HABAKKUK 3 - KHYINGEI PU'TLOU Bible (BSI)

Habakkukni Umpu nung Shunchakur

¹ Shigionoth'ra Thimkhui Habakkuk'ne shunchakur:

² O Umpu, Neiyei toumane thang'allei ngamrou keine loumayekurlame, heingamei keine Neiya chi-rikraine thimmurame; O Umpu, Neiyei bongei touthutdurkhou kngakei lhourap heiri kaichaan aroukhi kallengne touthutbine muyerpilako; Nangne malungkhani hoiyanungkhi kayari bei kringpilaklo!

³ Dunpune Teman touri Edom'rei wathuklei, heirou Khying Pu heiwane Paran Lhungdourei wathuklei. Heitoubi Aiyei thang'alne thangwanram alkaryouwura, heirou tlaipangra Aya mathangnei houni thimmurame. Selah!

⁴ Heitoubi Aiyei kwaar heiri liptlai alnaksine allei; heirou Aiyei mantrang yulkhouna sina banreiyei hutmairei kwaar yuk'althutlei.

⁵ Aiyei maibongrari chanshernei pharkna loumalhetlei, heirou meihal karwul rapya Aiyei homai hilla heichanthungyerlei.

⁶ Ane mayungbi, tlaipangpalya holmarkhekur, heitoubi Ane mit'thrillei kalnungri, limdeiyei thimi rapri chiwurbi kandupburchiya; heirouri bongeiyoubi louklei lhungdou rapkhi yenchimsundawura, heirou chut-naimak lhungpumcha rapkhi nimsundawura. Aiyei lamtlun rapri klui naimaklei.

⁷ Heitoubi Cushan'ra khuiluphi cheem sabi klei thimi rapri chiwurchiyame touri keine muwurla; heirou Midia ramrei thimi rapkhi chiwurbi kanchunwurchiya.

⁸ Kungya malung khrahmakurako Nangya, O Umpu? Neiyei malungkhakur heiwaya kungban rapyako? Neimalung shani malungkhakur heiri samadruei dourako? Heitounei Nangne Neiyei sapuk doura heirou sapuk kaariya tungbine Neiyei thimi rapya raal maniyerkurko?

⁹ Neiyei thowarei malaa-chei phuithutbine, lim rapbei doura kantomkur hilthungni tanti pinanungei malaa taakra manringurchila, Selah! Tlaipangya Nangne kungrei yuinakni yasundayerwurla.

¹⁰ Lhungdou rapne Neiya mubine kanthingurchiya; nungthourei nung rosundabi yuini omdummurchila; heitoubi samadrurei yuilhouni dirdir kartlinni katfyouwura; heirou aiyei yuilhouni nungthou katokne choune mathumbaangura.

¹¹ Neiyei khyingei malhetthutkur malaa-cheiya mubine, heirou leplep mherchakur raal cheipak lhimya mubine, Kinnile tanglane nungthoura ai'aiyei bira mayungurchiya.

¹² Nangne malungkhawurbi tlaipangra hokar malamchabi, Neiyei meithukkei malungkha heiwane lim dei rapya tatmanuibi honfletchakur.

¹³ Heitoubi Nangi Neiyei thimi rapya kalpinanungei wathukpikur; heirou Neiyei shirek teipiwurkhou Krungyakhi Nangne kalpikur; heitoubi lhangaimak thimiyei ruipi puya Nangne umtluiwurbi, aiyei cheemmun ramphayakhi phorthutbine maangyerwurla. Selah!

¹⁴ Nangne yaiyei raallui upa rapya ai'ai mshaei raal cheipakra karhayerbi hiyerwurla; yani keiyei thimi rapya koncheknanungei toubi lhimnung martheetang'naksine heichanthutkur; yani kanring-kanwai rapya muni madullourou nakrimni manrangbine haraolei.

¹⁵ Nangne samadru doura Neiyei sapuk tungbine heiraalyeinang, samadrura yuilhou phun fyouni kanchekchawurlei.

¹⁶ Heiyei houya mayeknarou, keimalung kanchunkur; heirou keiyei mur'unkhi leoleo kanthingkur; keiyei thru-lhaora ramphane chulkurnakne nawura, heingammei keihokhi karchimchangmakura. Heiya Umpune keidoura raal dakur thimi rapya tanti pibi klah mathrilnei tlaini hungbongyenri keine doubi leirou dawa.

¹⁷ Khyudhei trungni nabo heimachit'thutmakne dongura'nungkhi, heirou darkha yamra darkha heine heimakura'nungkhi, heirou Olive heine rutduranungkhi, heirou phailoura trunwaiyei lung heimakne donguranungkhi; heirou yaorulne hitumwurchibikhi. Heirou halshangra halrul masuikhounungei makkurbikhi;

¹⁸ Umpuei bomra keine harao-langthouni leirou, heirou keine Ralthutnabom keiyei Dunpura keine malungkngam khourou.

¹⁹ Pu Dunpuri keiyei mantrang hoilei; Ane keiyei ho rapya rchao horap'naksine mantrangyerlei; heitoubi Ane keiyari lhungbung chounarakhi kaka maniyerlei. Keiyei taari kyaone, Sheirung upawaei bomra choune mathangkur hoiniyasu.