HEBREWA 3 - KHYINGEI PU'TLOU Bible (BSI)

Jesu'ri Moses'yakhi Duine Tang

¹ Dunpuei ungthutpikur keiyei Christen teinaorap, kaiyei uklumyei Suipipu upa hoipina'nungei Dunpuei yenmalhetpikur Jesu'ya khalthilak.

² Moses'ne Dunpuei Cheem watlhounung'tlim malungamkna khoine leikhounakni, aya heinaksi watlhouya touyernanungei khalthutpikur Dunpunung'tlim malungamkna khoine ane lhou toukhou.

³ Cheem sabaangkur thimi heine cheem heiyakhi duine rikrai khrumkna phakur heinakni, Jesuyari Moses'yakhi duine rikrai khrumpibom thuklei.

⁴ Ngamri cheem kantangya sabaangpi thimi klei -heirou put namyerya sabaangpi pu heiri Dunpu,

⁵ Moses'ne Dunpuei cheemra Aiyei malungamkna shik khat khoine leikhou, heitoubi Dunpune hillei yunthutnungei tlourap namyerwaya yunthutkhoupi.

⁶ Heiya Christane Chanapawa khat khoine Dunpuei Cheemra malungamkna khat hoikhou. Heirou kane kaiyei uklum, heirou malungam heiya chetne ningchabi mayunga'nungri, kari Aiyei cheemrap.

Dunpuei Thimi rapbei Karnganabom

⁷ Heiyanungri Lhawai Khyingei kyunnakni, “Angtu nangni Dunpuei houya ninglhakla'nungri,

⁸ nai nutar-patar rapne Dunpuei shunya chanthungmakne, yane ramhangra leiyei kalnung Aya malhimkur heinakni, nanekhi naiyei ukning kalyerbi leiwurmaklo.

⁹ Heirou yane kum somli'yei rillou ramhangra leiyei kaalnung, Keiyei touthutkur kngakei lhourap kounakya mubinekhi, yane Keiya malhimnara dayernanungei wairangkhou, toubi Dunpune yunlei

¹⁰ Heitounei ngamrou keine malungkhawurbi thimi rapya asitoubi shunkur. ‘Yane Keiya chi-rikraimaknei ngamrou Keiyei chaylamya hil chanthungmakne lam lehne chawurkhou.’

¹¹ Heitounei ngamrou Keine malungkhawurbi yanungei tlou kantomkur, ‘Keine yanung mathrilna'nungei pikur ram heirouri yane kouniroukhi wa'tlungkhou manemakrou!’ ”

¹² Keiyei uklum paluirap, nai hangra huhune lhangaimak ukningya khalwurbi, heirou uklumya lakurkhoubi Khring Dunpu'rouwei trukurmak'nungei mukheine leiyalo.

¹³ Heinungchumri, Khyingei Lailikrei kyunnakne, “Angtu” toubi ung tlaini arou nai hangra thimi hukhatyakhi minammak'nungei, nane khatle-khat tlainiser ukning thoubaangrillak.

¹⁴ Ngamri kane kyou'rouweine kai malungamkur heirou chetne mayungbi leiyanungri ka namyerwari Christara palui hoilei.

¹⁵ Khyingei Lailikne asitoubi yunlei. “Angtu nangni Dunpuei houya ninglanungri, nai nutar-patar rapne Dunpuei shunya chanthungmakne leikhounaksi, nakhi nai ukning kalyerbi leiwurmaklo.”

¹⁶ Dunpuei shunya ningmakne ukning kalyerbi leikur thimirap heiri huwo? Yarap heiri Moses'yei ruipipu hoinarei hil-chanthungbi Egypt ramya lakkurkhou thimirap nimakeiko?

¹⁷ Yaidoura kum somlibil Dunpune malungkhakur nimaka? Heirou ramhangra chayeinung borh lhou tounei ngamrou hiwurbi maangkur thimirap heiri yarap nimako?

¹⁸ Heirou Dunpune malungkhane tlou kantomkur heiri, “Keine yanung mathrilna'nungei pikur ram heirou yane kouniroukhi tlungchangmakrou”- toubi Ane yunpikur heiri borhyei lhou toukur thimi rapya kyun nimakeiya?

¹⁹ Heiyanungri kane mula touri yane uklummaknei ngamrou heinaksi ram heirou changchangmakrou.