HEBREWA 4 - KHYINGEI PU'TLOU Bible (BSI)1 Heineri asinung Dunpune kantombi kanungei piwurla touri Aiyei yunthutdurkhou mathrilna bom heiya kane phaeirou. Heiyanungri kane muheilakase touri nai hangra thimi hukhatkhi heinaksi kantompikur mathrilna bom heiya phachangmakne dongurmak'nungei touwase. 2 Kouweiyo toulanungri, yai mayekkur heinakni kanekhi Lhangaiyei paolaaya mayekkurla. Yane paolaaya mayekkur, heiya paolaa heine yanungei koukhatkhi karsukna hoimak, ngamri yane paolaa heiya mayekyei'nungri uklum kyaoni ninglhakpimak. 3 Heiyanungri uklumkur thimirap kari heinaksi Dunpuei kantompikur mathrilnabom heiya phawurla. Awari Aiyei yunthutkhou heinakni hoiyura, “Keine malungkhawurbi tlou kantomkur touri ‘Keine yanung mathrilnanungei pikur ram heirouri yane kouniroukhi tlungchangmakrou!’ ” Tlaipangpalya sheemnei lhouya luilhakur hoiyanungkhi tlou awaya yunthutpikhou. 4 Ngamri Khyingei Lailik bi khatrou tlaini eniniyei ngamrou asitoubi yunthutkhou leilei, “Dunpune Aiyei lhourap namyerya luilhakurbi tlaini eninirou Ane mathrilkur.” 5 Heitoubi heihakrou asitoubi hanuikhi yunkhouthu. “Keine yanung mathrilna'nungei piwurkhou ram heirou yane kouniroukhi changchangmakrou.” 6 Lhangaiyei paolaaya lamkriyei mayekkur thimi rapne heinaksi mathrilna bom heiwaya phakhoumak, ngamri yane heiwaya uklumkhoumak. Heiya hoiyanungkhi thimi thayari mathrilna bom heiya phayerkhou. 7 Kouweiyo toulanungri tloubom heiyei ngamrou Dunpune “Angtu” toubi ung tlaini khat chimne mutpibi leiyura. Kum kounakei maibongrou Ane David'nung shunthutyerbi Khyingei Lailikra asitoubi mayelhakbi khoulei. “Angtu nangni Dunpuei houya mayeklanungri, naiyei ukning kalyermak.” 8 Kounakpi Joshua'ne thimi rapnung Dunpuei kantompikhou mathrilna bom heiwaya pikhoulanungri, Dunpune hillei hungrou kyou tlaini khatdei ngamrou yunkhoumakrou. 9 Heiyanungri Dunpune eninirou mathrilkur heinakni, Aiyei thimi rapnungei mathrilna tlaini khat hungeirouhui. 10 Kouweiyo toulanungri, Dunpuei kantompiwurkhou mathrilna tlainiya pharou kyou thimi heiri, Dunpune Aiyei lhourei mathrilkur heinakni akhi aiyei lhou'rouwei mathrilheirou. 11 Heiyanungri, kane heinaksi mathrilna tlaini heiya phananungei maneleiyen lhangaiya touwase, heiyanungri kai hangra hukhatnekhi uklum shullurbi mathrilna tlaini heiwaya phachangmak yaomakrou. 12 Ngamri Dunpuei Tloulhang heiri khring heirou chimmei lhoutou raa khintam klei shon khyangyakhi duine khraat. Heine tlaipangei sharungrakhi, lhawairakhi, heirou thru-rmit'rakhi, lhaorakhi thrulbine toubaimane, heirou tlaipang thimi khatdei ukningrei maduya, heirou aiyei kningyakhi mumanelei. 13 Heini Dunpuei maibongra koukhatkhi munne yulkhou manemakrou; tlaipang dourei sheemthutkur put namma Aiyei maibongrari yertlengwa muchilei. Heirou ka namyerwakhi Aiyei maibongra kaiyei lhourap namma mutdeirou. Jesu'ri Tangdui Suipipu Upa 14 Heiyanungri, kane kaiyei uklumnei chaan heiya chetne rkolphopbi leiyase. Ngamri Dunpuei Chanapawa Jesu'ne kaiyei Suipipu Upa khoine Dunpuei maibongra louchawura. 15 Heitoubi kaiyei Suipipu Upa heiri kaiyei klalya kukpichangmak puhakri nimaklei. Heiya khatrane kaiyei Suipipu Upa heiri kaya malhimkur heinakrim Ayakhi lhou kantangrou malhimyerwurla, heiyanungkhi Ari paap toukhoumak. 16 Heiyanungri, kane uklum chetne khoubi, heirou Dunpuei kringpina Krungbom heirou changnanungei marshikase. Heiyanungri kane bi heirou kaiyei changbomthuk kheenrou kaya trungpinanungei Aiyei malungshipi khei heirou kringpi'kheiya kane pharou. |
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
Bible Society of India