EZRA 7 - KHYINGEI PU'TLOU Bible (BSI)

Ezra'ne Babylon'rouweine Jerusalem'ranung Lamtla Chayoukur

¹ Asinungri lhouthukrap heiyei hillouri, Persia'yei Krung Ar-ta-xerxes'ne paalyei kheenrou Ezra'ne Babylon'rouwei shaalthutkur; Ezra'ri Seraiah'yei chanapawa; Seraiahri Azariah'yei chanapawa; Azariah'ri Hilkiah'yei chanapawa;

² heirou Hilkiah'ri Shallum'yei chanapawa; Shallumri Zadok'yei chanapawa; Zadok'ri Ahitub'yei chanapawa;

³ heirou Ahitub'ri Amariah'yei chanapawa; Amariah'ri Azariah'yei chanapawa; Azariah'ri Maraioth'yei chanapawa;

⁴ heirou Maraioth'ri Zerahiah'yei chanapawa; Zerahiah'ri Uzzi'yei chanapawa; Uzziri Bukki'yei chanapawa;

⁵ heirou Bukki'ri Abishua'yei chanapawa; Abishua'ri Phinehas'yei chanapawa; Phinehas'ri Eleazar'yei chanapawa; heirou Eleazar'ri suipipu upa Aaronyei chanapawa.

⁶ Heisitoubi Ezra'ne Babylon'rouwei Jerusalem'ra hungtlungbine, Israellei Dunpu, Umpune Moses'nung piwurkhou chaytlou rapya ani lhangaidui marnobine mulhakkur; heirou Ezra'ne buchakur tloubomrap namma heiri Krungne anungei toupikur; ngamri aiyei Dunpu, Umpune aya kalhonpikur.

⁷ Heirou Israellei chanaorap thale, heirou suipipu raple. Levia raple, laarung raple, palshung shumtrum kngak thimi raple, heirou Pucheemyei shokrap thakhi Krung Ar-ta-xerxes'ne Krung hoinei kum-eni tlungei kallou Jerusalem'ra hungtlungkur.

⁸ Heirou Ezra'ne Krungei palnei kum-eniyei tlun-phanga tlung tanglarou Jerusalem'ra hungtlungkur.

⁹ Kouweiyo toulanungri ane lamkri tanglaei heidenirou Babylon'rouwei lamtla waiyoukur; heitoubi tlun'phanga tlung tanglaei tangla heidenirou Jerusalem'ra hungtlungkur, ngamri Dunpuei mantrang-lhangai hut heiwari aidoura kalhonpibi ruipikur.

¹⁰ Kouweiyo toulanungri Ezra'ne aiyei solungra Umpuei tloulamya marnobine, heitoubi heirapya lhangaini marchubine, heirou Aiyei chaytlou rapya, heirou Puwatlhouwei lammit raple, kulyomei youkna lammit rapya marnopinanungei ningmarshikbi leikur.

Krungne Ezra'nung Mayekur Chaytlou

¹¹ Awari Krung Ar-ta-xerxes'ne, Israel rapnungei, Umpuei chaytlourap, Puwatlhou lammitrap, heirou kulyom rapbei youkna lammit rapya lhangaini marnobi mulhakkur suipipu heirou mayethimi Ezra'nung mayepikur chay.

¹² Chaytlou heiri atoubi mayelei: “Krung rapbei Krung, Ar-ta-xerxes'ne, thangmunrei Dunpuei Pu'tlou mayethimi suipipu Ezra'nungei mayebi pithutlei, neiyei malungdam hoiniyasu!

¹³ Heirou asinungri, keine chay khat pithutdurla, touri keiyei Krungram rillei klei Israellei thimi hukounak rapne, heirou yaiyei suipipu'rap, heirou Levia rapne Jerusalem'ra shalkni leiyanungri, nangkou kalhonne shalkur yarou.

