HAGGAI 1 - KHYINGEI PU'TLOU Bible (BSI)

¹ Darius'yei Krungchaan kum-khni tlung, tlun-thruk tlung tanglayei lamkri tlainirou, Judah'yei Rampu, She-alti-elyei chanapawa Zerubbabel'nungle Josedech'yei chanapawa, Suipipu upawa Joshua yakhuntanung Thimkhui Haggai'ne Umpuei tloulhangya shunthutpibi kyun:

² Thangwan-Shimleiyei Pu Umpune shunlei, “Umpuei Cheemri sabaanglum hungphamakhuime,” toubine thimi rapne yunlei.

³ Heirouri Thimkhui Haggai'nungei Umpuei tlouni atoubi yukshunkur:

⁴ “Umpuei Cheemne deeksundabi leiyeinung, naneri lhangaine sabaangkur cheem rapra kleiri toubom thukleiko?

⁵ Ngam heineri asinungri Thangwan-Shimleiyei Pu Umpune asitoubi shunlei, ‘Nai ringbi klei heiwaya nane khminne khalthilak,

⁶ touri, nani marthumni trunwai lung tuklhaklei, heiya thacha luklhaklei; nane chamailei, heiya uktho toukhi naimaklei; nane monglhaklei, heiya yuikhatkhi khrahmaklei; nani phirul-phishambkhi baanglei, heiya klum toukhi naimaklei; heirou nane lal taal'lhakbikhi, mayu putna tuykaora marpeibi khounaksine hoiyura.’ ”

⁷ Thangwan-Shimleiyei Pu Umpune atoubi shunlei, “Naiyei ringbi klei chaanlamya yukkhalthilak.

⁸ Lhungdoura kakabi heeng shatlaka, heitoubi yensundabine Pucheem sabaanglaka, Keine heiwaya mubi Keiyei malung khrahroume, heitoubi heiyei rilla Keiyei thang'alne bil thim'rouwa,” toubi Umpune shunlei.

⁹ “Naneri chungni pha'knine thipharou, heiya thilak, nanungei thacha hungchangrou; heirou nane cheemra yenluklhakrou, heiya Keine shamatrailouyerou; Koungammei? Ngamri Keiyei Pucheemne deeksundabi leiyeinung, nari mimiyei cheem lhangai-lhangaine sabaangbi nungkngaine leirillura,” toubi Thangwan-Shimleiyei Pu Umpune shunlei.

¹⁰ “Heingamei naidoura nungthourei rdai yongdamakura; heirou thleirei trunwai lung rapkhi hei heimakura.

¹¹ Heirou Keine tlaipang thleidoura, lhungdourakhi heirou trunwai lung, heenghei-roheiyei dourakhi, heirou thleirei katpukthut heengna-ronayei dourakhi, heirou uiwaa rapbei dourakhi, heirou tlaipang thimiyei churna-pangna nammaei dourakhi nung royermakurbi khreng-khreng taaryerwurla.”

Thimi Rapne Umpu ei Chaytlou Chanthungkur

¹² Heirouri She-alti-el'yei chanapawa Zerubbabel'le maleithung Josedech'yei chanapawa Joshua Suipipu Upawa yarukhnine thimirap nammale kalhonni, yaiyei Dunpu, Umpuei shunpikur tlou rapya lhangaine hil chanthungkur; heirou Thimkhui Haggai'ne shunthutpikur paolaakhi ninglhakkur, ngamri Umpune aya yenmalhetpikur. Heisitoubi thimi rapne Umpuya chi'rikraini chanthungkur.

¹³ Heirouri Umpuei paocha thimi Haggai'ne Aiyei Pao-laa rapya thimi rapnungei shunthutbi ani atoubi kyun, “Keine naya kalhonpiroume toubi Umpune shunlei.”

¹⁴ Heisitoubi Umpune She-alti-el'yei chanapawa, Judah'yei Rampu, Zerubbabel'le, Jehozadak'yei chanapawa, Suipipu upawa Joshua'yakhi, heirou himalei thimirap nammayakhi ukning thoubaangbi kanchekyerkur; heisitoubi ya nammane wakar'umbine, Thangwan-Shimleiyei Pu Umpu, yaiyei Dunpuei Cheemya sabaangnanungei lhou churkur.

¹⁵ Heirou Darius'yei Krungchaan kum'khni hungtlungeinung, tlun-thruk tlung tanglayei, tlaini somnile phalirou yane lhou churyoukur.