EZRA 4 - KHYINGEI PU'TLOU Bible (BSI)

Pucheem Sabaangnara Thingrilbine Hutkaryimkur

¹ Asinungri Judah'le, Benjamin'ya yeekna thimi rapne, raalmankur thimi rapne yenkallengbi Israellei Dunpu, Umpuei Pucheemya hanuikhi sabaangthunei paoya mayekurla;

² heirouri yane Zerubabel'le, cheemkhur upa rapbei leinara wachangbine yaya washun, “Kanekhi naya Pucheem sabaangnara trungpiyeise, kouweiyo toulanungri kakhi nanaksi, naiyei Dunpuya raphabi khrumkhou; heirou Assyria'yei Krung Esarhaddon'ne kaya bi arou yenlhakpikur tlaini'rouwei waiyoubine, kanikhi Anungei malamput rapya makatbine yenleikheime.”

³ Heiya Zerubabel'le, Jeshua'ne, heirou Israellei cheemkhur uparap nammaniri yanungei loukyun, “Kai Dunpuei Pucheemya sabaangnara nani kanungei trungpibom koukhi mak, heiya Persia'yei Krung Cyrus'ne kaya chay piwurkhou hilthungne Israellei Dunpu, Umpuei Pucheemya kaitamkhi sabaangchangrou.”

⁴ Heirouri ram heirouwei thimi rapne Judah'yei thimi rapya ukning toukanthritdurbi hut toumanthirkur, heitoubi Pucheem sabaangnei tlou-rouwei hut karyimyerkur;

⁵ heitoubi yane Persia'yei Krung Cyrus'yei chaan'rouweine Persia'yei Krung Darius'yei Krungchaan hungphani Pucheem sabaangnei lhou churnara marhotyernungei yaidoura karhane tlou sempi thimi rapya neekbine khoukur.

⁶ Asinungri, Ahasu-erus'ne Krung hunghoiriyei kumrou yane Judah'le, Jerusalem'ra paalbi klei thimi rapbei doura showal khingbaangnei tloubom rapya mayekur.

⁷ Heirou Ar-ta-xerxes'ne Krung hoiyei kheenrou, Bishlam'le, Mithredath, Tabe-el, heirou yaiyei lhoubom urmalkna uparap nammani Persia'yei Krung Ar-ta-xerxes'nung chethi khat mayekur; heirou chethi heiwari Aramaic tloura mayebine, heitoubi Aramaic tlourei mallengthutthu.

Krung Ar-ta-xerxes'nung Mayekur Chethi

⁸ Aramrei raallui Chaylampu Rehum'le, maye thimi Shimshai'ne Jerusalemei doura showal khingbaangbine Persia'yei Krung Ar-ta-xerxes'nung chethi khat atoubi mayekur.

⁹ Heirouri Chaylampu upa Rehum'le, lailik mayethimi Shimshai'ne yaiyei lhou urtrungpi lhou'ur purap nammale toubi, pichar purap, khul'lhou urtrungpi pu raple, maye-thimi raple, Erech'rei thimirap, Babylon'rei thimirap, Susa'rei thimirap touri Elamia rapkhi;

¹⁰ heirou rikrai khrumna kya Krung Osnappar'ne raal manloubi Samaria'yei khukarthil rapra, heirou Euphrate Kungtang sralra malhetlhakbi yul dayerkur lim rapbei thimirap nammani chethi heiwaya atoubi mayebine malhetkur.

¹¹ Chethi heiyei mrolri asitoubi mayebi yane anungei pithungkur: “Krung Ar-ta-xerxes, Kungtang Euphrate sralra klei neiyei shokrap ka nammani asitoubi mayelei:

¹² Tloubom awari Krungnung muyernilei touri, neirouwei yenshalthutkur Jehudia rapne Jerusalem'ra kai leinara hungbine, heitoubi raal youna bi Jerusalem Khulil heiwaya hanui kallengni sabaang'youthuwame, heitoubi heiyei raalpalkhi sabaangchibine, Pucheemyei cheemmunkhi hanui thulbang waiyouthulei.