¹⁴ Kouweiyo toulanungri, Krungle, aiyei tlou-sempi purap napung-enini neiyari, neihutra shinbi klei Dunpuei Chaylamya urbine Judah'le Jerusalemei ngamrou thilhaknanungei toubi watyilwurla;

¹⁵ heitoubi Krungle aiyei tlou-sempi pu rapne, Jerusalem'ra thrungbi klei Israellei Dunpunungei leemni makatkur kulshanle sinakhi urlouheibine;

¹⁶ heitoubi Babylon'rei klei thimi raple, heirou suipipu rapne Jerusalem'rei klei yaiyei Dunpuei Pucheem'ranung leemni makatthutkur putchei raple kalhonne Babylon'ra neiyei pharou kyou sinale kulshanrap nammakhi kyaone louheibine;

¹⁷ heitoubi mukheine toubi heiyei tuy rapne halpa raple, yaopa rapkhi, heirou yaoshun rapkhi, heiraple kalhonne yaiyei makatput trunwailung raple, darkha heiyuikhi lobine, Jerusalem'ra klei naiyei Dunpuei Pucheemra makatnungei urlaka.

¹⁸ Heirou nangle, neiyei teinao Jehudia rapne lhangairoume toubi kning lhoubomrap hilthungne kulshan raple, sinarap heiwaya Dunpuei kya hilthungne heisi louyrenglaka.

¹⁹ Heirou kani neiyei Dunpuei Puwatlhoura yrengnungei neihutra pilhakbine silnakur shungyangrap heiwakhi, Jerusalem'ra Dunpuei maibongra namma pilhaklak.

²⁰ Heirou neiyei Dunpuei Pucheemra changbomthuk neiyei urthutnungei darkar khoi putcheirap namyerwa heikhi, nangne Krungei lalkeirei louthutbine pithutlaka.”

²¹ “Heirou keine, Krung Ar-ta-xerxes keine Euphrate Kungtang srallei ramra klei lalkeiya pa'kna purap nammayakhi chay piwurla, touri Thangmunrei Dunpuei chaylam mayepu, thimkhuini nanungei koukouya bulanungkhi, nani anungei louthutbine marshikpilaklo toubi shunwurla.

²² Lalkeirei putcheirap heiri kulshan talent macha-khatle, gehu kor macha-khatle, darkha heiyui til macha-khatle, Olive shirek til macha-khat, heirou mittikhi mshing naimakne kroei'mkhei marshikthutbine pilak.

²³ thangmunrei Dunpune koukouya chay pibi yukshunkur namma heiri Thangmunrei Dunpuei Pucheemra watyernungei yamakrou, heinimanungri, Krungle, aiyei chanapawa rapbei Krungbom doura Umpuei malungkha leirou!

²⁴ Kane nanungei asitoubikhi shunbine muyerwurla, touri nane suipipu rapnung, Levia rapnung, laarung rapnung, palshung kngaak thimi rapnung, heirou Nethinim'rap hukhat'rouweikhi ruiput nanbangbine khasana thrainung yamakrou.

²⁵ “Heitoubi Ezra, nangne, neinungei klei Dunpuei roushing hilthungne mukheine toubine, Euphrate Kungtang srallei klei thimirap nammaei doura pu khoine thikulpinanungei ayillei pu raple, pichar pu rapkhi khalthutlak; heitoubi yarap heiri neiyei Pu Dunpuei chaytlouya kmu thimi rapya khalthutrou da, heitoubi mumak thimi rapyari nangne shunmtupirou da.

²⁶ Heirou huhuni neiyei Dunpuei chaylamya heirou Krungei chaytlouya ngaakmakur thimirap yaowanungri, aidoura lhukni pichar toubine, khiyei tanti piyanungkhi, nimanung aya hulthutkur hoiyanungkhi, nimanung putchei heirou cheem-kei matloukheiya hoiyanungkhi, nimanung kul chalphopnei tantiya hoiyanungkhi pirou da.”

Krungei Kringpikhei

²⁷ Jerusalem'ra klei Umpuei Pucheemya heisibil thang'al kleini mansambaangnanungei Krungei ukningra thoulhakpikur Pu, kaipawa rapbei Dunpu, Umpuri likarsui lhangai hoiniyasu!

²⁸ Kouweiyo toulanungri Ane keiyari Krungei mit'thrilnara, heirou aiyei tlou-sempi pu rapbei maibongrakhi Krungei kringpikheiya phayerwurla. Asitoubi keidoura kalhonpibi klei keiyei Dunpu, Umpuei hutni keiya mantrangyerbi, heitoubi keine Israel raprei ruichingpi mani thimi rapya markumbine, keile kalhonne Jerusalem'ra kakur.