HEBREWA 2 - KHYINGEI PU'TLOU Bible (BSI)

Ralthutpina Bom

¹ Heingammei kai mayekkur tlou rapya chimmei lamra krakne churphopbi leiyanungri, kaya chimnabom heirouwei martlaoloukur manemakrou.

² Thangring rapne kai nutar-patar rapnungei shunthutdurkhou paolaarap heiri chimme toubi mutpiwurla, heirou hukounak khatne tlou heiwaya chanthungpimanung, nimanung tlou heiya baiyerlanungri, ane aiyei phabomthuk tantiya pharouri leiyura.

³ Heiyanungri kousitoubi kane heinakei tangkur raalthutpina bom'rouwei kartleirouwo? Heirou Puhakni lamkrini anaksi ralthutpina bomya yunthutpibi muyerkhoula, heirou aiyei yunthutpikur heiwaya mayekloukur thimi rapne kai maibongra heiri chimhakme toubi yunpiwurla.

⁴ Heina douroukhi Dunpune Aiyei kning hilthungne, Aiyei Lhawai Khyingei hutthul rapya yenpiwurbine, kngakei lhourap kounak, mideini touchangmak lhou rapya heirou hutlharap kounakya touthutdurbi kanungei mayungpiwurla.

Kaya Ralthutpina Bomra Ruilhakpi Pu

⁵ Ngamri Dunpune Thangring rapya, kaiyei yunpibi klei hillei hungrou kyou tlaipang heiyei doura paalnanungei mantrangri pikhoumak.

⁶ Heinung tlimri, Khyingei Lailik bi khatra asitoubine yunkhou leilei. “O Dunpu, Neiyei heinak kringpi'kheine ningchapibi klei thimi heiri kouwo? Nimanung, Neiyei heinak malungshipi kheiyei thikulpi thimiyei Chanapawa heiri kouweiyo?

⁷ Nangne lepchaeinung Ayari Thangring rapyakhi duine mandini sheempiwurkhou; heirou Nangne Anungei thang'alle rikrai khrumknaei lukhupya khupbangpiwurla,

⁸ heitoubi Aya pu hoiyerbine put namyerwaya Aiyei hodaakra khoupiwurla.” Asitoubi yunlei touri Dunpune tlaipang thimiya “Put namyerwaei doura pu hoiyerwurla” toubi kyun heinakni, put namyerwa heiri Aiyei hodaakra khoupiwurla. Kousiya hoiyanungkhi asinungri kai thinarari tlaipang thimine put namyerwaei doura pu khoine leimakura.

⁹ Heiya asinungri kheen lepchanungei Thangring rapya duine mandiyerkur Jesu'ne put namyerwaei doura Pu hoibi klei kane mulei, heingammei Dunpuei kringpinei ngamrou Ane thimi nammanung'tlim hipibom thuk. Asinungri Aiyei klah-mrim doukhoubi hipiwurnei ngamrou Ayari thang'alle heirou rikrai-khrumknaei lukhupya khupbangpikur heiri kane muphawurla.

¹⁰ Ahakne chimme touri put namyerya sheempibi Yukpipu Dunpune Jesu'ya klah-knang douyerbine rong tlungyerkur heiyei ngamne thimi namyerwaya thang'allei chanaorap hoiyernei sirukya phayerkur. Kouweiyo toulanungri, Jesutomni yaya ralthutpina lamra ruipipu hoilei.

¹¹ Ngamri ane thimi rapya yai borh'rouwei marthingpi, heingammei Ale heirou marthingpiya phakur thimirap namyerwaei pawari khattom hoilei. Heingamei Jesu'ne yaya Aiyei teinao rapme toubi chi-khyamakne ungpikur manelei.

¹² Heitounei Ane Dunpu'nung asitoubi yunlei, “Keine Neiminya Keiyei teinao rapbei maibongra yunthutrou; heitoubi yai kartilnara Keine Neiya mathangrou.”

¹³ Ane hanuikhi yunthulei, “Dunpu'nung Keiyei uklum pilhakrou.” Heirou Ane asitoubikhi yunlei, “Keine bi arou Dunpune Keinungei pilhakkur chanao rapbei hangra leilei.”

¹⁴ Dunpuei ungthutkur chanaorap heiri sharungei, heirou heeyei thimirap hoinei ngamrou, Jesu Aimsha'hakne yanakrim thimirung khoine pukbi, heirou yai tlaipang sharungei klah-knangya siruk dongmalnakhou. Heisitoubi Ane khi ramphaei klah-mrim doukhoubi, khiyei doura pu hoibi klei Satan'ya maangyernanungei lhouya toukur.

¹⁵ Heirou hirou chinei ngamrou yaiyaiyei chaanya shok hoiyerwurbi leina birouwei Ane malhetthutpirou.

¹⁶ Ngamri tanghakni Aiyei trungpikur heiri Thangring rapya nimak. Heiya Khyingei Lailikrei kyunnakni, “Ane Abraham'yei yu-cha rapya trungpilei.”

¹⁷ Ngam heine Upawane thimi rapbei borh kukpinanungei toubi Dunpuei khoi watlhoura kringpi kheile malungamkna khoiyei Suipipu Upa hoiyerwurla.

¹⁸ Heingamei asinungri Upawa Ai'mshane malhimnara, klah-knangra siruk dongloubi, heirou malhimnara darou kyou thimi rapya Ane trungpikur manerou.