HAGGAI 2 - KHYINGEI PU'TLOU Bible (BSI)

¹ Heitoubi kum heiyei tangla tlun-eni tlungle, heitanglayei tlaini somnile khatrou Thimkhui Haggai'nung Umpuei tloune yongbine:

² She-alti-el'yei chanapawa, Judah'yei Rampu Zerubbabel'le Josedech'yei chanapawa Suipipu upawa Joshua'nungkhi, heirou himalei thimirap nammanungkhi atoubi shunpilak;

³ “Heinaksi cheemmei bongei thang lhangai heiwari huni naihangra muthung yaoleiko? Asinungri nani kounaksi mulei? Naiyei mit'thrilnarari bongeiya tekkhi malnamakkura nimakka?

⁴ Heiya asinungri, O Zerubbabel, neiyei ukning krak hoilaklo,” toubi Umpune shunlei; “heirou neiyei lhawai kyaoni toulaklo, O Josedech'yei chanapawa, Suipipu upawa Joshua, heirou ram arouwei thimirap na nammakhi ukningra krakni lhou toulaklo, toubi Umpune shunleime; kouweiyo toulanungri, Keine naya kalhonpileime.” toubi Thangwan-Shimleiyei Pu Umpune shunlei.

⁵ Nane Egyptrei wathukyei kheenrou Keine nanungei kantompikur tlou hilthungni, Keilhawaini naihangra leileime, heineri nari chimaklo!

⁶ “Ngamri Thangwan-Shimleiyei Pu Umpune atoubi shunlei, hanui kallengni, kheen beileibi, Keine thangwan ramya, tlaipangpalya, samadruya heirou thlei taarna ramkhi khngaakrouwa.

⁷ Heitoubi limrap namyakhi Keine khngakrouwa; heiyanungri lim namyerrei madu lalthumrap heiri bi arou hungchangchirou, heitoubi Cheem heiwaya Keine thang'alni thimyerouwa,” toubi Thangwan-Shimleiyei Pu Umpune shunlei.

⁸ “Kulshankhi Keiyei, heirou Sinakhi Keiyeime,” toubi Thangwan-Shimleiyei Pu Umpune shunlei.

⁹ “Heitoubi asiyei sabaangrou kyou Cheem awayei thang lhangairi bongei Cheemya duini thang thukroume, toubine Thangwan-Shimleiyei Pu Umpune shunlei; heirou Cheem arou Keine kying yenpirou,” toubine Thangwan-Shimleiyei Pu Umpune shunlei.

Thimkhuine Suipipu'le Kartongril

¹⁰ Darius'yei Krungchaan kum-khni hungtlungkur heirouri, heikumyei tako tlung tanglayei, tlaini somni'le phalinirou, Thimkhui Haggai'nung Umpuei tloune yongbi atoubi shunpikur.

¹¹ Thangwan-Shimleiyei Pu Umpune asitoubi yunlei, “Ayilne koutoubi yunleikhiyo, Suipipu rapnungei tlou ngaithilaklo.

¹² Kounakpi thimi napung khatni aiyei phi-upni khyingei anchumya yumbine uryei kheenrou, aiyei phi'up heiwani mumtolra, nimanung an'khminra, nimanung darkha yuira, nimanung shirekra, nimanung koukou chana-maina putra touthirkur hoiyanungri, aiyei anyum heiwari khyingei put hoiheirouwa?” Heirouri Suipipu rapne loumallangbi kyun, “heiwari hyingmakarou.”

¹³ Heirouri Haggai'ne shun, “Khilhungya palbine marmokkur thimi khatni heinaksi khyingei putcheiya pallanungri, putchei heiwari hyingeirouwa?” Heirouri Suipipu rapne loumallangbi kyun, “Heiri marmokkura.”

¹⁴ Heirouri Haggai'ne mallangbine shun, “Heinakrimne thimi rapkhi heirou limrap nammakhi Keiyei mit'thrilna maibongrari marmokwurchiya; heisi toubine yaihutni toukur lhourap nammakhi heirou yaiyei makatkur putcheirap nammakhi borhwurchiya,” toubi Umpune shunlei.

Umpu ne Phor Pinungei Mardingpi

¹⁵ Heineri asinungri, Keine nanungei shunkniri, “Angtu tlaini'rouweini bongei yenralkur chaan rapya hilkallengni rie yukningthutbi tirrithilak. Pucheemra thlung khatdei doura thlung khat marthunbangbong'nungri, nani kalthi kanyerchakhou.

¹⁶ Heitoubi kheen heirouri, na hukounakne chapong somni dunbi khounanungei toubine markumkhou, heiya ane chapong chiptamya duine dunkhouchangmak; heirou hukounakni darkha heiyui khang somnga sumlhaknungei toubi ningchakhou, heiya ani khang somnitomya duine sumlhakbi changmak.

¹⁷ Ngamri Keine naiyei lhouchur-lhoupangna doura, trunwaira, phailoura khlung dayerwurbi, heirou thurkha chukyerwurbi, heirou nungheikhi dayerwurbi namma norwurkhou. Heisiya hoiyanungkhi nari Keinungei mai khreilhakmaklei,” toubi Umpune shunlei.

¹⁸ “Angtu'rouwei waiyoubine youkur chaanyei tlun-tako tlung tanglayei somni tlung tlainirou, Umpuei Pucheemya cheemmun thulbangkur heiwaya yukningthutlak.

¹⁹ Kheen heirouweini chapongra trunwaiyei lung tekchakhi maleimakurako? Heirou darkha yamkhi, khyudhei trungkhi, pohei trungkhi, heirou Olive trung rapkhi hathakhi hei heimakurako? Heiya angtu'rouwei waiyoubi Keine neiya phor pirouwa.”

Umpu ne Zerubabel'nung Mardingpi

²⁰ Heirouri hanuikhi heitanglayei somnile phali tlung tlainirou Umpuei tloulhang rapne Haggainung yongbine:

²¹ Zerubabel, Judah'yei Rampu heinungei atoubi shunpilak; “Keine thangwan'rap heirou tlaipangpalkhi khngaakrouwa.

²² Heirou Keine Krungbom rapya namsundarouwa; heitoubi lim rapbei Krungbom rapya Keine toubaichirouwa; heirou yaiyei sapuk kaari rapkhi nangdeekbi, heirou heirapya tungbi klei thimi rapyakhi hiyerrouwa; heirou yaiyei sapuk rapkhi heirou heirapya tungbi klei raallui rapyakhi namma minung-minung hatrilwurbi hiyerchirouwa.

²³ Shieltiellei chanapawa, Keiyei shikrui, O Zerubbabel, tlaini heirouri Keine neiya lourouwa. Heiyei tlainirouri Keine neiyari Keiyei makmeiyei hutshi hoiyerrouwa; ngamri Keine neiya khalthutdurlame,” toubi Thangwan-Shimleiyei Pu Umpune shunlei.