asitoubine lhou namyerwaya marshikkur. Suipipu rapne tlainiser Pucheemyei maibong lhangei bomthora wachangbine yaiyei Pu watlhouya toulei,

⁷ heiya Suipipu Upawane Pucheemyei ril-lhangrei bomthora kumkhatrou hanuitom polhakbine, ai'mshanung'tlimle heirou thimi rapbei mumakne borh touwurkhou heinung tlimkou ane Dunpu'nung khrumna put makatdurnei heeya urlhakbine shunchapi.

⁸ Heirou anaksi marshikpikur lhoulamrap namma heiwaya Khuiluphiyei Pucheem heine tlaipangra leiliyenri Namrouwei Hyingduina Bi heiri laatpimakhuirou toubi Lhawai Khyingne yunthutpilei.

⁹ Anak tloulam namma ari angtu chaanyei tlaipangpalya mu'kna khoine mutpikur tomngei. Heiyei ngamri Dunpu'nung put makatkur heirou khrumna put anchum makatkur heine khrumcha thimi rapbei ukningya rong tlungkyer manemaklei,

¹⁰ ngamri heinaksi lhourap namma heiri cha'kmai putle, mongnungei darkha yui heirou limlimei marthingthutna lhoulamrap kyaoni tourou da. Anaksi lhoulamrap namma ari Dunpune rannei lhoulam rapya yenpibongyen chasunda'nungei toume.

Marthingyerpi Mane Heirou Marhilnanung Mak Christaei Hee

¹¹ Heiya Christane lhangaiyei lhourap nammanung'tlim Suipipu upa khoine yongpiwurbi, heirou Ane tlaipang thimi hutne sabaangkur nimakne, tlaipangpallei sheemthutkur put nam'rouweikhi tangdui heirou rong'tlungkur Pucheemyei rilla watlhou toubine leilei.

¹² Heitoubi Christane Pucheem heiyei rilla Khyingei Hyingduina Bi heirou thimi nammanung'tlim hanuitom wachangei kaalnung, Dunpu'nungei makatdurna tlang rapbei heirou hal rapbei heeya Ane urlhakmaklei, heinung tlimri Ane Ai'mshaei heeya urlhakbine heitoubi kanung'tlim klui naimakei ralthutpina bomya phayerpila.

¹³ Heitoubi tlang raple hal rapbei heele heirou halshun hongnei meikhurap heiri Puwatlhoura hyingmak thimi rapbei doura khrephangbine heitoubi yai Puwatlhou tounanungei borh klei heiwaya marthingpikur.

¹⁴ Kyun awane chim hoiyanungri, Christaei hee heineri kounakbil hyingyerpikur manerou! Heirou klui naimak Lhawaiyei ngamne Ane Ai'msha-Aitamni Dunpu'nung borh koukhatkhi yaomakne makatpiwurla. Heirou Aiyei hee heine kaiyei ukningya chim-klal muyerpibi heirou khiyei lhou'rouwei marthingpibi, heitoubi khring Dunpuya watlhou touyerwurla.

¹⁵ Heirou ngam heinung'tlim, lamkriyei mardingpina daakra borh touwurkhounarei lhukthut'pinanung napung khatne hipiwurnei ngamrou ringthutkur thimi rapne Dunpuei klui naimak kantompiya phayernanung'tlim Christari rannei mardingnaya karyomkyer pu hoilei.

¹⁶ Kouweiyo toulanungri, hinanungei mardingurkhou leinei ngamrou tlou heiwaya tlungyerna'nungei mardingpikhou thimi heiri hiyura,

¹⁷ ngamri mardingpikhou thimi heiwane ringbi leiliyenri mardingurkhou heiri koukhatkhi toumanemak. Heiya Ane hiwurhillou lhou toumanelei.

¹⁸ Heitounei ngammei lamkriyei mardingpikhou heikhi heeya yrengbine lhou toukhou.

¹⁹ Lamkrini Moses'ne Tloulamyei chaylamrap namyerwaya thimi rapnung paothutpikhou. Heitoubi ane halpa rapbei heele tlang rapbei heeya loubine, yuira mankonbi, heitoubi yaakhmul phai-mrao'le hyssop heeng'nbur deekloubine Tloulamyei hilthungne lailik dourale thimi rapbei doura,

²⁰ asitoubi yunbine “Dunpune nanungei mardingpikur heiya simanlha namphangurna hee,” toubi sherbine khrephangpikur.

²¹ Heinakrimne Moses'ne hee heiya loubine Mardingrilna Khuiluphiyei Pucheem dourale heirou Pukhrumnarei yrengchana putchei (phuwan-daarkep, daarpangrap) nammaei dourakhi khrephangkur.

²² Heinakrimne Tloulamyei hilthungne putchei namyerwaya heeni marthingkyer, heirou hee dapikur nimakneri papya kuknanungei tounabom koukhatkhi mak.

Christaei Makatbi Hipikur Heini Borhya Louthutpi

²³ Heisitoubi, heinaksi putcheirap heiri Thangmunrei klei putchei rapbei hutlhanak khoine marthingbom thuk. Heiya Thangmunrei putcheirap heiri heirapyakhi duine lhangai putchei raple kalhonne makatrou da.

²⁴ Ngamri Christa'ne tlaipang thimiyei hutne chimmei shakrungya loubine sabaangkur Khyingei Bomra changmaklei. Heiya Ane Thangmun'hakra kachangbi, heitoubi bi heirou kaiyei rungkhlang khoine Dunpuei maibongra muyernanungei Ane kawura.

²⁵ Jehudiyei Suipipu Upawane ui-waayei heeya urbine kumserrei Namrouwei Hyingduina Bira wachang. Heiya Christaneri heinakni kalleng kallengne polhakbi makatkhoumak.

²⁶ Heiyanungri, Ane tlaipang yenyounareini karhol-karholni klah-knang douwurkhoularou. Heiya heisi tounung tlimri, asinungri tlaipangpal yenluilhakwairouri Ane thimi namyerrei borhya louthutnanung hanuitom khoine Ai'mshaya makatdurbi changura.

²⁷ Heirou thimi kantangnungei khalthutdurkhou hilthungne hanuidikri hirouhui, heitoubi heihillouri Dunpune pichar touheirou.

²⁸ Heinakrimne Christa'nekhi thimi namyerrei borhya urpinanungei hanuitom makatbine hipiwurla. Heirouri Ane thimi rapbei paapya kukpinanungei nimakne, Aya karngeibi klei thimi rapya kalpinanungei hanui kallengne muyerheirou.