HABAKKUK 2 - KHYINGEI PU'TLOU Bible (BSI)

Dunpune Thimkhui Rapnung Mallangpi

¹ Keine raal ngaakna shangkai chounara kakabine, Umpune keiyei tlou makatya koutoubi pao mallengleiyo toubi ningthibi karngeirou.

Umpu ne Habakkuk'nung Pao Mallengpi

² Heirouri Umpune keinungei pao mallengbi asitoubi shunlei, “Neinungei kar'anbi muyerkur tlou rapya thlungpakra kanre-kandangne mayethutbine khoulaka.

³ Kouweiyo toulanungri, kar'anbi muyerkur heiwari aiyei trumya ngaakbine leikurra, heiya aiyei kheen hungtlunganungri kanrethutrou kleiya, heiwari kanrethutlheng'makanungkhi, mandalbi shuirou tlouri makkura, heinungei'tlim nangne karngeibi leilaka; ngamri asinunghak kanrethutmanungkhi hungthukrouri kheen tlamakarou.

⁴ Thilak, tharmu chimmak, tangcha thimiri anungei chimmo touri koukhi makrou, heiya tharmu chim thimini aiyei uklumnei ngamni ringrou.”

Tharmu Chimmak Thimiyei Kmaang

⁵ Heiyakhi duinara tangcha thimiyari tulni martlaowurbi, kraothukni, cheemrakhi mul'leichangmaklei; heirou aiyei ukningra khramtangni maduphabi, aiyei uk'thepkhi Sheol naksine maryayerlei; heirou lhanpurne pilnaimak naksine kropilkhi naimaklei; heisitoubine limrap nammaya anungei lukmallongkur; heirou thimirap namyerwaya anungei manmallongkur.

⁶ Raalla manmallongkur thimirap nammani aidoura laonabi yailim yunnabi, heirou yani aidoura shei shaknabi yunheirou: “Aiyei lalkhi nimakpaya ani khum'mallongbine marpeibaangkur thimi, heirou minungei nambine lungmallongbine laldun thimi heinungeiri kounakei laknawo! Aiyei thleiyei phura mallonglhakhou lalthum rapya kounak tlani pulchirouwo?”

⁷ Neiyei kulchalkur thimi rapne tallengni kanthoubi, heitoubi yani neinungei kalleklhakbi neiya chikkeirouhui; heitoubi yani neiya taponyerbine kanelyerheirou; heirouri nari yaiyei hutchun hoirouwa.

⁸ Ngamri nangne limdei kounakya raal dabine toumangurkhoula, asinungri himaleithung thimi rapne neiyari maangyerrouwa; ngamri nangne thimi rapbei hee dayerkhounei, heirou yai ram rapya thuithini toupiwurkhounei, heirou yai khukarthil rapyale heiyei rillei klei thimi rapyakhi konmangur'khounei ngamrou neidoura yani khlang lhakrou youlei.

⁹ Khril lhangaimakne khramtangne markumlhakkur lalthumni aicheem thimni marpeilhakbi, mucha thimi rapne muchangmaknungei nungthou katokni markoolphopbi klei thimi rapnungeiri kounak lahkna!

¹⁰ Ngamri nangne lim kounakya maangyerkur heini neicheemya rikrai phayerlei; heirou neiyei chaanya maithee phayerwurla!

¹¹ Kouweiyo toulanungri, raapthangrei thlung rapnekhi ungraobi yunheirou, heirou cheembungrei lhoongnekhi ungraobi loumallangeirou.

¹² Thimi hatnei hee-naile markotbine khukarthil phunkanthou thimi, heirou minambi kholil sabaangkur thimi heinungeiri kounakei lahkna!

¹³ Thilak, tlaipang thimi rapne ip-neikhi naimakne lhouchur-lhoupangbikhi meira kaangtlumbi dongkur, heirou lim rapne koukhi karsukmak lhoura lhawai lahyerkur namyerwa heiri Thangwan-Shimleiyei Pu Umpurei hoiyerkur nimaka?

¹⁴ Heiya samadrura yuini bil thimkur heinaksine, Tlaipangpalri Umpuei thang'allei roushingne bil thimheirou.

¹⁵ Aiyei cheemlhunrei thimiya tulbonrei fleithutbi kalleng-kallengni namngalbi pimong-malipbine, heitoubi aya phirulkhi ningthutyermakne rikrai pikur thimi heinungeiri kounakei laknawo!

¹⁶ Heirou neiya rikrai khrumna'nungei tlimri rikraiknani thim'rouwa; nangkhi mongbine malipburlaka, heitoubi phirulkhi yaomakne hakthilni rikrai doulaka! Kouweiyo toulanungri, Umpuei thya lhangei hutrei malungkhanei daarkep heiwari neidoura yongdarouwa; heirouri rikraiknaei mairung heiwane neiyei thang'al hoinarouwa.

¹⁷ Kouweiyo toulanungri, neiyei Lebanonra touwurkhou thuithiyei lhou heiwane neidoura yongdabi hubphaprouwa; heitoubi neiyei ramyaa rapya maangyerwurkhou heiwane neiya chi'kandupyerrou; thimi rapya hee-nai dayerkhounei, ram heiwaya konkhounei, khukarthil rapya nangbaiwur'khounei heirou ram heiyei thimi rapya maangyerkhounei ngamrou neidoura deekbai thukyerrouwa.

¹⁸ Thrailha rapne kouya tungcha hoiyerrouwo? Kouweiyo toulanungri, heirapne tlaipang thimini sheemthutkur hutsarap; thirrei sathutkur thrailha rapya ani uklumbi kou heitounarou? Heiwari mandallei lhou, ngamri thrailha rapri tloukhi yunmak.

¹⁹ Heengra khaklhakbine sheemthutkur thrailha rapya, “Kanthouwalo” toubine kyun thimiri, heirou tlou thukmak thlung'mtumya, “Katmayungalo” toubi kyun thimi heinungeiri kounakkei lakna! Thrailha heiwari naya shunmatupi pu hoileiko? Nimanung naya lam ruipi manirouko? Thilak, thrailha heiwari kulshanle sina lhopbangbine sheemkur hoiyanungkhi, heiyei rillari kounilkhi somak, heirou lhawai yamak.

²⁰ Heiya Umpuri Aiyei Khying Pucheem rilla klei, heitoubi Umpuei maibongrari Tlaipang-Shimlei nammane koutloukhi yunmakne rie leilakasu!