¹³ Asinungri, Krungnung muyerkniri, kounakpi Khulil heiwaya hanui kallengni sabaangthubi, heirou heiyei raalpalkhi kuikoolbi luilhakthulanungri, yane kouniroukhi Krungnungei khulrui tuykhi, heirou ruiputkhi kat'hamakarou, heitoubi cheem-keiyei, rammei khasinakhi kamakarou, heiyanungri Krungkullei lalthumkhi kanthritrouwa.

¹⁴ Ngamri asinungri kani Krungkullei watlhouya toubi leiyabine, Krungya rikrai khrumknaya mangyernimaknei ngamrou, kani chethi awaya mayebine neinungei muyernei tloume;

¹⁵ heineri, neimaibongei loupaalkhou naipawa rapbei Krung chaanlam Lailik rapya thipha-latphabine raphathutlaklo toubine shunkni; heiyanungri, Khulil heiwari thuithikur raalyouna bi khat, heirou Krung rapbei doura mangyernanungei, heirou Krung rapbei doura lungyernanungei lhoutou waiyouna bi khatme touri nangne mupharou, heitounei ngammei Khulil heiwaya mangyerwurbi lakkurkhoume.

¹⁶ Asitoubi kani Krungnungei shunpibine muyerknime touri kounakpi Khulil heiwari hanui kallengni sabaangthulanungri, heirou raalpalkhi hanui kallengni sachithulanungri, Euphrate Kungtang srallei ramrap heiri Krungne kulchalphopbi khouchangmakrou.”

Krungne Pao Mallengbi Lhouchurya Toudongbi Karyimkur

¹⁷ Heirouri Krungne asitoubi pao loumallengkur: “Raallui Chaylampu Rehum'le, maye'thimi Shimshai, heirou Samaria'le, Euphrate Kungtang srallei ram karyoune paalbi klei yaya lhou urtrung thimirap namnungei kyingei tlou bethunglei, malungdam hoiniyasu.

¹⁸ Asinungri, nane kanungei heimayepithungkur chethi heiwari tlou mallengthutbine keimaibongra sherthutdurla.

¹⁹ Heineri keine chay piwurbine, raphayernarouri, Khulil heiwari bongei waiyoubine Krung rapbei doura karyomne raal youbine, yaidoura klah'knang, deekbai thukyerbidik leikhoulei, heirou lhangaimak raalyouna bi Khulil khatme toubine mayekhou heiwaya raphamuwurla.

²⁰ Heitoubi hutmantrang Krung rapne Jerusalem'ra pu khoine thrungkhoubi, Euphrate Kungtang kralni klei ram rapyakhi koolphopni paalkhoubi, yane heiyei Krung rapnungei khulruikhi, ruituykhi, heirou cheem-keiyei khul'rui-ram'rui(khasana) rapkhi namma kabine leikhoume touri keine muwurla.

²¹ Heineri, asinungri nangne chay khat piwurbi thimi rapya lhou churnarei toudonglaka, heiyanungri, keine hanui chay pibongyen Khulil heiwaya sabaangmarou.

²² Heirou kyun tloubom awaya tloukhoine chanthungmakleiko toubi lhangai-mukheine thikullak; nimanungri ram arouwei klah'knang, deekbai thukrouso!”

²³ Heirouri Krung Ar-ta-xerxes'yei mayebi loumallengkur chethi heiwaya Rehum'le, mayethimi Shimshai, heirou yaya lhou urtrungpi thimi rapbei maibongra pathutnarouri, yane Jerusalem'ra wabine lhou churbi klei Jehudia rapya hutshu shinbine, yaya lhou churnarei nambine toudongkur.

²⁴ Heisi tounarouri Jerusalemei Pucheem sabaangnei lhouchur heiwaya toudongkur; heisitoubi lhou heiwari Persia'yei Krung Darius'yei Krung hoinei kum'khni hungphani karyimbi leiwurkhou.