EZRA 9 - KHYINGEI PU'TLOU Bible (BSI)

Nulou-Cha'lourilnara Manokrilkur

¹ Asinungri lhourap namma heiwaya luilhakur hillouri, lhou'urpu upa rapne keileinara wabine keinungei wakyun, “Israellei thimi rapne suipipu raple, heirou Levia rapkhi kyaone ram heiyei thimi raprouwei yaitam laini kansangthutkur toumakne, Canaania rapbei, Hittia rapbei, Perizzia rapbei, Jebusia rapbei, Ammonia rapbei, Moaba rapbei, Egyptia rapbei, heirou Amoria rapbei toubi klei machinkna lhou rapya toubine yaihil chanthungbi leiwurchiya.

² Kouweiyo toulanungri, yarapne ram heiyei chanapuiya rapya yaimshaei nunungei, heirou yai chanapawa rapbei nunungei lourilbine, Dunpuei khying thimi raple ram heiyei limdei raple nulou-chalourilnara markotbi manokrillura. Heitoubi Israellei ruichingpi pu raple, lhou'urpu upa rapne maibong lamkrini ruibine heinaksi malungamnamakei lhou rapya toubine leiyura.”

³ Heirouri keine pao heiwaya loumayeknarouri, malungkhawurbi keiyei linglikya threllurbi, heitoubi keilurei shamkhi tha phuikur, heirou keiyei murkhmulkhi potkur, heitoubi keitam koutloukhi yunmakne sikhuplhakbine ombi leikur.

⁴ Heirouri raalmankur thimi rapne yenkallengbi, malungamnamakei lhouya touwurnei ngamrou, yane Israellei Dunpuei tloulhang rapya mayeknarouri chiwurbi keipongra karhilni wakartilbi leikur, heirouri keikhi rikraiwurbi, rawaiyei malamput makatlum phani koutloukhi yunmakne lu sikhuplhakbine omkur.

Ukning Hungbi Shunchakur

⁵ Heiya rawaiyei malamput makatdei kalnung, keine rikraine leinarouwei kanthoubi, keiyei linglikkhi cheet'chatne khuklu kanthrunchani kanelhakbi, heirou keiyei hut lambine, keiyei Dunpu, Umpunung

⁶ keine shunchakur, “O keiyei Dunpu, keiri rikraiwurbi, Neinungei keiyei mairungya rampha mangalthut'ngam'makura, keiyei Dunpu, kouweiyo toulanungri, kaiyei borh awari kaiyei lip dummura, heirou kaiyei mralri nungthou katokkura.

⁷ Kaipawa rapbei chaan'rouweine angtu rampharou kai touwurkhou mralri tangachakura; heisitoubi mrallei ngamni, kaiyei Krung rapkhi, kaiyei suipipu rapkhi lim deirei Krung rapbei hutra pilhakwurbi, raalshonra hiyerwurla, heirou raalman khoinekhi chawura, heirou deekbai thukbi mang'taakkura, heirou angturi asitoubi rikraiknani mairungkhi mangalthut manimakura.

⁸ Heiya asinungri kheen lepchaeinung hoiyanungkhi kaiyei Dunpu, Umpurei kringpikhei heiwaya phawurbine, Aiyei Khying bomra hemnungei chuk'nakni lakkhoupila, heineri Dunpune kaiyei mitmaiya piryerwurbi heitoubi kaya raalmanbi khounarakhi malungpilni mathrilyerwurla.

⁹ Kouweiyo toulanungri kari raalmanphopkur shok khoine klei thimi rapme; heisiya hoiyanungkhi, kaiyei Dunpune kayari raal manphopbi khouna birakhi khingurkhou toumaklei; heiya Persia'yei Krung rapbei mit'thrilna maibongrakhi Aiyei malungshi-kringpikheiya mutpilei; heitoubi kaya thoubaangbine kaiyei Dunpuei Pucheemyakhi sabaangyerlei; heirou Khulil heiyei deekbai thukbine mangkur putchei-lalthum rapya hanuikhi mallenglhakyerthulei, heitoubi Judah'yei rillei Jerusalemei raalpalkhi hanui sabaangyerthulei.”

¹⁰ “Heineri asinung kaiyei Dunpu, a'hillouri kani kouya yunserouwo? Kouweiyo toulanungri, kani Neiyei Chaytlou rapya lakurkhoulame.

¹¹ Neiyei shikrui Thimkhui rapne Neiyei Chaylam rapya atoubi shunthutpikhou, Nane nai kalnungei wachangrou kyou ram heiwari, ram heirou haallei louklei thimi rapbei lhangaimak lhouni marmokwurla. Heirou yane machinkna chorit naimakei lhouya toubine ram heiwari hyingmak lhou rapne bi khatrouweine bi khat wa'tlungni bil thimyerwurla.

¹² Ngam heineri, asinungri nani naiyei chanapuiya rapya yaiyei chanapawa rapnungei pilhakmak, heitoubi nani yaiyei cha nangaka rapyakhi naiyei chanapawa rapnungei nunungei loulhakmak. Heitoubi nani kouniroukhi yakou yakantlangrilbi palui hoibine palmalnabi, yaiyei kying-nungkngaiyakhi maduwurmaklo. Heiyanungri nani hut mantrangne ram heiyei lhangai putthuk rapya chamaibine palchangrou; heitoubi ram heiwaya naiyei hillei hungrou kyou yu-cha rapnungei kalui naimakne palnanung ram khoine horkhoupirou da.

¹³ Heiya kaiyei lhangaimak borh lhoune, heirou kaiyei mralne kaidoura yongdakur hillouri, kaiyei Dunpu, Nangne kaiyei phabomthuk tantiyakhi phamakne tanti pibine, kayari himaleiyerbi angtupha asi lakkhoupila.

¹⁴ Heiyanungri kani hanui kallengni Neiyei Chaylam rapya toubaiwurthubi, heinaksi machinknaei lhoutoubi klei thimi raple nulou-cha'lourilnara hanuikhi machokrilthurouko? Heinaksi hanuikhi leithuwanungri Nangne kaya malungkhawurbi, khatchatomkhi horkhoumakne hatbi toumangurou dako?

¹⁵ O Israellei Dunpu, Umpu; Nangri tharmuchim Puhoume; kouweiyo toulanungri Nangne kayari angtuei klei awarou mangyermakne kartleiyerbi heisi lakkhoupila. Kari Neiyei maibongra mrallei rilla leikur awariya; kouweiyo toulanungri kaiyei borh mrallei ngamni, hukhatkhi Neiyei maibongra mayungchangmak.”