HEBREWA 1 - KHYINGEI PU'TLOU Bible (BSI)

Dunpune Aiyei Chanapawaei Ngamrou Tlou Yunpi

¹ Bongei chaanrou Dunpune kai nutar-patar rapnung kheen kounakrou heirou lam kounakroukhi thimkhui rapya tlou yunkhoukyer,

² heiya angtu chaanyei tlainirouri kanungei Aiyei Chanapawaei ngamne Ane yunpiwurla. Dunpune Aiyei ngamroutom tlaipangpalya sheemthutkur, heirou Aitamtomne tlaipangpal klui ramphane put namyerwaei doura Pu hoinanungei Dunpune Aya khalthutkhoupi.

³ Airouwei Dunpuei thangya alpilei, heirou A heiri Dunpuei shakrunghakhi khoi, heitoubi Ane Aiyei tloulhangei mantrangne tlaipangpalya kul chalphopbi Pu khoine thrungbine leilei. Ane tlaipang thimiyei borhya kukpinei lhouya luilhakur hillouri, Thangmun ramra Mane-mantrang Dunpuei thya lhangra ombine leiyura.

⁴ Dunpune aya duine tang minya thulpiwurbi, Chanapawa heine Thangring rapyakhi duine tanglei.

Dunpuei Chanapawane Tangdui

⁵ Ngamri Dunpune Aiyei Thangringrap khattom'nungkhi asitoubi yunkhoumak touri; “Nangri Keiyei Chanapawa; angturi Keiri neiyei Pa hoiyura.” Dunpune Thangring khatdei ngamrouri asitoubi kouniroukhi yunkhoumak, “Keine aiyei Pa hoirou, heitoubi ane Keiyei Chanapawa hoirou.”

⁶ Heiya Dunpune Aiyei Cha-samran heiwaya tlaipangpalla yenyillou waiyouweinung, asitoubi yunkhou, “Dunpuei Thangringrap namyerwane Aya khrummeirou.”

⁷ Heiya Thangring rapbei ngamrou Dunpune yunthutkhou, “Dunpune Aiyei Thangring rapya lhawai khoine sheemkhou, heirou Aiyei shik rapya meithlan khoine sheemkhou.”

⁸ Heitoubi Chanapawaei ngamrou Dunpune yunthutkhou, “O Puwo, Neiyei Krungram heiri klui naimakei-klui naimak hoiyeirou! Nangne Neiyei thimi rapbei doura chimmei shungkrokya shinbine paalheirou.

⁹ Nangne chimya malungshi, heirou klalya machin. Heingammei Puwo, Neiyei Dunpune Neiya khalthutpibi, heirou Neiyei palui rapnung pikurya duine hakrao-langthouei shirekya Neinungei teipiwurla.”

¹⁰ Ane asitoubikhi yunkhou, “Dunpu, Nangne kyourouweine tlalipangpalya sheemthutkhou, heirou thangwanrap namyerwakhi Neiyei hut'hakni sheemthutkhou.

¹¹ Yari maangeirou, heiya Nangri kmit naimakne leithungrou; yari phi'up nakni yenmanwurbi cheetdurheirou.

¹² Nangne yayari phi'up nakni khyotumheirou, heirou yari phichun nakni manwurheirou Heiya Nangri kheenserrou khatnakthil hoibi leirou, heirou Neiyei kumchaan heine dongkur-trimkur naimakne leirou.”

¹³ Dunpune Aiyei Thangring rapnung kouniroukhi asitoubi yunkhoumakhui, “Neiya yeekna thimi rapya Neiyei hodaakra, Neiyei ho makhana khoine khoupibongyenri, Nangne Keiyei thya lhangra hei'ommalo.”

¹⁴ Heiyanungri, Thangring rapri kouwei? Yari Dunpuya watlhou toupi lhawairap. Heirou raalthutpina bomya pharou kyou thimi rapya trungpinanungei yenmalhetkur rapme.