HEBREWA 6 - KHYINGEI PU'TLOU Bible (BSI)

¹ Heiyanungri, kane yenyounarei marnoloukur paolaa rapya lakurkhoubi rongtlungei chaanranung maibong lhangra tonlhaklakase. Kane hanui kallengne borh lhourouwei ukning hungnei, heirou Dunpuya uklumnei lhoura cheemmun ranya thulbangna'nungei toumakase;

² touri yui'klup ngamya marnopinei, heirou lura hut khangbi shunchapinei ngamrou; khirouwei ringthutnei ngamrou, heirou klui naimakei pichar tounei ngam rapya hanui kallengne marnopi waiyouthu'nungei toumakase.

³ Heinung tlimri kane maibong lhangra tonduina'nungei touwase. Heirou Dunpune yapiyanungri heihakya kane tourou da.

⁴ Ngamri Dunpuei kwaarra leiwurkhou thimi rapya, heirou Lhawai Khyingei sirukya phalouheibi Thangmunrei hutthulya phaloukhei thimi rapya kousitoubi yane yai uklumya lakurkhounarei hanui ukning hungthuna'nungei ruimallengkur manerou?

⁵ Kouweiyo toulanungri yane Dunpuei tloulhangrap heiri lhangaime toubi muwurkhoula, heirou yane hungrou kyou mantrang heiyakhi muwurkhoula.

⁶ Heiya yane yai uklumya lakurkhoula! Heineri yayari hanui ukning hungyerthurouri hoimakei lhou hoiyura. Ngamri yane Dunpuei Chanapawaya hanui heeng karbakra manyarhatdurbi khulbungei maibongra rikraiyerwurthula.

⁷ Kouweiyo toulanungri, nungni karyom yukrosundabi heiyei yui loumongbi, heirou truncha-trunmaibi klei thimi rapnungei heengna-ronaya pukthutyerbi klei thleiya Dunpune phor pilei.

⁸ Heiya thlei heirouwei thru trungrap heirou loutrung rapne bil thimne katpukthutda'nungri kouya karsuknarou; heiri Dunpuei manchokurya phayerbine heitoubi meiwaira khinglhakurbi hongurou tomngeiya.

⁹ Heiya malungshi'kna paluirap, kane anaksiya yunbinekhi, naiyei ngamrou lhangaiyei phor heirou ralthutpinei bom leileihuime touri kane mulei.

¹⁰ Ngamri Dunpune naiyei lhou rapya heirou anung'tlim nai malungshikhei mutpikur heirapya, heirou nane Christen teinao rapnung watlhou toupikur, heirou asinungkhi toupibi klei heinung'tlim thihoiyurbi malumrouri nimaklei.

¹¹ Kane na napung kantangya hillou ramphane nai uklumei khalkur heiya chimne hungtlungyerna'nung msul-yuikhatne ningchabi kanthramyerkni.

¹² Kaneri naya yrathine leiyernimak, heiya uklumne kanthrambi Dunpuei kantompikurya phaloukhei thimi rapnakne nayakhi leiyerkni.

Dunpuei Chimyei Kantompi

¹³ Dunpune Abraham'nung tlou kantompiyei kaalnung, Ane lhou khat touyerna'nungei mardingpikhou. Aya duine tang dei hukhatkhi maknei ngamrou Dunpu Ai'mshaei minhakya palbine tlou kantompikur.

¹⁴ Heirou Ane kyun, “Keine neinungei tlou kantompilei touri Keine neiya phor pirou heitoubi neiyei yu-charap chungwane shunyerrou.”

¹⁵ Heirou Abraham'ne kanthram kheine karngeinei ngamrou hillouri ane Dunpuei kantompikur heiwaya phakur.

¹⁶ Thimi rapne tlou kantomrilyei kaalnungri yai'mshaya duine tang thimi khatdei minya tlangngbine tlou kantomkril, heisitoubine yai rkalkril tloubomrap heiya chetyerna'nungei tlou kantombi pichar luilhakril.

¹⁷ Aiyei tlou kantompikur heiya pharou kyou thimi rapnung Dunpune Aiyei kning heiri tekkhi chut naimakme toubi kanreni mutpina'nungei toubi Ane Aiyei kantompikur tlou heiyei doura mardinglhakthu.

¹⁸ Heiyanungri Dunpuei hungkur manemakrou tloubom khintam, touri tlou kantompi heirou Aiyei mardingpikur heiyei ngamrou Ane mandal manemak. Heitounei ngamrou Aiyei bomra truklhakur thimirap kayari kai maibongrei tangni dunkhoubi klei malungam heiwaya chetne rkolbi leinanungei ukning thoubaangpilei.

¹⁹ Kane kai malungam heiwaya rongchanyei mali-kangkui naksine khoulei. Heirou kai malungam heine kaya Thangmunrei Pukhrumna Cheemrei yarkhalna punshellei ril-lhangra ruilhakpilei.

²⁰ Heirou Jesu'ne kaiyei rungkhlang khoine, Melchizedek'yei shullamrei Suipipu khoine yarkhalna punshellei rilla loulamribi Suipipu Upa khoine leilei.